IMAMATTA 14

Lal᷊aghun pamamaresi napawe napiate wuassu radda'a pisi apan maata'utta

1-2 Mawu nangonggola si Musa manga atoranna indi su ola'u lal᷊aghun pamamaresi napawe napiate wuassu radda'a pisi apan ma'ata'utta. Su allo udde taumata udde sarun iapasingkatta waresi, i tou ṛinone iapidda ringannu imam, 3wuṛṛu imam mangapidda watukku liuddu paddasananna. Amungkangngu tumuṛṛuttu i tou namarikissa taumata udde napiate, 4imam mandolokki tou mangapiddu darua manu'u winalanganna apan ta'e wiakka wuṛṛu tawe ipappalli, ringannu sampoto alu cemara, sambua tal᷊i maṛṛamu wuṛṛu sandanna hisop. 5Manu'a samba'u ṛinone pototanna su urinna leta'a apan lal᷊oṛṛoannu ua'e waresi wuassu al᷊imatan kua'e. 6Manu'a sambau lai ringannu alu cemara, tal᷊i maṛṛamu wuṛṛu sandanna hisop ṛinone iammo sulal᷊ummu daṛṛan manu'u winalanganna apan buatte nipototta. 7Imam mangalassu daṛṛan manu'u winalanganna udde paapitu su taumata apan napiate, wuṛṛu namasingkatta i tou waresite. Ana see manu'u winalanganna apan ta'e wiakka ṛinone ipallossa su wadda'a. 8Wua'udde taumata udde ṛinone mabbansalla laungnge, mallungukka anambon utangnge, wuṛṛu mandeno. Ne nawaresite i tou, wuṛṛu wotongngete sumutta sulal᷊ummu paddasananna, arawe al᷊annune pitu allo lai i tou taambe wotongnge sumutta sulal᷊ummu rasanne sassane. 9Su allo appitune i tou ṛinone mallunggukka anambon utangnge, wuṛṛu omengnge, angkarimme wuṛṛu anambon waṛṛabbissa su awangnge. Ana see i tou ṛinone mabbansalla laungnge wuṛṛu mandeno. Wua'udde i tou nawaresite.

10Su allo aual᷊une taumata udde ṛinone mangapiddu darua ana'u domba esakka wuṛṛu sambau ana'u domba wawine uukke santonna, apan sambau-sambau tawe sangkulle. Wal᷊ine wua'isudde lai tatallu su kilone taponna apan buatte nilo'annu lanan zaitun wuṛṛu sepertiga su literene lanan zaitun. 11Ana see imam ṛinone mangapiddi tou suadio'a ringannu sasambane udde su saruannu ngaran Dasanna Mawu. 12Imam ṛinone manganu sambau ana'u domba esakka wuṛṛu sepertiga su literene lanan zaitun maola'a sasamba lal᷊anna'a arugianna, wuṛṛu ionggola maola'a sasamba iatogokka su Mawu. 13Ana'u domba udde ṛinone pototanni tou su tampa apan buatte niṛṛae pamototanna winatangnga maola'a sasamba aampungnga rosa wuṛṛu sasamba itattambunna. Domba udde ṛinone pototanna isudde ana waugu sasamba lal᷊anna'a arugianna wuṛṛu sasamba aampungnga rosa uddewe lembon susi wuṛṛu udde maola'a wageangngu imam. 14Imam ṛinone manganu addio'a daṛṛan ana'u domba ana see iwuṛṛa su tal᷊inga aikkatanna, wuṛṛu su inangngu tal᷊imaddo lima aikkatanna wuṛṛu su inangngu tal᷊imaddon ledda aikatannu taumata apan sarun iapasingkatta waresi. 15Wua'udde imam manganu addio'a lanan zaitun wuṛṛu nilal᷊inna su pal᷊addu limane aiṛṛi sassane. 16Napawe i tou buatte nangammon tal᷊imaddo aikatanne sulal᷊ummu lana, wuṛṛu nangalassa paapitu sulal᷊ummu Rasannu Mawu. 17Ana see addio'a lana su limane ṛinone iwuṛṛa su manga tampa apan buatte niwuṛṛannu daṛṛa eteudde su tal᷊inga aikatanna, su inangngu tal᷊imaddo lima aikkatanna, wuṛṛu su inangngu tal᷊imaddo ledda aikkatanna su taumata apan iapasingkatta waresite. 18Lana lambene ṛinone ilal᷊inna su wowon puan taumata udde. Ringannu aroddi imam ma'ola'a lal᷊aghu pangangukkassa su taumata udde su saruannu Mawu.

