PANDARIADDI 17
17
Sunatta maola'a tatialan pa'aire
1Napawe i Abram uukke sioten pul᷊o sio su tonnane, Mawu naipasilon batanganne si tou wuṛṛu nabbisara, “Ete i Ya'u Ruata Apan Lembontaṛṛino. Paatuṛṛutte si Ya'u wuṛṛu sidutu pa'ola'e apulu-U. 2I Ya'u sarun ma'ola'a pa'aire ringannu wuṛṛu mangonggolla si'o papapulunna apan manambo.” 3Ana see niumal᷊intuddate i Abram, wua'udde Ruata nabbisara, 4-5“Ete indi pa'aire apan i Ya'u olaanna si'o; i Ya'u maddiandi manungku i'o sarun maola'a yamangngu al᷊amonan anambon balahanna. Ana waugu udde arannu waline i Abram, ewe'e i Abraham. 6I Ya'u sarun mangonggolla si'o, manambo ana'a papapulunna, wuṛṛu su wallatti mangitou sarun piaddu maola'a manga ratu. Papapulunne sarun mabbal᷊i aroddi anambone, ma'oman sara i mangitou maola'a manga balahanna.
7I Ya'u sarun manipussa paaire-U si'o wuṛṛu su papapulunnu, uasasansunna, wuṛṛu paaire udde tawe panguddusanne. I Ya'u sarun maola'a Ruatanu wuṛṛu Ruatan papapulunnu. 8I Ya'u sarun mangonggolla si'o wuṛṛu su papapulunnu, leta'a indi, apan orassa indi wawanuannu ere sangkatou taumata raho. Ahewallu leta'u Kanaan sarun maola'a pussa'an papapulunnu saran mal᷊annu-l᷊annu wuṛṛu i Ya'u sarun maola'a Ruata mangitou.”
9Ruata nabbisara apia si Abraham, “I'o lai ṛinone matuṛṛutta su paaire indi, mawae i'o ara'e lai papapulunnu mallal᷊isansunna. 10I'o wuṛṛu anambon papapulunnu esakka ṛinone sunatanna. 11-12Manattakka wuassu orassa indi i'o ṛinone mapasunattu ana'a esakka maradio'a uukke ual᷊u allo, nasutta lai manga allangnga apan nisungkangnga su wal᷊enu ara'e niawalliannu. Sunatta udde sarun maola'a tatiala wuassu paaire-U wuṛṛu i yamiu. 13Suapan taumata ṛinone sunatanna, wuṛṛu udde sarun maola'a tatiala su wadangnga apan mapaal᷊iatta'a manungku paaire-U ringannu udde tawe pangudusanne. 14Suapan taumata esakka apan tawe nisunatta tate lai mareengnga al᷊aṛṛana-U ana waugu i tou tawe uaaggassa pa'aire udde.”
15Wua'udde Ruata nabbisara si Abraham, “Ariete i'o mamago awingngu i Sarai; manattakka orassa indi aranne i Sara. 16I Ya'u sarun mangal᷊amatta si tou wuṛṛu i tou sarun manungkangngu sangkatou ana'a esakka apan sarun Ta'u ionggolla si'o. Ore, i Ya'u sarun mangal᷊amatta si Sara, wuṛṛu i tou sarun maola'a inangngu al᷊amonan manga balahanna. Su wallatu manga papapulunne sarun piaddu maola'a manga ratu.”
17Ana see i Abraham niumal᷊intudda, arawe i tou nilumage napawe naṛṛingidda, “Ereapa wotongnge sangkatou esakka apan uuke maṛṛasutte su tonnane indi maasomba ana'a? Ereapa wotongnge i Sara mangunsiwe su uukka siom pul᷊o su tonnane?” 18Ana see i tou nabbisarate Ruata, “Mappianne ete i Ismael maola'a pussa'an darotongku.”
19Arawe Ruata nabbisara, “Tawe, i Sara awingngu sarun manungkangngu ana'a esakka wuṛṛu aranne sarun isagonu i Ishak. I Ya'u sidutu uaagassa paaire-U su ana'a udde wuṛṛu ringannu papapulunne saran mal᷊annu-l᷊annu. Pa'aire udde tawe pangudusanne. 20Arawe i Ya'u mangutungngu darorongngu su ola'i Ismael. Ana wugu ude i tou Ta'u al᷊amatanna wuṛṛu Ta'u onggol᷊annu papapulunna apan manambo. I tou sarun maola'a al᷊amona mapul᷊o dua piaṛṛa'u ṛuanganna, wuṛṛu papapulunne sarun Ta'u olaana sambau balahanna apan bahewalla. 21Arawe pa'aire-U ia'ukka ringanni Ishak, anangngu apan sarun isungkangngi Sara, tonna su hati iraṛṛangngo tempone ere indi.” 22Napawe nuddusse nabbisara aroddi, Ruata nanantangngi Abraham.
23Su allo udde lai, i Abraham naddaringikka Ruata wuṛṛu nanunatta si Ismael anangnge, wuṛṛu anambon esakka sulal᷊ummu wal᷊ene, manga allangnga apan niasungkangnga sulal᷊ummu wal᷊ene aroddi lai apan niawallianne. 24I Abraham uukke sion pul᷊o sio su tonnane su tempo i tou nisunatta 25wuṛṛu i Ismael anangnge, uukke mapul᷊o tallu su tonnane. 26I mangitou nisunatta su allo apan uasul᷊ungnga, 27suadio'a ringannu anambon allangngi Abraham.
Currently Selected:
PANDARIADDI 17: LAITLD
Highlight
Share
Copy
Want to have your highlights saved across all your devices? Sign up or sign in
