SASABANGNGA 9

Winatangnga papadul᷊iananna nate

1 Mawu nabbisara si Musa, “Roote sumaruanna ratu, wuṛṛu wal᷊oa'a si tou manungku Mawu, Ruata taumatan Ibrani, nabbisara; ‘Wala'awe manga al᷊aṛṛana-U inai tadea'u i mangitou wotongnge mattaṛṛamawu si ya'u. 2Amungkangngu i'o maddiri mamallossi mangitou, 3I Ya'u sarun mandantan sa'itta apan bahewalla su anambon binatangngi i yamiu papadul᷊inanna, kuda, keledai, unta, sapi, domba wuṛṛu ambingngi yamiu. 4I Ya'u sarun maṛṛaen binatangngu taumatan Israel wuṛṛu winatangngu taumata Mesir. Wuṛṛu winatangngu taumatan Israel tawe saran sambau apan mate. 5I Ya'u, Mawu, nanantunnu allo tiṛṛabbi ipanipussu olangnge udde.’ ”

6Su allo tiṛṛabbi Mawu na'ola'a ere buatte nipasingkan-Ne. Anambon binatangngu walahannu Mesir nate, arawe wuassu winatangngu walahannu Israel taweddu nate. 7Ratu naiwal᷊o apa apan buatte nariaddi, ana see niwatti'a si tou manungku winatangngu taumatan Israel tawe saran sambau nate. Arawe ratu sidutu naungnge maattikka wuṛṛu maddiri mamallossu walahanna udde mapul᷊e.

Radda'a pinsulla

8 Mawu nabbisara si Musa wuṛṛu si Harun, “Panganute manga pira kangkuma awu wuassu pananutunganna. Su saruannu ratu, i Musa ṛinone manal᷊iawukku awu udde watukku winalanganna. 9Ne awu udde sarun massal᷊iawukka su ahewallu leta'u Mesir. Su taumata wuṛṛu su winatangnga awu sarun mapaasabangngu manga pinsulla apan mapesanga mabbal᷊i lessa pia nanane.” 10Ana see i Musa wuṛṛu i Harun nanganute awu wuṛṛu sinumaruante ratu. I Musa nangalassu awu udde su winalanganna. Su taumata wuṛṛu winatangnga nilumappute manga pinsulla apan napesanga wuṛṛu nabbal᷊i lessa apan pia nanane. 11Manga taṛṛa wal᷊iimata tawe mapanalare si Musa ana waugu ahewallu wadangngi mangitou napenen pinsulla ere manga taumata Mesir waine. 12Arawe Mawu na'ola'a ratu naungnge maattikka, wuṛṛu ere buatte niwal᷊o Mawu, ratu maddiri maddaringikka wisara i Musa ruan i Harun.

Uranna masunge

13 Mawu nabbisara si Musa, “Roote tiṛṛabbi marua allo maṛṛanggappa sumaruanna ratu wuṛṛu wal᷊oa'a si tou manungku Mawu, Ruatan Ibrani nabbisara; ‘Pallosa'a al᷊aṛṛana-U tadea'u i mangitou wotongnge inai mattaṛṛamawu si ya'u. 14Paasa indi i Ya'u sarun mandantan asasilaka tawe tumba'u su manga mammamanaran araratuanna wuṛṛu tumanangnge, arawe si'o lai, tadea'u i'o maasingkatta manungku i Ya'u tawe doappa su ahewallu runia indi. 15Unnu wisara i Ya'u ma'apulu makkuumannu wuṛṛu tumanangngu ringannu radda'a, i yamiu sarangkanambone natete. 16Arawe i yamiu Ta'u iwala wiakka, tadea'u i Ya'u wotongnge mapaal᷊iatta'u taṛṛino-U si'o, na'oman sara arang-Ku tinumelengke su ahewallu runia. 17Salaiwe aroddi, i'o ta'e lai mawunga, wuṛṛu maddiri mamalan al᷊aṛṛana-U inai mapul᷊e. 18Tiṛṛabbi marua allo, su tempo apan uasul᷊ungnga, i Ya'u sarun mandatan uranna masunge apan masadatta, ere taambe nariaddi su Mesir ro'en dorone naddatingngu orassa indi. 19Ne parentaite tadea'u anambon binatangnga wuṛṛu al᷊awo'u darotongngu apan su liudde apira'a su tampa amanna. Anambon taumata wuṛṛu winatangnga apan su liudde wuṛṛu tawe nattillindumma sarun mate aemaannu uranna masunge.’ ” 20Manga pira su wallatu mammamanaran araratuanna nata'uttu wisara Mawu. I mangitou uaapiddu manga allangnga wuṛṛu winatangngi mangitou sinumutta sulal᷊ummu wal᷊en tadea'u asirunganna. 21Arawe ingana'a waine tawe maddaringikka wawal᷊o udde wuṛṛu nanantangken manga allangnga wuṛṛu winatangngi mangitou su wadda'a.