19Wua'udde imam ṛinone mangonggolu sasamba ipangampungnga rosa tadea'u taumata apan ma'arantinna udde mabbal᷊i waresi. Wua'udde i tou ṛinone mamototta winatangnga maola'a sasamba itattambunna 20wuṛṛu mangonggola suadio'a ringannu sasamba ia'imbe au wowon mezbah. Ringannu aroddi imam ma'ola'a lal᷊aghun pamamaresi su taumata udde, wuṛṛu i tou nabbal᷊ite waresi.

21Amungkangngu taumata udde asiangnga wuṛṛu tawe addapanne, ne su sasamba lal᷊anna'a arugianna i tou wotongnge mangapiddu sambau ana'u domba esakka maola'a sasamba itoggokka su Mawu. Wal᷊ine wua'udde lai sangkilo taponna lo'annu lanan zaitun maola'a sasamba ia'imbe, wuṛṛu mal᷊oara ahewabbal᷊anne lanan zaitun. 22I tou lai ṛinone mangapiddu darua manu'a merpati saṛṛen tumuwo ara'e bakiangnga saṛṛen tumuwo; sambau maola'a sasamba ipangampunga rosa wuṛṛu sambau lai maola'a sasamba itattambunna. 23Anambon sasamba udde ṛinone iapiddi tou ringannu imam su saruannu ngaran Dasanna Mawu su allo aual᷊une lal᷊aghun pamamaresi watanganne. 24Imam nanganu ana'u domba wuṛṛu lanan zaitun udde wuṛṛu nionggola maola'a sasamba iatoggokka su Mawu, wuṛṛu udde maola'a wageangngu imam. 25Ana see imam ṛinone mamototta ana'u domba udde ana see addio'a daṛṛane iwuṛṛa su tal᷊inga aikkatanna, inangngu tal᷊imaddo aikkatanna wuṛṛu inangngu tal᷊imaddon ledda aikkatannu taumata apan sarun iapasingkatta waresi. 26Imam ṛinone mallal᷊innu addio'a lana su pal᷊addu limane aiṛṛi 27wuṛṛu ringannu tal᷊imaddon lima aikkatanne i tou mangalassu lana udde paapitu sulal᷊ummu Rasanna Mawu. 28Ana see addio'a lana apan su limane ṛinone iwuṛṛa su manga tampa apan buatte niwuṛṛannu daṛṛa, eteudde su tal᷊inga aikkatanna, inangngu tal᷊imaddo lima aikkatanna wuṛṛu inangngu tal᷊imaddon ledda aikkatannu taumata apan sarun iapasingkatta waresite. 29Lana lambene ṛinone ilal᷊inna su puan taumata udde maola'a lal᷊aghun pamamaresi watanganne su saruannu Mawu.

30Wua'udde imam ṛinone mangonggolu sambau manu'a merpati wuṛṛu bakiangnga saṛṛen tumuwo 31maola'a sasamba ipangampungnga rosa, wuṛṛu sambau waine maola'a sasamba itattambunna suadio'a sasamba ia'imbene. Ringannu aroddi imam na'ola'a lal᷊aghun pamamaresi taumata udde su saruannu Mawu.

32Eteudde atoranna su ola'u lal᷊aghun pamamaresi napawe buatte namendamma radda'a pisi apan ma'ata'utta su taumata apan tawe addapanne.

