IMAMATTA 16
16
Allo wahewa pamappasanna rosa
1Napawe ana'i Harun ruan katou nate su tempo mangonggolu sasamba putungnga apan tawe ipaapulun Mawu, Mawu nabbisara si Musa, 2wisara-Ne, “Wal᷊oa'e si tuṛṛangngu i Harun, manungku tumba'u su tempo apan buatte nitantunna i tou wotonge sumutta su Wabbo'a Lembon Susi apan niwallatannu pampele, ana waugu ete isudde i Ya'u mattingka pasilon batangang-Ku sulal᷊ummu winabbawa su wowon lal᷊uubbu Wantallu Pa'aire. Amungkangngu i Harun lumawangnga parenta udde, i tou sarun mate. 3Tumba'u ringannu mangonggolu sapi esakka saṛṛen tumuwo maola'a sasamba ipangampungnga rosa wuṛṛu sambau domba esakka maola'a sasamba itattambunna, i Harun botongnge maasutta su Wabbo'a Lembon Susi.”
4Wua'udde i Harun ṛinone manutukka manga atoranna indi. Tantal᷊anna taambe sinumutta su Wabbo'a Lembon Susi i tou ṛinone mandeno ana see mabbansalla laubbu imam, eteudde laubba, sal᷊ana maautta, papeṛṛetta wuṛṛu paporongnga, sarangkanambone wuassu linen.
5Ana see ṛuangannu Israel nanantillu ambinga esakka darua si Harun maola'a sasamba ipangampungnga rosa wuṛṛu sambau domba esakka maola'a sasamba itattambunna. 6I Harun ṛinone mangonggolu sambau sapi esakka maola'a sasamba ipangampungnga rosa su watanganne sassane wuṛṛu amonanne. 7Darua ambinga esakka wuassu ṛuangannu Israel ṛinone iapiddi tou watukku saruannu ngaran Dasannu Mawu. 8Isudde i tou ṛinone mandammen undi ringannu mappaattu darua watu, iapa sambau nitialanna “ionggolla su Mawu”, wuṛṛu waine “ionggolla si Azazeel”. 9Ambinga apan niapile su Mawu ṛinone ionggola maola'a sasamba ipangampungnga rosa. 10Ambinga apan niapile si Azazeel ṛinone iapidda ta'e wiakka su saruannu Mawu ana see limbuaṛṛanna watukku wadda'a maola'a wuatti Azazeel, tadea'u manga rosan Israel pappasanna.
11Napawe i Harun nangonggolu sasamba wuṛṛu namototta sapi esakka maola'a sasamba ipangampunga rosa su watanganne sassane wuṛṛu su amonanne, 12i tou ṛinone manganu tampan putungnga wuassu mezbah wuṛṛu loṛṛoannu waṛṛa ma'oman sara mapene wuṛṛu ruan kangkumma amania al᷊ussa, ana see iapidda su Wabbo'a Lembon Susi. 13Dupa udde ṛinone itambunni tou su saruannu Wantallu Pa'aire, ma'oman sara timbulle mangooppa lal᷊ubbu Wantalla udde wuṛṛu i Harun tawe maasilo, ana waugu amungkangngu i tou ma'asilo, i tou sarun mate. 14Ana see i Harun manganu addio'a daṛṛan sapi, wuṛṛu ringannu tal᷊imaddone mamokkan daṛṛa udde su wageangngu saruannu lal᷊ubbu Wantallu Pa'aire wuṛṛu paapitu su saruannu Wantalla.
15Wua'udde i Harun ṛinone mamototta ambinga maola'a sasamba ipangampungnga rosan balagu Israel. Daṛṛan ambinga udde ṛinone iapiddi tou watukku Wabbo'a Lembon Susi, ana see iwokka su wageangngu saruannu lal᷊uubbu Wantallu Pa'aire wuṛṛu su saruannu Wantalla, ere buatte niola'i tou su daṛṛan sapi esakka. 16Ringannu olangnge udde i tou napaasusin Wabbo'a Lembon Susi wuassu paddarosan walahannu Israel wuṛṛu wuassu al᷊awo'u rosa mangitou. Rasannu Mawu ṛinone iapaasusi ana waugu addone supattangngannu paddasanannu walahannu Israel wuṛṛu naṛṛinoannu ararantinni mangitou. 17Manattakka wuassu i Harun sumutta su Wabbo'a Lembon Susi mangamattu lal᷊aghun pangangukkassa maddatingngu i tou sumabbangnga, saran sangkatou tawe wotongnge sulal᷊ummu Rasanna udde. Napawe buatte nangamattu lal᷊aghu su batanganne sassane, su amonanne wuṛṛu su anambon balahannu Israel, 18i Harun ṛinone sumabbangnga wuṛṛu inai watukku mezbah sasamba itattambunna tadea'u ipamaresi mezbah udde. I tou ṛinone manganu addio'a daṛṛan sapi wuṛṛu daṛṛan ambinga, wuṛṛu mamuṛṛa su manga tatandu'a su manga pabbuuannu mezbah. 19Ringannu tal᷊imaddone i tou ṛinone momokkan daṛṛa udde su wowon mezbah. Ringannu olangnge aroddi i tou namaresi mezbah wuassu ararantinnu walahannu Israel, tadea'u mabbal᷊i susi.