22Ana see Mawu nabbisara si Musa, “Wattea'e ta'iakku ire'e, wuṛṛu uranna masunge sarun sumossokka su ahewallu leta'u Mesir. Uranna udde sarun maṛṛia'a su taumata, winatangnga wuṛṛu al᷊awo'u sinuananna su wailla.” 23I Musa namaten ta'iakke ire'e, wuṛṛu Mawu nanossokku rallu'a wuṛṛu uranna masunge, wuṛṛu sawallo mabeessa su runia. Mawu nandantan 24uranna masunge apan asadatanne ringannu sawallo uasasimbakka. Eteudde uranna masange apan lembon asadatanne sulal᷊ummu watti'u araratuannu Mesir. 25Su ahewallu runia uranna masunge udde namate sarangkanambone su wailla, nasutta taumata wuṛṛu winatangnga. Anambon sasuanna su wailla mangke nate wuṛṛu manga alune aoluanna naṛṛa'a. 26Tumba'u leta'u Gosyen, tampa tatanaannu taumatan Israel, tawe naemaannu uranna masunge.

27Ana see ratu namago si Musa wuṛṛu si Harun, wuṛṛu nabbisara, “I Ya'u narosate. Ete Mawu apan naṛṛino, i ya'u wuṛṛu tumana'u araratuangku buatte na'ola'a pasasal᷊a. 28Aal᷊iomatee su Mawu; yami mal᷊annute uatataṛṛangnga ana waugu rallu'a wuṛṛu uranna masunge indi. I Ya'u sarun mamallossi yamiu inai. I yamiu ariete pa'atana'a isindi lai.”

29Wisara i Musa su ratu, “Tawe mal᷊annu napawe i ya'u su liudden soa, i ya'u sarun mamatten lima umal᷊iomanna su Mawu. Rallu'a sarun umaddo wuṛṛu uranna masunge sarun mawaessa, tadea'u i Tuangku masingkatta manungku runia indi tatahuanannu Mawu. 30Arawe i ya'u masingkatta manungku i Tuangku wuṛṛu manga mammamanaran araratuanna taambe lai mata'uttu Ruata.”

31Sasuanna rami wuṛṛu jelai nal᷊al᷊eo, ana waugu rami tantal᷊anna mabbanti, wuṛṛu jelai tantal᷊anna mabbua. 32Arawe gandumma wuṛṛu wua pia batune tawe nal᷊al᷊eo ana waugu tambe tempone mabbua.

33Ana see i Musa nanantangngu ratu wuṛṛu inaite watukku liuddu soa; poiaroddi i tou namatten ta'iakke umal᷊iomanna su Mawu. Orassa udde lai naddote rallu'a, uranna masunge wuṛṛu uranna. 34Napawe ratu naasilo sarangkanambone apan buatte nariaddi, i tou narosate apia. I tou wuṛṛu manga mammamanaran araratuanne sidutu maattikka naungnge. 35Ere buatte niwal᷊o Mawu si Musa, ratu maddiri mamalan taumatan Israel inai mapul᷊e.

Currently Selected:

SASABANGNGA 9: LAITLD

Highlight

Copy