IMAMATTA 10

Rosan Nadab wuṛṛu Abihu

1Su allo sambau i Nadab wuṛṛu i Abihu, manga ana'i Harun, nanganu tanpan putungngu sambau-sambau wuṛṛu tinaṛṛoannu waṛṛa. Ana see itarua nangaddon amania su putungnga udde wuṛṛu nionggola sasamba su Mawu. Arawe putungnga udde tawe waresi ana waugu Mawu tawe nandolokki tarua niapaonggolu sasamba. 2Ne Mawu nandantan putungnga apan nanutungnga sitarua na'oman sara nate su Rasannu Mawu. 3Ana see i Musa nabbisara si Harun, “Eteudde apan niapasingkattu Mawu su tempo i Tou nabbisara, ‘Sarangkanambone apan mangngimbe si Ya'u ṛinone mangaddata asasusi-U. I Ya'u sarun mapal᷊iatta'u awawantu-U su ahewallu walahanna-Ku.’ ” Arawe i Harun mal᷊anna-l᷊annaba.

4Wua'udde i Musa namago si Misael wuṛṛu si Elsafan, manga ana'i Uziel, tuṛṛangngu iamangngi Harun. Unni tou si mangitou, “Rantate inawarendi, al᷊appe winal᷊unannu tuṛṛangngu su Rasannu Mawu wuṛṛu addoa'e su; liuddu paddasananna.” 5I mangitou nirumanta wuṛṛu nangapiddu manga winal᷊unanna apan ta'e lal᷊uṛṛeannu laubba udde watukku liuddu paddasananna, ere buatte nirolokki Musa.

6Ana see i Musa nabbisara si Harun wuṛṛu manga anangnge waine, eteudde i Eleazar wuṛṛu i Itamar, “Arie pabbala'a utangngu tawe aṛṛoanna, wuṛṛu arie panggesa'a laungngu apan mapal᷊iatta'a manungku iraddua massusa wuṛṛu lullal᷊o. Amungkangngu iradua ma'ola'a aroddi, iradua sarun mate, wuṛṛu anambon ṛuangannu Israel asa'uannu Mawu. Arawe anambon taumatan Israel waine wotongnge lumal᷊on duang katou apan nate ana waugu putungnga wuassu Mawu. 7Imbaṛṛangnga manantangngu Rasannu Mawu tadea'u i yamiu tawe mate, ana waugu amungkangngu i yamiu buatte nitenegu lanan lal᷊aghun iapa'imbe Mawu.” I mangitou na'ola'a ere buatte niwisaran i Musa.

Atoranna su manga imam

8 Mawu nabbisara si Harun, 9“Napawe buatte na'inumma ua'e anggore ara'e ua'e ma'awu'anna, i'o wuṛṛu manga anangngu imbaṛṛangnga sumutta sulal᷊ummu Rasang-Ku. Amungkangngu i yamiu lumawangnga atoranna udde, i yamiu sarun mate. Parenta udde sarun daringiṛṛannu anambon papapulunnu. 10I yamiu ṛinone wotongnge mapadaṛṛalan apan niṛṛae su Ruata, wuṛṛu tawe niṛṛae suwallatu nassal᷊a wuṛṛu tawe nassal᷊a. 11Anambon tita apan Ta'u nionggola si'o wuassi Musa, ṛinone wotongnge iaṛṛa'i yamiu su walahannu Israel.”

12I Musa nabbisara si Harun wuṛṛu su anangnge darua, i Eleazar wuṛṛu i Itamar, “Panganute gandumma lambene wuassu anna apan nionggola su Mawu. Wuassu taponna udde ola'e roti apan tawe ragine, ana see ante su sandiṛṛannu mezbah, ana waugu sasamba udde lembon susi. 13Roti udde ṛinone annananna su tampa apan susi, ana waugu wuassu anna apan nionggola sasamba su Mawu, roti udde maola'a wageangngu wuṛṛu manga anangngu esakka. Eteudde parentan Mawu si ya'u. 14Arawe i yamiu wuṛṛu manga anangngu esakka wuṛṛu wawine wotongnge uminassa ro'on sasamba nitogokka wuṛṛu palangngu sasamba apan niṛṛae. Eteudde wageangngu manga imam wuassu sasamban paddaramen walahannu Israel. I yamiu wotongnge umanna al᷊awo'u anna su tampa apan tawe ipappalli. 15Palangnga sasamba apan niṛṛae wuṛṛu ro'on sasamba nitogokka udde ṛinone iapidda suadio'a ringannu tawa wuṛṛu sasamba itattambunna maola'a sasamba iṛṛae su Mawu. Manga wageangnge udde maola'a pussaanu wuṛṛu manga anangngu saran mal᷊annu-l᷊annu, ere buatte niparentan Mawu.”

16Wua'udde i Musa naiwal᷊o su ola'u ambinga maola'a sasamba ipangampunga rosa. I tou nipasingkatanna manungku ambinga udde buatte nitambunna wangu. Olangnge udde i Musa naasa'u si Eleazar wuṛṛu si Itamar, wuṛṛu i tou nabbisara si mangitou, 17“Anio sasamba ipangampunga rosa udde nianni yamiu su tampa apan susi? Sasamba udde lembon susi; Mawu nangonggolla si'o, tadea'u rosan taumatan Israel ampunganna. 18Daṛṛan ambinga udde tawe niapidda su Rasannu Mawu, nariaddi ṛinone sasamba udde annananni yamiu isudde ere buatte ta'u niparenta.”

19Sasimbakki Harun, “Atonna allo indi ṛuangannu Israel buatte nangonggolu sasamba aampunga rosa wuṛṛu sasamba itattambunna su Mawu. Salaiwe aroddi, asasilaka indi naṛṛia'e si ya'u. Unnu wisara allo indi ya'u umanna sasamba ipangampunga rosa udde, apa Mawu mal᷊uassa si ya'u?” 20I Musa naapemdamma mal᷊uassa ringannu sasimbakka udde.

Currently Selected:

IMAMATTA 10: LAITLD

Highlight

Copy