ZAKARIA 14
14
Yerusalem wuṛṛu manga walahanna
1Allon pallaṛṛungngu Mawu maranite. Ne Yerusalem sarun pangaṛṛoanna, wuṛṛu ina'ul᷊ene sarun tahianna su saruannu matanu. 2Mawu sarun mangammullu anambon balahanna iapapangalo Yerusalem. Soa udde sarun iaanu, manga wal᷊ene nipangngaṛṛoanna, wuṛṛu manga wawine nilal᷊eo. Sambageanganna wuassu tumanangnge sarun ṛuwoana watukku pamamuanganna, arawe lambene sarun matana,a su soa udde. 3Wua'udde Mawu sarun inai mapapangalo mando'appa manga walahanna udde, ere buatte niolang-Nge sutempon dorone. 4Su allo udde i tou sarun dumarisikka su Wuiddu Zaitun, su samba'an ra'in Yerusalem. Ne Wuiddu Zaitun sarun pesangannu wawal᷊anne apan mal᷊alangnga, matanattakka wuassu ra'i maddatingngu waṛṛatta. Sambageanganna wuassu wuidda udde sarun umal᷊ore watukku sawannakka, wuṛṛu sambageanganna lai watukku timukka. 5I yamiu sarun tumal᷊angnga umamattu wawal᷊anna apan nattahia wuidda udde nabbal᷊i darua. I yamiu sarun tumal᷊angnga ere iupungngu al᷊amonanu sutempo nariaddi linukka sutempo i Uzia, ratun Yehuda uaparenta. Wua'udde nirumantate Mawu Ruata'u, tatantalongannu anambon mala'ekatta.
6Napawe allo udde nirumantate, tate lai tempon masunge ara'e lai eisse. 7Su allo udde tate lai ararandumma. Allo udde sidutu masemmakka, wuṛṛu lai sutempo ṛabbi. Arawe tumba'u Mawu apan masingkattu allo udde rumanta.
8Su allo udde, ua'e wakku sarun mangelekka wuassu Yerusalem; sambageanganna wuassu ua'e udde mangelekka watukku Tahal᷊oangnga Nate wuṛṛu sambageanganna lai watukku Tahal᷊oangnga Tangngane. Ua'e udde sarun mangelekka su al᷊o'engngu tonna, mawae sutempon uranna aroddi lai sutempon paddissa. 9Ne Mawu sarun mamarenta maola'a ratu su ahewallu runia; suapan taumata sarun massubba si Tou ere Ruata wuṛṛu maaillal᷊a si Tou ringannu aranna apan uasul᷊ungnga.
10Ahewallu wanua wuassu Geba su sawannakka maddatingngu Rimon su timukka, sarun maola'a lete'a ratakke. Arawe Yerusalem sarun manginnuitta matanggakka, mattaggaṛṛanna wuassu leta'a maranine, soa udde sarun aatambanna ahewalle wuassu Ngara Pasallanganni Benyamin maddatingngu Ngara Pasallangannu Pappi'uanne, eteudde tampa ngara pasallanganna paarorone wuṛṛu wuassu Menara Hananel maddatingngu tampa pamamakkannu anggore pussa'an datu. 11Manga taumata sarun matana'a ringannu matammudda su soa udde, ringannu tawe wawansagu papate.
12 Mawu sarun mandantan al᷊aṛṛusa'itta apan maata'utta su anambon balahanna apan buatte napapangalo nando'appa Yerusalem. Mata wuṛṛu lila mangitou, ewe'e lai ahewallu watanganni mangitou sarun mawukku'a tantal᷊anna i mangitou ta'e wiakka.
13Su allo udde Mawu sarun ma'ola'a manga walahanna udde ial᷊iwune wuṛṛu matta'utta ma'oman sara suapan taumata sarun manametta ringanne apan su sandiṛṛanne wuṛṛu mango'a si tou. 14Manga esakka su Yehuda sarun mapapangalo manahekku Yerusalem. Maola'a ere saranapa niaaṛṛo i mangitou sarun manganu anambon darotongngu manga walahanna su al᷊indonganne ere inai wul᷊awanna, sal᷊a'a wuṛṛu laubba mangke ua'ombo.
15Sambau radda'a apan wahewalla udde lai sarun maṛṛia'a su awal᷊o, bagal, unta wuṛṛu keledai, see anambon binatangnga su paddasanannu seetta.
16Wua'udde anambon taumata apan ta'e wiakka suwallattu manga walahanna apan namangalo Yerusalem, sarun inai watukku soa udde massubba Ratu, Mawu Apan Lembontarṛṛino, wuṛṛu tadea'u maddamean Andeangngu Rasannu Rongnga. 17Amungkangngu pia balahanna apan maddiri inai watukku Yerusalem massubba Ratu, Mawu Apan Lembontaṛṛino, ne su wanuanne sarun tawe sumossokka uranna. 18Wuṛṛu amungkangngu taumatan Mesir maddiri mallaghu ramean Andeangngu Rasannu Rongnga, ne i mangitou lai sarun aṛṛiaannu radda'a apan niaprentan Mawu su anambon balahanna apan maddiri inai mattaṛṛamawu. 19Eteude ruumanna su Mesir wuṛṛu su anambon balahanna apan maddiri mallaghu ramean Andeangngu Rasannu Rongnga.
20Su allo udde manga henta su awal᷊o sarun uitannu manga wisara “Niṛṛae hunan Mawu”. Manga awali Wal᷊en Mawu sarun iaregga lai ere manga mangku su saruannu mezbah. 21Anambon awali su Yerusalem wuṛṛu su ahewallu Yehuda sarun iṛṛae maola'a pussa'an Mawu Apan Lembontaṛṛino. Tumanangnge apan mangonggollu sasamba sarun mappaattu awali udde pallahanna ṛemessu sasamba. Napawe tempo udde nio'omante, tate lai mabbawal᷊u'a su Wal᷊en Mawu Apan Lembontaṛṛino.
Currently Selected:
ZAKARIA 14: LAITLD
Highlight
Share
Copy
Want to have your highlights saved across all your devices? Sign up or sign in
