SASABANGNGA 4
4
Ruata nangonggola si Musa taṛṛino ipa'ola'a al᷊aṛṛindu'a
1Ana see i Musa sinumimbakka Mawu, “Arawe ereapate amungkangngu unnu wisara manga taumatan Israel tawe mangimanna wuṛṛu maddiri tumuṛṛutta manga wisara'u? Apa ṛinone ta'u olaanna unnu wisara i mangitou mabbisara manungku Mawu tawe naipasilon batangan-Ne si ya'u?”
2 Mawu naiwal᷊o si Musa, “Apa udde aagasannu?” I Musa sinumimbakka, “Ta'inna.”
3Unnu Mawu, “Lomboa'a udde su leta'a.” I Musa nallombon ta'inna udde, ana see ta'inna udde nawal᷊u nabali atoanna wuṛṛu i Musa tinumal᷊angnga nangindau. 4Mawu nabbisara si Musa, “Undanie atoanna udde, wuṛṛu aggassa tol᷊ene.” I Musa nangundani wuṛṛu nanametta atoanna udde apan apiddu nawal᷊u nabbal᷊i ta'inna su ta'iakki Musa. 5Unnu Mawu, “Pa'ola'e aroddi tadea'u manga taumatan Israel mangimanna manungku i Ya'u, Mawu, Ruata iupungngu al᷊amona mangitou, Ruatan Abraham, Ishak wuṛṛu Yakub, buatte naipasilon batangan-Ne si'o.”
6 Mawu nabbisara apia si Musa, “Sutta'e limanu sulal᷊ummu laungngu.” I Musa tinumuṛṛutta, wuṛṛu napawe i tou napasabangngu limane, lima udde mawira atonna ana waugu naṛṛinoannu radda'a su pisi apan maata'utta. 7Ana see Mawu nabbisara, “Sutta'e limane apia sulal᷊ummu laungngu.” I Musa tinumuṛṛutta, wuṛṛu napawe i tou napasabangnga apia, limane udde napiate. 8Unnu Mawu, “Amungkangngu i mangitou maddiri mangimanna si'o, ara'e tawe mangimanna napawe buatte na'ala'a al᷊aṛṛindu'a paarorone, ne al᷊aṛṛindu'a indi sarun ma'ola'a si mangitou mangimanna. 9Amungkangngu i mangitou ta'e lai maddiri mangimanna si'o salaiwe buatte naasilo al᷊aṛṛindu'a darua indi, wuṛṛu i mangitou madiri maddaringikka manga wisaranu, panganu ua'e addio'a wuassu Sal᷊ukku Nil wuṛṛu lal᷊ina'a su leta'a. Ua'e udde sarun mawal᷊u mabal᷊i daṛṛa.”
10Arawe i Musa nabbisara, “Oh, Mawu, i ya'u wal᷊inewe taumata pande masinaukka, mawae ete dorone aroddi lai orassa indi, napawe Mawu buatte nabbisara si ya'u. Lila'u mawakkata, mabbisara mal᷊iwue wuṛṛu tawe masaṛṛawutta.”
11 Mawu nabbisara si tou, “Isai apan nagonggolu moṛṛongnga su taumata? Isai apan na'ola'a si tou mou ara'e wengella? Isai na'ola'a si tou alla ara'e wuta? Wal᷊inewe i Ya'u, Mawu? 12Orassa indi, roote, i Ya'u sarun mantul᷊ungngu mabbisara wuṛṛu mangaṛṛa'u sarangkanambone apan ṛinone iwisaranu.”
13Arawe i Musa sinumimbakka, “I Ya'u sumal᷊ande, ariete pandolo'u, oh Mawu, pandolokken taumata waine.”
