MALEAKHI 1
1
1Eteindi tanatan Mawu si Maleakhi tadea'u iapapasingkatta su umattu Israel.
Darangngun Mawu su Israel
2 Mawu nabbisara su uman-Ne, “I Ya'u marangngu si yamiu.” Arawe i mangitou sinumimbakka, “Ereapa Mawu mandangngu si yami?”
Mawu sinumimbakka, “Wal᷊inewe Esau iaangngi Yakub? Arawe i Yakub Ta'u arangnguanna, 3ewe'e Esau Ta'u mirantinna. Wageangngu lete'a pia bul᷊udde tatahuananni Esau buatte Ta'u nihohakka, wuṛṛu letangnge Ta'u nitantilla su manga winatangnga mal᷊aṛṛaga su wadda'a lol᷊okka.”
4Unnuwisara papapuluunni Esau, maga taumatan Edom udde mabbisara, “Manga soan kami buatte niṛṛimunsa'a, arawe i yami sarun ma'ola'a apia,” ne Mawu sarun sumimbakka, “I mangitou wotongnge ma'ola'a apia, arawe i Ya'u sarun mapaaṛṛa'a apia. I mangitou sarun isaggo ‘Wanuan al᷊al᷊eo’ wuṛṛu ‘Walaganna apan niaṛṛiaannu asasa'un Mawu saran mal᷊annu-l᷊annu.’ ”
5Walahannu Israel sarun ma'ellega udde sassane wuṛṛu mabbisara, “Atonna wahewalla taṛṛinon Mawu; taṛṛino-Ne naddatingngu leta'a su liuddu leta'u Israel!”
Mawu namasingkattu tataggu maṛṛagissa su manga imam
6 Mawu Apan Lembontaṛṛino nabbisara su manga imam, “Sangkatou ana'a mangngaddatta iamangnge, wuṛṛu sangkatou mangangimbe mangngaddatta mawune. I Ya'u indi Iamangngu; anio i yamiu tawe mangaddatta si Ya'u? I Ya'u indi Tuangngu; anio i yamiu tawe mata'u-U? I yamiu mallobbossa si Ya'u, arawe i yamiu ma'iwal᷊o, ‘Ringannu olangnge ereapa i yami mallobbossa Si'o?’ 7Ringannu mangonggollu anna sasamba apan tawe suṛṛinone maola'a sasamba su wowon mezba-Ku. Wua'udde i yamiu maiwal᷊o, ‘Ringannu olangnge ereapa i yami mangngaddio'a Si'o?’ Ringannu nandal᷊eo mezbah-U. 8Amungkangngu i yamiu mangonggollu sasamba si Ya'u winatangnga apan wuta, apan maradda'a ara'e lome, wal᷊inewe udde inolaanna apan nassal᷊a? Annama'o pangonggollu winatangnga ereudde su gubernure! Apa i tou sarun mal᷊uassa wuṛṛu ma'ola'a si yamiu ringannu mapia?”
9Orassa indi, ei manga imam, annama'o paddorongnga su Ruata tadea'u i Tou umakkanni ite. I Tou sarun sumimbakka aal᷊iomannu, wuṛṛu pasasal᷊anu sassane. 10Mawu Apan Lembontaṛṛino nabbisara, “Mappianne ngaran Wal᷊e-U irṛṛudda, ana waugu tawe gunane i yamiu mande'omma putungnga su wowon mezbah-U. I Ya'u tawe mal᷊uassa si'o, wuṛṛu maddiri manengkamma sasambanu. 11I Ya'u aaddatannu manga walahanna su ahewallu runia. Suapan tampa itattambunna amania iapangaddatta arang-Ku wuṛṛu nionggolla manga sasamba apan suṛṛinone, ana waugu anambon balahanna mangngaddatta si Ya'u! 12Arawe i yamiu mallobbossa si Ya'u ana waugu massunna mezbah-U tawe ereggane, wuṛṛu mangngongngollu sasamba isudde anna apan nitol᷊a'i yamiu! 13Wisarannu, ‘I ite nawusate ringannu sarangkanambone udde’, wuṛṛu i yamiu mangngaddio'a si Ya'u. I yamiu mangngapiddu winatangnga apan nita'o, winatangnga apan lome ara'e maradda'a tadea'u ionggolla si Ya'u. Su ṛingiddi yamiu i Ya'u manengkamma sasamba udde? 14Niawontohante iapa taṛṛa wahia apan mangngonggollu sasamba si Ya'u winatangnga apan tawe aregane, amungkangngu suwallattu winatangnga papadul᷊iananna pia binatangnga apan mapia apan buatte nipa'irene si Ya'u! Ana waugu ete i Ya'u Ratu Mawantuga, wuṛṛu aaddatannu anambon balahanna.”
Currently Selected:
MALEAKHI 1: LAITLD
Highlight
Share
Copy
Want to have your highlights saved across all your devices? Sign up or sign in