Ṛenessa su wal᷊en

33 Mawu nangonggola si Musa wuṛṛu si Harun 34manga atoranna su ola'u wal᷊en apan nial᷊iuannu ṛenessa apan lullewa. Manga atoranna niapaamatta napawe walahannu Israel sumuttate su Kanaan, wanua apan nionggolu Mawu si mangitou. 35Isai-sai apan naasangkalla ṛenessa sulal᷊ummu wal᷊ene, ṛinone mamasingkattu olangnge udde su imam. 36Tantal᷊anna imam taambe nirumanta mamarikissa ṛenessa udde, i tou ṛinone mamarenta tadea'u sarangkanambone iapasabbangnga wuassu wal᷊en udde. Amungkangngu tawe, al᷊awo'u saranapa sulal᷊ummu wal᷊en udde mabbal᷊i ma'arantinna. Ana see imam ṛinone rumanta 37mamarikissa ṛenessa udde. Amungkangngu pia titi'a ua'elomma ara'e uaṛṛamutta apan aellehanna ere ola'u nalinna su darandungnga, 38imam ṛinone manantangngu wal᷊en udde wuṛṛu iwala uapal᷊e al᷊annune pitu allo. 39Su allo appitune i tou ṛinone rumanta wuṛṛu mamarikissa apia. Amungkangngu ṛenessa udde tawe nilumewa, 40-41i tou ṛinone mamarenta tadea'u manga watun darandunga apan naṛṛenessa udde ihohakka wuṛṛu darandunga wageangngu lal᷊umme iisanna. Plesterene asan nii'issa wuṛṛu manga watu udde ṛinone iramme su sambau tampa apan ma'arantinna su liudde soa. 42Ana see manga watu apan niapasabbangnga udde ṛinone hantiannu manga watu wakku. Ahewallu darandungngu wal᷊en udde ṛinone pilesteranna wakku.

43Amungkangngu ṛenessa udde nilumapputa apia, sumbal᷊i watu manga wal᷊en udde buatte nihantianna wuṛṛu manga darandunge buatte nii'issa wuṛṛu nipilestere apia, 44ne imam ṛinone rumanta wuṛṛu mamarikissa wal᷊en udde apia. Amungkangngu ṛenessa udde atonna nilumewa, ne wal᷊en udde ma'arantinna 45wuṛṛu ṛinone ihohakka. Manga watu, manga alu wuṛṛu ahewallu pilestere ṛinone iapidda watukku tampa ma'arantinna su liuddu soa. 46Sal᷊immurine isai-sai apan sumutta sulal᷊ummu wal᷊en udde mabbal᷊i ma'arantinna maddatingngu matannallo umatuppa. 47Isai-sai apan matiilla ara'e umanna su wal᷊en udde ṛinone mabbasansalla laungnge.

48Arawe amungkangngu imam rumanta wuṛṛu tumuṛṛuttu parikissi tou tawe nilumatto ṛenessa apia napawe wal᷊en udde buatte nipilestere apia, i tou ṛinone mamasingkatta wal᷊en udde waresi, ana waugu ṛenessa sarangkanambone nawul᷊ite. 49Su ipamaresi wal᷊en, imam ṛinone manganu darua manu'u winalanganna, alu cemara, tal᷊i maṛṛamu wuṛṛu sandanna hisop. 50Manu'u winalanganna sambau ṛinone pototanna su urinna lal᷊oṛṛoannu ua'e wakku wuassu al᷊imatan kua'e. 51Ana see alu cemara, tal᷊i maṛṛamu, hisop wuṛṛu manu'u winalanganna apan ta'e wiakka ṛinone iammo sulal᷊ummu daṛṛan manu'u winalanganna apan buatte nipototta wuṛṛu sulal᷊ummu ua'e wakku. Wua'udde wal᷊en udde ṛinone wokkanna paapitu. 52-53Manu'u winalanganna apan ta'e wiakka ṛinone ipallossa su wadda'a su liuddu soa. Ringannu aroddi imam na'ola'a lal᷊aghun pamamaresi wal᷊en, wuṛṛu wal᷊en udde nabbal᷊ite waresi.

54Eteudde manga atoranna su ola'u radda'u pisi apan ma'ata'utta, 55-56su ola'u manga akke, pinsulla ara'e attiawu ara'e hanne su wadangnge, wuṛṛu su ola'u ṛenessa su laubba ara'e su wal᷊en. 57Manga atoranna udde hunane ipanantunna tanne saranapa udde waresi ara'e ma'arantinna.

Currently Selected:

IMAMATTA 14: LAITLD

Highlight

Copy