SASABANGNGA 37
37
Na'ola'a Wantallu Paaire
(Sab. 25:10-22)
1I Bezaleel na'ola'a Wantallu Pa'aire wuassu alu akasia, al᷊o'engnge 110 sentimetere, al᷊alakke wuṛṛu atanggakke sambau-sambau 66 sentimetere. 2Wageangngu lal᷊umme wuṛṛu liudde nioosannu wul᷊awanna tutune, ana see niolaanna wingkene wul᷊awanna uapal᷊iwutta. 3Wua'udde i tou na'ola'a appata hal᷊angnga wul᷊awanna su alu papasannane wuṛṛu nipase su appatu leddan bantalla udde, hal᷊angnga darua suapan sandiṛṛanne. 4I tou lai na'ola'a papasannane wuassu alu akasia, wuṛṛu nioosannu wul᷊awanna, 5ana see alu papasannane udde nisuṛṛi su hal᷊angnga suapan sandiṛṛannu wantalla udde. 6Wua'udde i tou lai na'ola'a lal᷊uubbe wuassu wul᷊awanna tutune, al᷊o'engnge 110 sentimetere wuṛṛu al᷊alakke 66 sentimetere. 7I tou na'ola'a lai darua mala'ekatta wuassu wul᷊awanna nisassala, 8sambau niaddo suapan pentakku lal᷊uubbe udde. Mala'ekatta darua udde niṛṛaiddu lal᷊uubbe 9wuṛṛu niola'a uasasaruanna, ringannu papaidde uati'akka uataappa lal᷊uubu wantalla udde.
Na'ola'a meddan doti ia'imbe
(Sab. 25:23-30)
10I Bezaleel na'ola'a medda wuassu alu akasia, al᷊o'engnge 88 sentimetere, al᷊alakke 44 sentimetere wuṛṛu atanggakke 66 sentimetere. 11Medda udde nioosannu wul᷊awanna tutune wuṛṛu nipal᷊iwutannu wingke wul᷊awanna. 12Ana see i tou na'ola'a wiwikku medda al᷊alakke 7,5 sentimetere. Wiwikke udde niolaana wingke wul᷊awanna uapal᷊iwutta. 13I tou lai na'ola'a appata hal᷊angnga su alu papasannane wuṛṛu nisuṛṛi su wuune appata wuassu leddan medda. 14Hal᷊angnga ipanaṛṛangnga alu papasannane nisuṛṛi maranin biwikku medda. 15Papasannane udde niola'a wuassu alu akasia wuṛṛu nioosanu wul᷊awanna. 16I tou lai na'ola'a manga lama'a, manga halasi, wensadda wuṛṛu manga pangadoannu sasamba ua'e anggore. Anambon asasuungngu medda udde niolangnge wuassu wul᷊awanna tutune.
Na'ola'a leddan sol᷊o
(Sab. 25:31-40)
17I Bezaleel na'ola'a leddan sol᷊o wuassu wul᷊awanna tutune. Apampakke wuṛṛu pangagasanne niola'a wuassu wul᷊awanna nisassalla. Manga wunga lal᷊ogakke, nasutta lal᷊uwone wuṛṛu wantine niṛṛaiddu pangagasanne.
18Su pangagasanne udde niola'a annumma pengane, tatalu pengane suapan sandiṛṛanne. 19Suapan pengane sambau niolaanna lal᷊ogakke tatallu wunga badam ringannu lal᷊uwone wuṛṛu wantine. 20Su pangagasanne na'ola'a lalogakke appata wunga badam ringannu lal᷊uwone wuṛṛu wantine. 21Su al᷊ungngu suapan sampare pengane udde na'ola'a sambau lal᷊uwo. 22Leddan sol᷊o sarangkanambone udde ringannu manga lal᷊uwo wuṛṛu manga rannane niola'a wuassu sangkabuwu wul᷊awanna tutune apan nisassala. 23Su leddan sol᷊o udde niolangnge pitu sol᷊o ringannu bawaresi sumbun sol᷊o wuṛṛu pangadoanne wuassu wul᷊awanna tutune. 24Su ipa'ola'a leddan sol᷊o wuṛṛu manga saranapane pappandumanna 35 su kilone wul᷊awanna tutune.
Ma'ola'a mezbah tampan panutunganna amania
(Sab. 30:1-5)
25I Bezaleel na'ola'a wuassu alu akasia sambau mezbah tampan panutunganna amania. Mezbah udde saṛṛene uataṛṛa wu'u appata; al᷊o'engnge wuṛṛu al᷊alakke sambau-sambau 45 sentimetere. Su wuune appata al᷊iu rosone niola'a tatandua apan niṛṛaiddu mezbah udde. 26Wageangnge al᷊iu rosone, su sandiṛṛanne appata wuṛṛu manga tatandu'a nioossu wul᷊awanna tutune wuṛṛu niolaanna wingkene wul᷊awanna uapal᷊iwutta. 27I tou lai na'ola'a darua hal᷊angnga su al᷊ungngu darua wingke wul᷊awanna su sandiṛṛanne darua ipanaṛṛangnga alu papasannu mezbah udde. 28Papasanna udde niola'a wuassu alu akasia wuṛṛu nioosannu wul᷊awanna.
Ma'ola'a lanan lal᷊aghu wuṛṛu amania
(Sab. 30:22-38)
29I Bezaleel lai na'ola'a lanan lal᷊aghu wuṛṛu amania tutune apan mawangngi, nipallalo'a naal᷊ihidda lana mawangngi.
Currently Selected:
SASABANGNGA 37: LAITLD
Highlight
Share
Copy
Want to have your highlights saved across all your devices? Sign up or sign in
