IMAMATTA 13
13
Atoranna su ola'u radda'u pisi apan ma'atautta
1 Mawu nangonggolu manga parenta indi si Musa wuṛṛu si Harun; 2Amungkangngu pia sangkatou uatahuanna haṛṛuatta, ara'e pinsulla ara'e attiawu su pisine apan botongnge maaola'a radda'u pisi apan ma'ata'utta, i tou ṛinone iapidda ringannu imam papapulunni Harun. 3Imam ṛinone mamarikissa wageangnge mataddu'a su pisin taumata udde. Amungkangngu waṛṛabbissa apan uatuwo su wageangnge udde mabbal᷊ite mawira, wuṛṛu wageangnge apan mataddu'a asiloanna mallal᷊umanna wuassu pisi isudde, taumata udde maradda'a pisi apan maata'utta. Imam ṛinone mamasingkatta manungku taumata udde ma'arantinna. 4Arawe amungkangngu wageangnge apan mataddu'a udde mawira wuṛṛu tawe mal᷊al᷊umma wuassu wageangngu pisi isudde, wuṛṛu waṛṛabissa su wageangnge udde tawe nabbal᷊i mawira, taumata udde ṛinone iṛṛae al᷊annune pitu allo. 5Su allo appitune, imam ṛinone mamarikissa si tou apia. Wuṛṛu amungkangngu tumuṛṛuttu addapanne radda'a udde ta'e aroddi wuṛṛu tawe nilumewa, taumata udde ṛinone iṛṛae pitu allo al᷊annune apia. 6Su allo appitune imam ṛinone mamarkissa si tou apia, wuṛṛu amungkangngu wageangnge apan maradda'a udde mal᷊abbukke wuṛṛu tawe nilumewa, imam ṛinone mamasingkatta manungku taumata udde waresi. Udde radda'u pisi apan tawe maata'utta. Taumata udde ṛinone mabbansalla laungnge wuṛṛu i tou nabbal᷊ite waresi. 7Arawe amungkangngu napawe buatte niapasingkattu imam manungku radda'u taumata udde tawe maal᷊iu, i tou ṛinone sumaruanna apia su imam. 8Imam ṛinone mamarikissa apia, wuṛṛu amungkangngu raddange ma'al᷊iu, taumata udde pasingkatta ma'arantinna; i tou uatahuanna radda'u pisi apan ma'ata'utta.
9Sangkatou apan maradda'a pisi apan ma'ata'utta ṛinone iapidda ringannu imam. 10Amungkangngu tumuṛṛuttu parikissu imam su pisin taumata udde pia haṛṛuatta mawira apan nabbal᷊i pinsulla wuṛṛu waṛṛabbissa su wageangnge udde nabbal᷊i mawira, 11taumata udde uatahuanna radda'a pisi apan ma'ata'utta. Imam ṛinone mamasingkatta manungku taumata udde maradda'a. I tou salaiwe tawe iṛṛae, ana waugu natualage manungku i tou ma'arantinna. 12Amungkangngu imam naasilo manungku attiawu udde nilumewate wuassu pua naddatingngu ledda, 13wuṛṛu tumuṛṛuttu parikissi tou manungku radda'a udde nilumewate su ahewallu wadangnga wuṛṛu ahewallu pisine nabbal᷊ite mawira, taumata udde iapasingkatta waresi. 14Arawe amungkangngu nilumapputa ibbongnga imam ṛinone mamarikissa apia. 15Amungkangngu udde ibbongnga, taumata udde ṛinone ipasingkatta ma'arantinna, ana waugu uatahuanna radda'a pisi apan ma'ata'utta. 16Arawe amungkangngu ibbongnga udde napia wuṛṛu nabbal᷊i mawira apia, taumata udde ṛinone sumaruanna imam 17maiparikissa apia. Amungkangngu ibongnga udde nabbal᷊ite mawira, imam mamasingkatta manungku taumata udde waresite.
