IMAMATTA 15
15
Ararantinna su taumata
1 Mawu nangonggolu manga atoranna indi si Musa wuṛṛu si Harun 2maola'a atorannu walahannu Israel. Amungkangngu pia sangkatou napassabangngu nana ana waugu radda'u esakka, nana udde ma'arantinna, 3mawae ete nasabbangnga aroddi lai nataṛṛanganna sulal᷊umme. 4Tampa apan nia'aiananna ara'e niatiil᷊annu taumata udde mabbal᷊i ma'arantinna. 5-8Isai-sai apan nangindingnga taumata apan asabbangngu nana su tampan atatiil᷊anne, ara'e niuma'ianna su tampa apan buatte niaiananne, ara'e niadduannu taumata udde, ṛinone mabbansalla laungnge wuṛṛu mandeno, wuṛṛu i tou ma'arantinna maddatingngu matannallo umattuppa. 9Apampakku aiananna su awal᷊o ara'e al᷊awo'a apan niaianannu taumata apan mapaasabbangngu nana udde mabbal᷊i ma'arantinna. 10Isai-sai apan nangindingnga tampa lanna'a niaianannu taumata udde, mabbal᷊i ma'arantinna maddatingngu matannallo umattuppa. Suapan taumata apan mamasanna luranna udde ṛinone mabbansalla laungnge wuṛṛu mandeno, wuṛṛu i tou ma'arantinna maddatingngu matannallo umattuppa. 11Amungkangngu taumata apan mapa'asabbangngu nana tawe nangukkassa limane paarorone ana see nangindingnga taumata waine, ne taumata apan niindinganne udde ṛinone mabbansalla laungnge wuṛṛu mandeno, wuṛṛu i tou ma'arantinna maddatingngu matannallo umatuppa. 12Urinna leta'a apan niindingannu taumata udde ṛinone pesanganna wuṛṛu saranapa apan aagasanne ṛinone ukkasanna.
13Amungkangngu taumata udde napiate, i tou ṛinone maṛṛangattu pitu allo lai. Wua'udde i tou ṛinone mabbansalla laungnge wuṛṛu mandeno su al᷊imatan kua'e, ne i tou nawaresite. 14Su allo aual᷊une i tou ṛinone mangapiddu darua manu'a merpati saṛṛen tumuwo ara'e manu'a bakiangnga saṛṛen tumuwo watukku saruannu ngaran Dasannu Mawu ana see manantilla su imam. 15Imam ṛinone mangonggollu manu'a sambau maola'a sasamba aampungnga rosa, wuṛṛu sambau lai maola'a sasamba itattambunna. Ringannu aroddi imam na'ola'a lal᷊aghun pamamaresi taumata udde su saruannu Mawu.
16Amungkangngu sangkatou esakka napasabbangngu sari'a, i tou ṛinone mandeno arawe sidutu ma'arantinna maddatingngu matannallo umattuppa. 17Al᷊awo'u saranapa wuassu mal᷊aṛṛenessa ara'e pisi apan naturoannu sari'a udde ṛinone ukkasanna; saranapa udde ma'arantinna maddatingngu matannallo umattupa. 18Napawe buatte natatamba, mawae ete esakka ara'e wawine ṛinone mandeno, arawe itarua sidutu ma'arantinna maddatingngu matannallo umattupa.
19Sangkatou wawine apan niarantannu radda'u wawine, i tou ma'arantinna al᷊annune pitu allo. Isai-sai apan nangindingnga si tou mabbal᷊i ma'arantinna maddatingngu matannallo umattupa. 20Al᷊awo'a apan niaiananne ara'e niatiil᷊annu wawine su al᷊o'engngu i tou niarantannu radda'u wawine mabbal᷊i ma'arantinna. 21-23Isa-sai apan nangindingnga tampa apan buatte niatiil᷊anna ara'e niaianannu wawine tantal᷊anna niarantannu radda'u wawine, ṛinone mabbansalla laungnge wuṛṛu mandeno, wuṛṛu i tou ma'arantinna maddatingngu matannallo umattupa. 24Amungkangngu sangkatou esakka natatamban wawine apan tantal᷊anna pia radda'u wawine, esakka udde lai mabbal᷊i ma'arantinna al᷊annune pitu allo, wuṛṛu suapan tampa atatiil᷊anne apan niatiil᷊anne lai mabbal᷊i ma'arantinna.
25Amungkangngu sangkatou wawine niamatannu daṛṛa al᷊annune manga pira allo su liuddu pia radda'u wawine, ara'e amamattu daṛṛa udde tawe matta'alla napawe rada'u wawine nal᷊iudde, i tou ma'arantinna su al᷊annune i tou a'amatannu daṛṛa udde ere lai su tempo i tou pia radda'u wawine. 26Tampa apan niatiil᷊anne ara'e niaiananne su tempo udde, mabbal᷊i ma'arantinna. 27Isai-sai apan nangindingnga tampa udde, lai mabbal᷊i ma'arantinna. I tou ṛinone mabbansalla laungnge wuṛṛu mandeno, wuṛṛu i tou ma'arantinna maddatingngu matannallo umattupa. 28Napawe sasabbangngu daṛṛa udde naddote, wawine udde ṛinone mallaṛṛaddo al᷊annune pitu allo lai. Wakkute udde i tou nawaresite. 29Su allo aual᷊une i tou ṛinone mangapiddu darua manu'a merpati saṛṛen tumuwo ara'e bakiangnga saṛṛen tumuwo ringannu imam su saruannu ngaran Dasannu Mawu. 30Manu'a sambau ṛinone ionggola maola'a sasamba aampungnga rosa, wuṛṛu sambau lai maola'a sasamba itattambunna. Ringannu olangnge udde imam na'ola'a lal᷊aghun pamamaresi wawine udde su saruannu Mawu.
31 Mawu nandolokki Musa mapaanaungnga walahannu Israel tadea'u manutukka su tempo ereapa i mangitou ma'arantinna wuṛṛu su tempo ereapa tawe, tadea'u i mangitou tawe ma'arantinna Rasanna Mawu apan addone su pattangngannu paddasananni mangitou. Amungkangngu i mangitou na'ola'a Rasanna udde ma'arantinna, ne i mangitou sarun mate.
32Etearoddi manga atoranna su ola'u esakka apan sasabbangngu nana ana waugu radda'u esakka ara'e asabbangngu sari'a, 33su ola'u wawine apan pia radda'u wawine, wuṛṛu su ola'u esakka apan natatamba ringannu wawine apan tantal᷊anna pia radda'u wawine.
Currently Selected:
IMAMATTA 15: LAITLD
Highlight
Share
Copy
Want to have your highlights saved across all your devices? Sign up or sign in
