SASABANGNGA 5
5
I Musa wuṛṛu i Harun sinumaruanna ratu Mesir
1Wua'udde i Musa wuṛṛu i Harun inaite sinumaruanna ratu Mesir wuṛṛu nabbisara, “Arendi parenta Mawu, Ruatan Israel, ‘Walaawe walahang-Ku sumabangnga tadea'u i mangitou wotongnge mattaṛṛamawu si Ya'u su wadda'a lol᷊okka.’ ”
2“Isai Mawu udde?” aiwal᷊on datu. “Anio i ya'u mangaddata si Tou wuṛṛu mamalan balahannu Israel mapul᷊e? I Ya'u wagga Mawu udde, wuṛṛu taumatan Israel tawe ta'u iwala mapul᷊e.”
3I Musa wuṛṛu i Harun nabbisara, “Ruatan taumatan Ibrani buatte naipasilon batangan-Ne si yami. Wala'awe yami inai su wadda'a araune tallu allo amatanna tadea'u mangonggolu sasamba su Mawu, Ruatang kami. Amungkangngu yami tawe mallaghun udde, yami sarun patean-Ne ringannu radda'a ara'e pangalo.”
4Unnu ratu si Musa wuṛṛu si Harun, “Anio i yamiu ma'ola'a manga taumata udde mammanara manara mangitou? Doloṛṛa'e manga allangnga udde mammanara! 5Manga taumata udde tumaniten manambo reenganne. Wuṛṛu orassa indi yamiu ma'apulu tadea'u i mangitou mangillol᷊o mammanara!”
6Allo udde lai manga mandariaga taumata Mesir wuṛṛu manga mandore taumatan Israel naasomba parenta wuassu Mawu, 7“Ariete lai mangonggolu laṛṛami su balahanna udde ipa'ola'a tela. Wala'e i mangitou maddea'a sassane. 8Arawe i mangitou doloṛṛa'e ma'ola'a manga tela apan manambo wuassu niolangnge tempo nal᷊iu. I mangitou tumba'u ma'apulu tawe mammanara; ana waugu udde i mangitou sidutu sussamboṛṛe tadea'u irolokka inai mangonggolu sasamba su Ruata mangitou. 9Wata'a'e manga taumata udde mammanara lembon maṛṛimadda, tadea'u i mangitou sidutu mammanara wuṛṛu tawe tempone maddaringikka manga watti'a awusu.”
10Manga mandariaga taumata Mesir wuṛṛu manga mandore taumatan Israel udde sinumabbangnga ana see nabbisara su manga taumatan Israel, “Ratu namarenta tadea'u i yamiu tate onggol᷊annu laṛṛami. 11I yamiu ṛinone maddea'a sassane su al᷊awo'u tampa, arawe paanaunge, manga tela apan niola'i yamiu tawe wotongnge matul᷊u wuassu tempo nal᷊iu.” 12Ne manga taumatan Israel inaite mammal᷊intaddu ahewallu leta'u Mesir madea'a mangammulu laṛṛami. 13Manga mandariaga sidutu mammata'a tadea'u allo-allo i mangitou ma'ola'a tela anambone ere lai su tempo i mangitou ta'e a'onggol᷊annu laṛṛami. 14Manga mandariaga udde nanggesekka manga mandore taumatan Israel apan nirolokka niapariaga mamanara. I mangitou naiwal᷊o, “Anio orassa indi balahannu tate maaola'a tela anambone ere dorone?”
15Ana see manga mandoren Israel inaite sinumaruanna ratu wuṛṛu sinumal᷊ande, “Anio i Tuangnga na'ola'a arendi si yami? 16Yami tawe nionggol᷊annu laṛṛami, arawe niwata'a ma'ola'a tela! Orassa indi yami nipuulla wutte'e ete manga mamanatan Tuangnga apan nassal᷊a!”
17Ratu sinumimbakka, “I yamiu wolo'a atonna wuṛṛu maddiri mamanara. Ana waugu udde i yamiu madorongnga si ya'u tadea'u inai mangonggolu sasamba su mawunu. 18Roote pammanara apia. I yamiu tawe onggol᷊annu laṛṛami, arawe i yamiu sidutu pa'ola'a tela apan uasul᷊ungnga anambone.” 19Manga mandore udde naatutukke manungku i mangitou sulal᷊ummu asasusa napawe nipasingkatanna manungku manga taumatan Israel ṛinone ma'ola'a tela apan anambone ere allo nangkal᷊iu.
20Su tempo i mangitou sinumabbangnga wuassu wal᷊en araratuanna, i mangitou nassomban Musa wuṛṛu i Harun apan tantal᷊anna uaṛṛaddo si mangitou. 21Unnu manga mandore udde, “Mawu masingkattu inolaannu! I Tou sarun makkuumanni raddua! Ete iraddua apan naaola'a si yami nipadantinnu ratu wuṛṛu manga mamanarane, na'oman sara i mangitou mamate si yami.”
I Musa sinumal᷊ande Mawu
22Ana see i Musa sinumaruante Mawu apia wuṛṛu nabbisara, “Mawu, anio walahannu pabbalagu Israel niolang-Ngu aroddi al᷊aleone udde? Anio I'o nandolo'u isindi? 23Ro'en i ya'u sinumaruanna ratu wuṛṛu nabbisara sulal᷊ummu aran-Nu, i tou mannattake mandal᷊eo balahanna indi. Wuṛṛu I'o mangke mal᷊anna-l᷊annaba tawe umontolla si mangitou.” 24Ana see Mawu nabbisara si Musa, “Orassa indi i'o sarun maasilo ereapa i Ya'u sarun ma'inolaanna ratu. I tou sarun Ta'u iwata'a mamallossu walahang-Ku. Mangke atonna i tou sarun Ta'u iwata'a mallimbuakka si mangitou wuassu wanua indi.”
Currently Selected:
SASABANGNGA 5: LAITLD
Highlight
Share
Copy
Want to have your highlights saved across all your devices? Sign up or sign in