18Amungkangngu sangkatou pia pinsulla apan napiate, 19arawe su lannangnge tinumuwo ninsulla mawira ara'e attiawu uaṛṛamutta, taumata udde ṛinone sumaruanna imam 20maiparikissa. Amungkangngu attiawu aellehanna mallal᷊umanna wuassu pisi isudde wuṛṛu waṛṛabbisa su wageangnge udde nabbal᷊ite mawira lai, imam ṛinone mamasingkatta taumata udde ma'arantinna. Pinsulla udde panattaṛṛannu radda'a apan ma'ata'utta. 21Arawe amungkangngu tumuṛṛuttu parikissu imam waṛṛabissa su wageangnge udde tawe nabbal᷊i mawira, wuṛṛu wageangnge udde tawe mallal᷊umanna wuassu pisi maranine, tumba'u i tou mabbiranna, taumata udde ṛinone iṛṛae pitu allo al᷊annune. 22Amungkangngu attiawu udde nilumewa, imam ṛinone mamasingkatta taumata udde ma'arantinna ana waugu i tou uapendamma radda'a pisi apan ma'ata'utta. 23Arawe amungkangngu attiawu udde tawe nawal᷊u wuṛṛu tawe lai nilumewa, udde tumba'u lanna'u pinsulla, ne taumata udde iapasingkatta waresi.
24Amungkangngu sangkatou nal᷊essa ana waugu nal᷊oso, ana see pisi su lessa udde nabbal᷊i mawira ara'e mawira uaṛṛamutta, 25imam ṛinone mamarikissa si tou. Amungkangngu waṛṛabissa su wageangnge udde nabbal᷊i mawira wuṛṛu lessane mallal᷊umanna wuassu pisi maranine, ne radda'u pisi apan ma'ata'utta nal᷊iute su lessa nal᷊oso udde, wuṛṛu imam ṛinone mamasingkatta manungku taumata udde ma'arantinna. 26Arawe amungkangngu waṛṛabbisa su tampa udde tawe naola'a mawira wuṛṛu wageangnge udde tawe mallal᷊umanna wuassu pisi maranine, tumba'u ere ola'u wakku lihidde, ne taumata udde ṛinone iṛṛae al᷊annune pitu allo. 27Su allo appitune imam ṛinone mamarikissa si tou apia. Amungkangngu attiawu mawira udde lullewate, ne taumata udde uapendamma radda'a su pisi apan ma'ata'utta, wuṛṛu ṛinone iapasingkatta ma'arantinna. 28Arawe amungkangngu attiawu mawira udde tawe mawal᷊u wuṛṛu tawe lumewa, tumba'u i tou mabbiranna, udde wal᷊inewe radda'u pisi apan ma'ata'utta. Imam ṛinone mamasingkatta manungku taumata udde waresi, ana waugu mawira udde tumba'u lanna'u lessa nal᷊oso.
29Amungkangngu sangkatou esakka ara'e wawine uapendamma radda'u pisi su puane ara'e su ol᷊ane, 30i tou ṛinone parikisannu imam. Amungkangngu wageangnge apan maradda'a udde ellehanna mallal᷊umanna wuassu pisi maranine, wuṛṛu uta'a ara'e omengnga su wageangnge udde nabbal᷊i maririkka ana see nasawutta, ne taumata udde pia radda'a pisi apan ma'arantinna wuṛṛu ṛinone iapasingkatta ma'arantinna. 31Amungkangngu tumuṛṛuttu parikissu imam wageangnge apan maradda'a udde asiloanna tawe mallal᷊umanna wuassu pisi maranine, arawe tawe uta'a wuṛṛu omengnga apan mapia su wageangnge udde, taumata udde ṛinone iṛṛae al᷊annune pitu allo. 32Su allo appitune, imam ṛinone mamarikissa apia wageangnge apan maradda'a, wuṛṛu amungkangngu radda'a udde tawe nilumewa ana see tawe uta'a ara'e omengnga apan maririkka su wageangnge udde, ana see lai aellehanna tawe mallal᷊umanna wuassu pisi maranine, 33taumata udde ṛinone mangiṛṛi uta'a ara'e omengnga su wageangnge apan marada'a udde. Ana see i tou ṛinone iṛṛae apia al᷊annune pitu allo. 34Su allo appitune, imam ṛinone mamarikissa apia. Amungkangngu raddangnge tawe nilumewa wuṛṛu wageangnge udde ellehanna tawe mallal᷊umanna wuassu pisi maranine, taumata udde waresi, wuṛṛu ṛinone mabbansalla laungnge. 35Arawe amungkangngu buatte niapasingkatta waresi ana see raddangnge nilumewa, 36imam ṛinone mamarikissa apia. Amungkangngu radda'a udde nilumewate, imam salaiwe lasa'e mamarikissa tanne uta'a ara'e omengngu taumata udde nabbal᷊ite maririkka, ana waugu natualage manungku i tou ma'arantinna. 37Arawe amungkangngu tumuṛṛuttu addapattu imam raddangnge udde tawe lumewa, wuṛṛu tinumuwo uta'a ara'e omengnga apan mapia su tampa udde, ne radda'a udde napiate, wuṛṛu imam ṛinone mamasingkatta manungku i tou waresi.
