PANDARIADDI 18
18
Mawu Ruata na'iren sangkatou ana'a esakka si Abraham
1 Mawu naipasilon batangan-Ne si Abraham marani manga aaluanna pia taṛṛinone tampan patataṛṛamawuanna su Mamre. Su allo udde paddissa mapal᷊atta, wuṛṛu i Abraham tantal᷊anna ua'ianna su ngaran rasanne. 2Napawe i tou tinumaggeka, i tou naasilo siri tallu taumata uarisikka su saruanne. I Abraham apiddu dirumarisikka inai manal᷊oho si mangitou. Ringannu niumal᷊intudda 3i tou nabbisara, “Manga Tuangnga, arie sumabbi rasangku ringannu tawe umotongnga asuene; wala'ewe i ya'u mangimbe manga Tuangnga. 4Wala'ewe i ya'u manganu ua'e ipangukkassa ledda manga Tuangnga. Ringannu addata wette manga Mawu pangillol᷊ote su al᷊ungngu alu indi. 5I ya'u sarun mangimben anna addio'a, tadea'u manga Tuangnga maasomba atatohassa wakku i panassukku amatanna. Manga Tuangnga buatte nangaddatta si ya'u ringannu niumotongnga su wal᷊en allangngu indi.”
Sasimbakki mangitou, “Tarimakase su apapianu indi, i yami sarun umotongnga.”
6I Abraham nasasaṛṛawutta sinumutta sulal᷊ummu rasanne wuṛṛu nabbisara si Sara, “Paasaṛṛawutta manganu taponna sangkaronga apan apianne, wuṛṛu pa'ola'e roti mal᷊imbulunna.” 7Wua'udde i tou tinumal᷊angnga su tampan ammul᷊annu winatangnge, namile ana'u sapi atawanne see lai masi'ome ṛemene, ana see nionggolla su allangnge, lapiddu nilaha. 8Wua'udde i Abraham nanganu susu, susu paarorone, wuṛṛu ṛemessa apan buatte nilaha udde, ana see nisaru su manga rahone. Tantal᷊anna i mangitou u'anna, i Abraham sassane mangngimbe si mangitou su al᷊ungngu alu udde.
9Wua'udde i mangitou naiwal᷊o, “Suapa i Sara, awingngu?”
“Poiaroddi sulal᷊ummu rasanna,” sasimbakki Abraham.
10Sangkatou su wallati mangitou nabbisara, “Ete sio wul᷊anna lai ya'u sarun mabelengnga isindi. Wuṛṛu su tempo udde i Sara awingngu sarun maasomba ana'a esakka.”
Su tempo udde i Sara tantal᷊anna uararingikka su ngaran rasanna, su liuddu raho udde. 11Su tempo udde i Abraham wuṛṛu i Sara timmadete atonna, wuṛṛu i Sara nattite radda'u wawine. 12Ana waugu udde i Sara nilumage sulal᷊ummu naungnge wuṛṛu nabbisara, “I ya'u apan timmadete wuṛṛu lomete indi, ereapa wotongnge ta'e matatamban awingku? – wuṛṛu awingku lai timmadete.”
13Ana see Mawu naiwal᷊o si Abraham, “Anio i Sara nilumagge wuṛṛu uapapaddua apa i tou ta'e wotongnge manungkangngu ana'a su tempo i tou timmadete? 14Apa piadu sambau apan maatiangnga su Mawu? Ere buatte niwisara'u tanginna, sio wul᷊anna lai ya'u sarun mabelengnga isindi. Wuṛṛu su tempo udde i Sara sarun manungkangngu ana'a esakka.”
15Ana waugu udde i Sara nata'utta, i tou nassinaadda, unni tou, “I ya'u tawe nilumage.”
Arawe Mawu sinumimbakka, “I'o nilumage atonna tanginna.”
I Abraham naddorongnga aampungngu soa Sodom
16Wua'udde niumamatte siri tallu raho udde niuntuddi Abraham. Ana see i mangitou na'omate su sambau tampa apan wua' issude i mangitou wotongnge maasilo Sodom. 17Mawu nabbisara sulal᷊ummu naungnga, “I Ya'u tawe mangadapingnga si Abraham apa apan sarun Ta'u olaanna. 18Wal᷊inewe papapulunne apan sarun maola'a balahama apan wahewalla wuṛṛu uataṛṛino? Walinetoe ete ana waugu i tou anambon balahama su runia sarun Ta'u al᷊amatanna? 19I tou buatte Ta'u nipile tadea'u mamarenta al᷊aṛṛanangnge wuṛṛu papapulunne tadea'u tumuṛṛutta si Ya'u wuṛṛu ma'ola'a inolaanna mapia wuṛṛu matul᷊idda. Amungkangngu olange udde olaanni mangitou, al᷊awo'u pa'aire-U si Abraham sarun Ta'u tipusanna.”