14Ana see Mawu nabbal᷊i nasa'u si Musa wuṛṛu nabbisara, “Wal᷊inewe i'o pia tuṛṛangnga aranne i Harun? I Ya'u masingkatta i tou pande massinaukka. I tou orassa indi sulal᷊ummu amatanna inawarendi, wuṛṛu i tou sarun mal᷊uassa massombanu. 15Paggahattoten tou wuṛṛu wal᷊oa'a si tou apa apan ṛinone iwisarane. I Ya'u sarun mantul᷊ungngi raddua wuṛṛu mangaṛṛa'u apa apan ṛinone iwisara wuṛṛu olaanni raddua. 16I tou ṛinone mabbisara ringannu arannu su saruannu tumanangnge. I tou sarun maola'a mabbawisaranu wuṛṛu i'o ellehanni tou ere Ruata apan mammasingkattu apa apan ṛinone iwisaran tou. 17Apira'e ta'inna indi, i'o sarun ma'ola'a manga al᷊aṛṛindua'a ringannu ta'inna udde.”
I Musa nabelengnga watukku Mesir
18Wua'udde i Musa napul᷊ete watukku wal᷊en Yitro, iamangnga la'iananne, wuṛṛu nabbisara si tou, “Walaawe i ya'u mabelengnga su Mesir mattembo manga tuṛṛangku wuṛṛu ma'ellega tanne i mangitou ta'e wiakka.” I Yitro nabbisara si Musa, “Roote ringannu sal᷊amatta.”
19Su tempo i Musa ta'e su leta'u Midian, Mawu nabbisara si tou, “Pabelengke su Mesir. Anambon taumata apan ma'apulu mamate si'o natete.” 20Ne i Musa nangahete awingnge wuṛṛu manga anangnge wuṛṛu nalluranni mangitou su keledai ana see i mangitou suadio'a inaite watukku Mesir. Wuassu parenta Mawu, i Musa lai nangapiddu ta'inne.
21 Mawu nabbisara si Musa, “I Ya'u buatte nangonggolu taṛṛino si'o ipa'ola'a manga al᷊aṛṛindu'a. Nariaddi amungkangngu i'o nabelengke su Mesir, ola'e manga al᷊aṛṛindu'a udde su saruannu ratu Mesir. Arawe i Ya'u sarun ma'ola'a si tou maatikka puane, na'oman sara i tou maddiri mamalan balahanna udde mangingkatta. 22Ana see wal᷊oa'e su ratu udde manungku i Ya'u, Mawu, nananata arendi; ‘Israel uddewe ana'U pahul᷊une, 23wuṛṛu i'o buatte Ta'u nirolokka mamalan ana'U udde inai tadea'u i tou wotongnge mattaṛṛamawu si Ya'u, arawe i'o nanol᷊a'a. Orassa indi i Ya'u sarun mamate anangngu pahul᷊une.’ ”
24Su sambau tampan paddasananna sulal᷊ummu amatanna udde, Mawu nirumanta ringanni Musa wuṛṛu mappulu mamate si tou. 25I Zipora, awingnge, nanganu sambau watu maṛṛoro wuṛṛu namototta pentakku pamamanuan anangnge, ana see nieṛṛetta su ledda Musa. Unni Zipora, “I'o awing daṛṛa'u.” 26Olangnge udde nipasingkanne ana waugu lal᷊aghun sunatta. Ne Mawu tate nariaddi namate si Musa.
27Tantal᷊anna udde Mawu nabbisara si Harun, “Roote watukku wadda'a lol᷊okka paisasomba Musa.” I Harun inaite ana see nassombaten tuarine su wowone na'ukkassa, wuṛṛu nangari'a si tou. 28I Musa nabbati'a si Harun anambon bisara Mawu si tou su tempo i tou nirolokka apia watukku Mesir, wuṛṛu lai anambon al᷊aṛṛindu'a apan sarun olaanne. 29Wua'udde i Musa ruan Harun inaite watukku Mesir, wuṛṛu nangammulu anambon piaṛṛa'u Israel. 30I Harun namasingkatta si mangitou sarangkanambone apan niwisara Mawu si Musa, wuṛṛu i Musa na'ola'a anambon al᷊aṛṛindu'a su saruannu manga taumata udde. 31Ne i mangitou nangimante, wuṛṛu napawe i mangitou naaringikka manungku Mawu buatte na'ellega walahannu Israel wuṛṛu na'ellega al᷊awo'u asasusa mangitou, i mangitou niumal᷊intudda nassubba.
Currently Selected:
SASABANGNGA 4: LAITLD
Highlight
Share
Copy
Want to have your highlights saved across all your devices? Sign up or sign in
