IMAMATTA 9

I Harun nangonggolu sasamba

1Massallo apawe nal᷊iudde lal᷊aghun patatenega, su allo aual᷊une, i Musa namago si Harun wuṛṛu manga anangnge see lai manga piaṛṛa'u walahannu Israel. 2Unni Musa si Harun, “Panganute sambau sapi esakka saṛṛen tumuwo wuṛṛu sambau domba esakka, itarua udde ṛinone tawe sangkulle. Onggol᷊a'e binatangnga darua udde su Mawu, sapi esakka maola'a sasamba ipangampungnga rosa, wuṛṛu domba esakka maola'a sasamba itattambunna. 3Ana see doloṛṛa'e walahannu Israel mangonggolu sambau ambinga esakka maola'a sasamba ipangampunga rosa wuṛṛu sambau ana'u sapi wuṛṛu sambau lai ana'u domba apan sambau-sambau uukke santonna wuṛṛu tawe sangkulle maola'a sasamba itattambunna. 4Doloṛṛa'e lai i mangitou mangonggolu sambau sapi esakka wuṛṛu sambau ambinga esakka maola'a sasamban paddarame. Sarangkanambone udde ṛinone ionggoli mangitou su Mawu suadio'a ringannu sasamba ia'imbe apan pia lanane, ana waugu allo indi Mawu nirumanta ringanni mangitou.”

5Sarangkanambone apan nitanatan Musa niapiddi mangitou su saruannu Rasanna, wuṛṛu ṛuanganna sarangkanambone naammulla isudde mattaṛṛamawu su Mawu. 6Ana see i Musa nabbisara, “Mawu nandolokki yamiu niapaola'a indi tadea'u i yamiu wotongnge maasilo semakku darantan Mawu.” 7Wua'udde i tou nabbisara si Harun, “Roote watukku mezbah wuṛṛu panaddiate sasamba ipangampungnga rosa wuṛṛu sasamba itattambunna, tadea'u rosanu wuṛṛu rosan ṛuangannu ampungannu Mawu. Ola'e udde ere buatte niparentan Mawu.”

8Ne i Harun inaite watukku mezbah wuṛṛu naṛṛata sapi esakka apan sarun ionggola maola'a aampunga rosane sassane. 9Manga ana'i Harun nanogokku daṛṛan binatangnga udde si Harun, wuṛṛu i tou nangammon tal᷊imaddone sulal᷊ummu daṛṛa udde, apiddu namuṛṛa su manga tatandu'a su mezbah pabbuuanne appata. Wua'udde daṛṛa lambene niwokka su apampakku mezbah. 10Tawa, wabbatune wuṛṛu wageangnge apianne wuassu winatangnga udde nitambunni tou su wowon mezbah, ere buatte niparentan Mawu si Musa. 11Arawe ṛemessa wuṛṛu pisin binatangnga udde nitambunna su liuddu paddasananna.

12Wua'udde i Harun namototta binatangnga maola'a sasamba itattambunna hunan batanganne sassane. Manga ana'i Harun namasingkattu daṛṛa udde si tou, ana see i tou namokka mezbah sandiṛṛanne appata. 13Wua'udde i mangitou nanantilla si tou pua wuṛṛu manga wageangnge waine wuassu winatangnga udde, wuṛṛu nitambunni tou su wowon mezbah. 14Wua'udde lal᷊oṛṛon tianne wuṛṛu palangngu binatangnga udde niukkassa wuṛṛu nitambunni tou ringannu sasamba itattambunna su wowon mezbah.

15Wua'udde i tou nangonggolu sasamba ambinga maola'a sasamba aampunga rosan taumata. Ambinga udde nipototti tou ere su sasamba pinangampunga rosane sassanee. 16Wua'udde i tou nanganu binatangnga maola'a sasamba iatattambunna, wuṛṛu nionggoli tou tumuṛṛuttu atoranna. 17Wua'udde i tou nangonggolu sasamba ia'imbe; i tou nanganu taponna sangkangkumma, wuṛṛu nitambunni tou su wowon mezbah. Udde tatambane su sasamba itattambunna mamiallo. 18Ana see i tou naṛṛata lai sapi esakka sambau wuṛṛu domba esakka sambau maola'a sasamban paddarame su taumata. Manga ana'i Harun nanoggokku daṛṛan binatangnga udde si tou, ana see i tou namokka su mezbah sandiṛṛanne appata. 19Wageangnge apan pia tawane wuassu sapi wuṛṛu ambinga udde niaddo mangitou 20su wowon do'on binatangnga darua udde, ana see nitambunni Harun su wowon mezbah. 21Ro'o wuṛṛu palangnge aikkatanna udde nionggola maola'a sasamba iattogokka su Mawu. Eteudde wageangngu manga imam, ere buatte nirolokki Musa.

22Napawe buatte nangonggolu anambon sasamba udde, i Harun namatten limane su wowon ṛuangannu Israel wuṛṛu nangal᷊amatta si mangitou, ana see i tou sinumossokke. 23Wua'udde i Musa wuṛṛu i Harun sinumuttate sulal᷊ummu Rasannu Mawu. Wua'udde itarua sinumabangnga wuṛṛu nangal᷊amatta ṛuanganna. Ana see anambon ṛuangannu Israel naasilo semakku darantan Mawu. 24Inaṛṛombanganne Mawu nanossokku putungnga apan nanutungnga na'oman sara nasue sasamba itattambunna wuṛṛu manga wageangnge apan pia tawane su wowon mezbah. Su tempo ṛuangannu Israel naasilo i mangitou mangngintul᷊i wuṛṛu apiddu nassubba.

Currently Selected:

IMAMATTA 9: LAITLD

Highlight

Copy