MALEAKHI 2
2
1 Mawu Apan Lembontaṛṛino nabbisara su manga imam, “Eteindi parenta-U si yamiu: 2Pangaddatte si Ya'u ringannu pallal᷊agunu. Amungkangngu i yamiu maddiri maddaringikka wisara-U, i yamiu sarun Ta'u wontohanna. Sarangkanambone apan sengkamanni yamiu ma'ola'a al᷊amatta sarun mawal᷊u mabbal᷊i wawontoga. Mangke atonna, sarangkanambone apan mapia udde buatte Ta'u niwontohanna, ana waugu i yamiu tawe maddaringikka parenta-U. 3Manga anangngu sarun Ta'u iṛṛuumanna, wuṛṛu hatinu Ta'u wuṛṛannu tain binatangnga apan niola'i yamiu sasamba, wuṛṛu i yamiu sarun wol᷊enganna su ombon sapadda. 4Ne i yamiu masingkatte manungku parenta indi buatte Ta'u nionggolla, tadea'u paaire-U ringannu manga imam, papapulunni Lewi, sidutu iappaatta.
5Sulal᷊ummu paaire udde i Ya'u naddiandi si mangitou pabbiaṛṛanna apan matammudda wuṛṛu mal᷊angnganna, wuṛṛu i mangitou Ta'u nirolokka mangaddatta si Ya'u wuṛṛu matta'u-U. 6I mangitou mangnggaṛṛa'a ringannu naṛṛino wuṛṛu wal᷊ine apan nassal᷊a. I mangitou marani-U, wuṛṛu ringannu atatul᷊idda tuttaṛṛutta apulu-U. I mangitou lai mantul᷊ungngu manambo taumata tadea'u tate lai ma'ola'a al᷊al᷊eo. 7Atonna manaran manga imam mangngaṛṛa'u apan naṛṛino su ola'i Ya'u, Mawu Apan Atanggaṛṛanne. Ete si mangitou tumanangnge ṛinone maiwal᷊o apa apan ipaapullu-U, ana waugu i mangitou udde daroloṛṛang-Ku.
8Arawe orassa indi, i yamiu, manga imam, buatte nanewadda wuassu lal᷊anna apan naṛṛino. Manga al᷊aṛṛangngu buatte namol᷊engnga manambo taumata ma'ola'a pasasal᷊a. I yamiu buatte nanggohakka paaire apan Ta'u niola'a ringanni yamiu. 9Ne i Ya'u sarun ma'ola'a si yamiu aaddio'annu umattu Israel ana waugu i yamiu tawe tumuṛṛutta apulu-U, wuṛṛu ana waugu i yamiu naṛṛaen taumata sutempo mannantiro uma-U.”
Tumanangnge tawe satia su Ruata
10Wal᷊inewe i ite sarangkanambone uatahuanna Iamangnga apan uasul᷊ungnga? Wal᷊inewe i ite sarangkanambone niola'u Ruata apan uasul᷊ungnga? Amungkangngu aroddi, anio i ite uawawahia paaire wuṛṛu ringannu aroddi namahia paaire apan niola'u Ruata ringannu al᷊amonang kite? 11Umattu Yehuda buatte nilumawangnga paairen Duata si mangitou wuṛṛu ma'ola'a manga inolaanna apan maarantinna su Yerusalem wuṛṛu su ahewallu wanua. I mangitou buatte nandal᷊eo Wal᷊en Mawu apan arangnguanne wuṛṛu naawingngu manga wawine apan massubba manga mongannu walahanna waine. 12Doronganna manga taumata apan inolaanne aroddi limbuaṛṛannu Mawu wuassu umattu Israel. Antimanna i mangitou tate lai tumantalongnga ringannu walahanni ite mangonggollu manga sasamba su Mawu Apan Lembontaṛṛino.
13Wuṛṛu indi inolaannu apan waine. Mezbah Mawu niammoanni yamiu ringannu allom mata; i yamiu lulluai wuṛṛu sussangitta ana waugu tate lai manengkamma manga sasambanu. 14I yamiu ma'iwal᷊o i Tou maddirite manengkamma sasamba udde. Ana waugu Mawu masingkatta i yamiu tate satia su wawine apan buatte niawingngi yamiu sutempo i'o ta'e umbasanna. Wawine udde hawe sulal᷊ummu pabbiaṛṛannu, arawe i yamiu buatte nallobbossa si tou, salaiwe su saruannu Ruata i yamiu buatte naddiandi tadea'u sidutu satia si tou. 15Wal᷊inewe Ruata Apan Tinggassa nandiaddi siraddua waddangnga sambau wuṛṛu niawa sambau ringannu wawine udde? Apa pandumannu Mawu su olangnge udde? Tawe baine tadea'u i yamiu maasomba al᷊aṛṛana'a apan maola'a umattu Ruata apan tutune. Nariaddi paariagai watangannu, imbaṛṛangnga suwallatti yamiu piaddu tawe satia su awingnge. 16“I Ya'u maddantinnu pia patatal᷊ei,” unnu Mawu Ruatan Israel. “I Ya'u maddantinna amungkangngu pia sangkatou suwallatti yamiu pia inolaanne aṛṛagissa udde su saruannu awingnge. Ne paariagaite watangannu wuṛṛu arie saran paassa mallobbossa awingngu.”
Allo pallaṛṛuunganna maranite
17I yamiu na'ola'a Ruata nawusa ringannu tal᷊umamanu. Arawe i yamiu ma'iwal᷊o, “Ereapa i yamiu maawusa Mawu?” Ringannu mabbisara, “Anambon taumata apan ma'ola'a al᷊al᷊eo sassunnannu Mawu mapia, wuṛṛu i Tou mappulun mangitou.” Ara'e ringannu ma'iwal᷊o, “Suapa Ruata apan naudde matul᷊idda udde?”
Currently Selected:
MALEAKHI 2: LAITLD
Highlight
Share
Copy
Want to have your highlights saved across all your devices? Sign up or sign in