IMAMATTA 12
12
Lal᷊aghun mapaaukassu wawine napawe buatte nangunsiwe
1 Mawu nangonggolu manga atoranna indi si Musa 2su hunawalahannu Israel. Amungkangngu sangkatou wawine manungkangngu ana'a esakka, ne al᷊annune pitu allo wawine udde ma'arantinna ere lai su tempo i tou tantal᷊anna aamatannu radda'u wawine. 3Su allo aual᷊une anangnge ṛinone sunatanna. 4Napawe nal᷊iudde tallu pul᷊o tallu su allone lai wawine udde sidutu ma'arantinna ana waugu ta'e a'amatannu daṛṛa. I tou tawe wotongnge mangindingnga manga saranapa apan ipappaatta ipattaṛṛamawu wuṛṛu tawe wotongnge sumutta su Rasanna Mawu ma'oman sara tempo i tou maola'a susi.
5Amungkangngu sangkatou wawine nanungkangngu ana'a wawine, ne al᷊annu mapul᷊o appata su allone wawine udde ma'arantin, ere lai su tempo i tou pia radda'u wawine. Napawe nal᷊iudde annummu pul᷊o annumma su allone lai wawine udde sidutu ma'arantinna ana waugu ta'e a'amatannu daṛṛa. 6Napawe nal᷊iudde tempone i tou na'ukkassa, mawae ana waugu buatte nanungkangnga ana'a esakka ara'e wawine, wawine udde ṛinone mangapiddu sasamba su imam su saruannu ngaran Dasanna Mawu. Sasamba udde erenai sambau ana'u domba uukke santonna maola'a sasamba itattambunna, wuṛṛu sambau manu'a merpati saṛṛen tumuwo ara'e bakiangnga saṛṛen tumuwo maola'a sasamba ipangampungnga rosa. 7Imam ṛinone manantillu sasambane su Mawu wuṛṛu ma'ola'a lal᷊aghun ipamapassa rosan bawine udde, ma'oman sara i tou mabbal᷊i waresi. Nariaddi eteudde apan manarannu sangkatou wawine napawe i tou buatte nanungkangnga.
8Amungkangngu wawine udde tawe maasaddia sambau ana'u domba, i tou ṛinone mangapiddu ruan bau manu'a merpati saṛṛen tumuwo ara'e bakiangnga saṛṛen tumuwo; sambau maola'a sasamba itattambunna wuṛṛu sambau lai maola'a sasamba ipangampungnga rosa. Imam ṛinone ma'ola'a lal᷊aghun ipamappassa rosan bawine udde, ne i tou nabbal᷊ite waresi.
Currently Selected:
IMAMATTA 12: LAITLD
Highlight
Share
Copy
Want to have your highlights saved across all your devices? Sign up or sign in