20Wua'udde Mawu nabbisara si Abraham, “Pia aalae apan wahewalla su Sodom wuṛṛu Gomora, wuṛṛu atonna paddarosa mangitou tumaniten manambo. 21Ana waugu udde i Ya'u inai sumossokka poiaroddi mamarikassa tanne anambon aalae apan niaringiṛṛang-Ku udde atonna ara'e tawe.”
22Ana see ruan katou su wallatu manga raho udde inaite watukku Sodom, arawe Mawu ta'e uatana'a ringanni Abraham. 23I Abraham nangundani Mawu wuṛṛu naiwal᷊o, “Atonnate Mawu mamate taumata apan tawe sal᷊ane suadio'a ringannu taumata apan pia sal᷊ane? 24Unnu wisara pia siri liman pul᷊o su atoune apan tawe sal᷊ane sulal᷊ummu soa udde, apa ahewallu soa udde sarun ṛimunsaannu Mawu? Apa Mawu tawe mangampungnga tadea'u siri liman pul᷊o udde masal᷊amatta? 25Ariewe manga taumata apan tawe sal᷊ane udde pateanna suadio'a ringannu taumata pia sal᷊ane. Arie Mawu! Ana waugu amungkangngu udde olaannu Mawu, taumata apan tawe sal᷊ane sarun iṛṛuumanna suadio'a ringannu taumata nassal᷊a. Tawe mariaddi mallaruungngu ul᷊ilin pati'uppa makkungnga tawe su atatul᷊idda!”
26 Mawu nabbisara, “Unnu wisara i Ya'u naasomba siri liman pul᷊o su atoune tawe sal᷊ane su Sodom, sarun Ta'u ampunganna soa udde ana waugu i mangitou.”
27I Abraham nabbisara apia, “Ampungewe awawaṛṛani'u manassukku hatto'u indi, Mawu. I ya'u indi tumba'u taumata, tawe su tampane mangapiddu sambau hatto. 28Arawe asinungka tumba'u pia appatu pul᷊o l᷊ima su atoune apan tawe sal᷊ane, wuṛṛu wal᷊ine liman pul᷊o. Apa Mawu sarun mamate ahewallu soa udde tumba'u ana waugu paṛṛalane siri liman wedane tumbau limang katou?”
Mawu nabbisara, “Soa udde tawe Ta'u ṛimunsaanna unnu wisara poiaroddi Ta'u asombanganna appatu pul᷊o l᷊ima su atoune apan tawe sal᷊ane.”
29I Abraham nabbisara apia, “Ereapa amungkangngu tumba'u pia appatu pul᷊o su atoune?”
Mawu sinumimbakka, “Ana waugu appatu pul᷊o udde tawe mariaddi pandumang-Ku.”
30I Abraham nabbisara, “Arie masa'u, Mawu, amungkangngu i ya'u mabbisara apia. Ereapa unnu wiasara tumba'u pia tallun pul᷊o su atoune?”
Mawu nabbisara, “Amungkangngu i Ya'u naasomba sire tallun pul᷊o su atoune, Ta'u isoṛṛotta pandumang-Ku.”
31I Abraham nabbisara, “Ampungewe awawaṛṛani'u manassukku hatto'u indi, Mawu. Unnu wisara tumba'u pia siri ruan pul᷊o?”
Mawu sinumimbakka, “Amungkangngu i Ya'u naasomba siri ruan pul᷊o su atoune, soa udde tawe Ta'u ṛimunsaanna.”
32Panginsueanne i Abraham nabbisara, “Ariewe paasa'u, Mawu, i ya'u ete paassa lai mabbisara. Ereapa amungkangngu tumba'u pia siri mapul᷊o su atoune?”
Mawu nabbisara, “Amungkangngu pia siri mapul᷊o apan tawe sal᷊ane, i Ya'u tawe maṛṛimunsa'a soa udde.” 33Napawe buatte naggahatton Abraham, Mawu inaite, wuṛṛu i Abraham napul᷊ete watukku wal᷊ene.
Currently Selected:
PANDARIADDI 18: LAITLD
Highlight
Share
Copy
Want to have your highlights saved across all your devices? Sign up or sign in