38Amungkangngu sangkatou esakka ara'e wawine pia attiawu mawira su pisine, 39imam ṛinone mamarikissa taumata udde. Amungkangngu attiawu udde ellehanna ere ola'u mawira mal᷊abbukka, i tou tumba'u nial᷊iuannu akke, wuṛṛu iapasingkatta waresi.
40-41Amungkangngu sangkatou esakka nabbal᷊i lol᷊okka su wageangngu liudde wuṛṛu saruannu puane, lol᷊okka udde tawe ma'arantinna si tou. 42Arawe amungkangngu nilumatto hoggo'a mawira uaṛṛamutta su lol᷊okka udde, i tou pia radda'a su pisi apan ma'ata'utta. 43Imam ṛinone mamarikissa taumata udde, wuṛṛu amungkangngu atonna pia hoggo'a mawira uaṛṛamutta, 44imam ṛinone mamasingkatta manungku i tou ma'arantinna ana waugu uapendamma radda'u pisi apan ma'ata'utta su puane.
45Sangkatou apan uapendamma radda'a pisi apan ma'ata'utta, ṛinone malluṛṛen laubba nahahesa'a wuṛṛu mamalan utangnge nassal᷊iwukka. I tou ṛinone mallindumma hatine al᷊iu wowane wuṛṛu mangngintul᷊i, “Ma'arantinna! Ma'arantinna!” 46Su al᷊annune uatataṛṛangnga radda'a udde i tou ma'arantinna wuṛṛu ṛinone matana'a su liuddu paddasananna, marau wuassu manga taumata waine.
Atoranna su ola'u maṛṛenessa
47Amungkangngu niasombanganna ṛenessa su laubba ara'e mal᷊aṛṛenessa wuassu wol ara'e linen, 48ara'e su pisi ara'e sarangkanambone apan niola'a wuassu pisi, 49wuṛṛu kaluren ṛenessa udde ua'elomma ara'e uaṛṛamutta, ne ṛenessa udde ma'al᷊iu wuṛṛu ṛinone iapasilo su imam. 50Imam ṛinone mamarikissa saranapa udde, ana see iṛṛae al᷊annune pitu allo. 51Su allo appitune i tou ṛinone mamarikissa apia, wuṛṛu amungkangngu ṛenessa udde nahewalle, saranapa udde ma'arantinna. 52Imam ṛinone manambunnu saranapa udde, ana ṛenessa udde maal᷊iu, nariaddi ṛinone itambunna su putungnga.
53Arawe amungkangngu tumuṛṛuttu parikissu imam ṛenessa udde tawe maal᷊iu su saranapa udde, 54i tou mandolokka tadea'u saranapa udde ukkasanna wuṛṛu iṛṛae al᷊annune pitu allo lai. 55Ana see imam ṛinone mamarikissa apia. Amungkangngu ṛenessa udde tawe nilumewa wuṛṛu kalurene sidutu uasul᷊ungnga, saranapa udde ta'e ma'arantinna wuṛṛu ṛinone itambunna, salaiwe ṛenessa udde tumba'u su wageangngu saruanne ara'e su liudde. 56Arawe amungkangngu tumuṛṛuttu parikissu imam ṛenessa udde nabbal᷊ite mal᷊abbukka, wageangnge apan naṛṛenessa wuassu mal᷊aṛṛenessa ara'e pisi ṛinone hesaanna. 57Amungkangngu i tou nilumatto apia, ne ṛenessa udde lumewa, wuṛṛu tatahuanne ṛinone manambunnu saranapa udde. 58Amungkangngu buatte niukkassa kaluren ṛenessa su saranapa udde nawul᷊i, ne saranapa udde ṛinone ukkasanna apia, wakkute udde i tou ellehanna waresite.
59Etearoddi manga atoranna su ola'u ṛenessa su laubba ara'e mal᷊aṛṛenessa wuassu linen ara'e wol, ara'e saranapa apan niola'a wuassi pisi.
Currently Selected:
IMAMATTA 13: LAITLD
Highlight
Share
Copy
Want to have your highlights saved across all your devices? Sign up or sign in