Ambinga ma'itumma
20Napawe buatte nangamattu lal᷊aghun pamamaresi Wabbo'a Lembon Susi wuṛṛu manga wageangnge waine wuassu Rasannu Mawu see lai mezbah, i Harun ṛinone mangonggola su Mawu ambinga apan ta'e wiakka apan nipile wuatti Azazeel. 21I tou ṛinone mangandangngu darua limane su wowo puan ambinga udde lapiddu manga'u anambon pasasal᷊ane, rosa wuṛṛu lal᷊awangngu walahannu Israel. Ringannu aroddi anambon pasasal᷊an balahannu Israel niingkatta su puan ambinga udde. Ana see sangkatou apan niapamanara ṛinone mallimbuakka ambinga udde watukku wadda'a. 22Ambinga udde uaapiddu anambon dosan balahannu Israel su wageangngu leta'a mamara apan tawe atanaanna wuṛṛu i tou ṛinone ipallossa su wadda'a.
23Wua'udde i Harun sumuttate sulal᷊ummu Rasanna, malluatta laubbu imam apan niluṛṛen tou su tempo sinumutta su Wabbo'a Lembon Susi, wuṛṛu manantangngu laubba udde poiaroddi. 24Ana see i tou ṛinone mandeno su sambau tampa apan niṛṛae wuṛṛu malluṛṛen laungnge sassane. Wua'udde i tou ṛinone sumabbangnga wuṛṛu mangonggolu sasamba itattambunna ipangampungnga rosane sassane wuṛṛu rosan balahannu Israel. 25Tawan binatangnga olaanna sasamba ipangampunga rosa ṛinone itambunna su mezbah.
26Taumata apan namallossu ambinga si Azazeel su wadda'a ṛinone mabbansalla laungnge wuṛṛu mandeno tantal᷊anna taambe mapul᷊e watukku paddasananna. 27Sapi esakka wuṛṛu ambinga olaanna sasamba ipangampunga rosa, apan daṛṛane niapidda sumutta watukku Wabbo'a Lembon Susi maola'a aampungnga rosa, ṛinone iapidda watukku liuddu paddasananna wuṛṛu itambunna. Pisine, ṛemene wuṛṛu lal᷊oṛṛon tiannu winatangnga darua udde ṛinone itambunna sarangkanambone. 28Taumata apan nanambunna ṛinone mabbansalla laungnge wuṛṛu mandeno tantal᷊anna i tou taambe mapul᷊e watukku paddasananna.
Atokku maddamean allon pangangampungnga rosa
29-31Manga atoranna indi ṛinone ipaatta saran mal᷊annu-l᷊annu. Su allo appul᷊one wul᷊anna appitune, taumatan Israel wuṛṛu taumata raho apan uatana'a su wallatti mangitou ṛinone mappuasa wuṛṛu imbaṛṛangnga mammanara, ana waugu allo indi allo apan lembon susi. Su allo udde ṛinone olaanna lal᷊aghu ipamaresi walahannu Israel wuassu al᷊awo'u rosan mangitou tadea'u i mangitou mawaresi. 32Imam Rahewalla, apan buatte nitenega wuṛṛu niṛṛae hunan Duata ipallol᷊ossa iamangnge, ṛinone mapaamattu lal᷊aghu pamamaresi udde. I tou ṛinone mappaattu laubba al᷊aṛṛaene, 33ana see mapaamattu lal᷊aghun pamamaresi Wabbo'a Lembon Susi, manga wageangnge waine wuassu Rasannu Mawu, mezbah, manga imam wuṛṛu walahannu Israel sarangkanambone. 34Lal᷊aghu udde ṛinone olaanna santonna paassa tadea'u ipamaresi walahannu Israel wuassu al᷊awo'u rosan mangitou. Eteudde manga atoranna apan ṛinone iapaamatti mangitou saran mal᷊annu-l᷊annu.
I Musa tinumuṛṛutta ere buatte niparentan Mawu si tou.
Currently Selected:
IMAMATTA 16: LAITLD
Highlight
Share
Copy
Want to have your highlights saved across all your devices? Sign up or sign in
