SASABANGNGA 38

Ma'ola'a mezbah sasamba itattambunna

(Sab. 27:1-8)

1I Bezaleel nanganu alu akasia, ana see i tou na'ola'a mezbah sasamba itattambunna. Mezbah udde saṛṛene uataṛṛa wu'u appata, al᷊o'engnge wuṛṛu al᷊alakke sambau-sambau 2,2 metere, wuṛṛu atanggake 1,3 metere. 2Su al᷊awo'u wuune al᷊iu rosone niolaanna tatandu'a apan uaṛṛaiddu mezbah udde. Sarangkahewalle nioosannu witu'a. 3I tou lai na'ola'a manga urinna, sikopo, manga mangko, manga porokka wuṛṛu tampan putungnga. Anambon saranapa udde niola'a wuassu witu'a. 4I tou lai nanganamma kawa wuassu witu'a apan niwa'issa su wageangngu mezbah al᷊iu wowane, atanggake mattangnga wuassu atanggakku mezbah. 5Ana see i tou na'ola'a appata hal᷊angnga su alu papasannane su wuune appata al᷊iu wowane. 6Alu papasannane udde niola'i tou wuassu alu akasia apan nioosannu witu'a. 7Ana see alu papasanna darua udde nisuṛṛi sulal᷊ummu manga hal᷊angnga su mezbah sandiṛṛanne ruan ba'a. Mezbah udde niolangnge wuassu pappala wuṛṛu wageangngu lal᷊umme pia loṛṛangnge.

Ma'ola'a tampan ua'e witu'a

(Sab. 30:18)

8I Bezaleel na'ola'a tampan ua'e witu'a ringannu apampakke witu'a. Witu'a udde wuassu manga saṛṛuminanna pussa'an manga wawine apan mangngimbe su ngaran Dasannu Mawu.

Rallakku Rasannu Mawu

(Sab. 27:9-19)

9I Bezaleel namaggala rallaku Rasannu Mawu ringannu senggota wuassu mal᷊aṛṛenessa linen al᷊ussa. Su samba'an timukka, al᷊o'engnge 44 metere, 10tataṛṛangannu ruan pul᷊o diṛṛi witu'a, sambau-sambau ringannu apampakke witu'a, ringannu aaitta wuṛṛu pangeleanne wuassu sal᷊a'a. 11Su samba'a sawannaka niola'a ereudde lai. 12Su samba'an baṛṛata niele senggota al᷊o'engnge 22 su meterene, ringannu mapul᷊o diṛṛi wuṛṛu mapul᷊o apampakke; aaitta wuwu sasampangnge niola'a wuassu sal᷊a'a. 13Su samba'an da'i, apan pia ngarane, al᷊alakku senggone 22 su meterene. 14-15Su aiṛṛi wuṛṛu aikatannu ngara udde nieleannu senggota, sambau-sambau al᷊o'engnge 6,6 su meterene, ringannu tatallu diṛṛi wuṛṛu tatallu apampakke. 16Anambon senggota uapal᷊iwutta rallaka udde niola'a wuassu mal᷊aṛṛenessa linen al᷊ussa. 17Apampakku manga diṛṛine niola'a wuassu witu'a, wuṛṛu aainne, sasampangnge wuṛṛu oto'u diṛṛine niola'a wuassu sal᷊a'a. Anambon diṛṛi su ahewallu rallaka udde nipasasampa'a ringannu aaitta sal᷊a'a. 18Pampele ngaran rallaka udde niola'a wuassu linen al᷊ussa apan niraddu'u wol ma'elomma, ungu wuṛṛu maṛṛamu wuṛṛu nilogaṛṛannu karawanga. Al᷊o'engnge sio metere wuṛṛu atanggake rua metere, nassul᷊ungngu senggotu rallaka. 19Pampele ngara udde tataṛṛangannu appata diṛṛi ringannu appata apampakke wuassu witu'a. Anambon aainne, lal᷊uubbu puidde wuṛṛu manga pangaitanne niola'a wuassu sal᷊a'a, 20arawe manga pati'annu Rasanna wuṛṛu tatandangnge niola'a wuassu witu'a.

Logamma apan nipaatta sulal᷊ummu Rasannu Mawu

21Eteindi arannu logamma apan nipaatta sulal᷊ummu Rasannu Mawu, tampan batu rarua ringannu Mapul᷊o Titan Duata udde sinahipunna. Manga aranna niola'a wuassu parentan i Musa wuṛṛu niatokku manga taumatan Lewi apan mammanara su al᷊ungngu piaṛṛa'i Itamar, ana'i Imam Harun.

22I Bezaleel ana'i Uri, pulunni Hur wuassu ṛuanganni Yehuda, na'ola'a sarangkanambone apan nirolokku Mawu. 23Mallal᷊al᷊imane, i Aholiab ana'i Ahisamakh wuassu ṛuanganni Dan, eteudde sangkatou pande manguitta, mallaṛṛiinna wuṛṛu mandaradu'u mal᷊aṛṛenessa linen al᷊ussa, see wol ma'elomma, ungu wuṛṛu maṛṛamu.

24Wul᷊awanna apan nionggola su Mawu nipa'ola'a Rasanna Susi sarangkanambone saṛṛiwu su kilone, nitimbangnga tumuṛṛuttu timbanganna apan ipappaatta su Rasannu Mawu. 25Sal᷊a'a apan niasombanganna wuassu pandare'engngu walahannu Israel anambone 3.430 su kilone nitimbangnga tumuṛṛuttu timbanganna apan ipappaatta su Rasannu Mawu. 26Reenganna udde uasul᷊ungngu apa apan buatte niwaeṛṛannu taumata apan nawoṛṛetta sulal᷊ummu sensus udde. Suapan taumata, mamaekka aregane apan buatte nitantunna, nitimbangnga tumuṛṛuttu timbanganna apan ipappaatta. Sulal᷊ummu sensus udde nawoṛṛetta 603.550 esakka uukke ruan pul᷊o su tonnane ire'e. 27Wuassu sal᷊a'a udde, 3.400 su kilone nipaatta pina'ola'a maṛṛasutta apampakku diṛṛin Dasannu Mawu wuṛṛu pampele ngarane. Suapan apampakke awakkanne 34 su kilone. 28Wuassu lamben sal᷊a'a udde, anambone 30 su kilone, i Bezaleel na'ola'a manga sasampangnge wuṛṛu manga aaittu manga diṛṛi, see lai lal᷊uubbu puiddu manga diṛṛi udde. 29Witu'a apan nionggola su Mawu sarangkanambone 2.425 su kilone. 30Witu'a udde nipaatta pina'ola'a apampakku ngaran Dasannu Mawu, mezbah ringannu kawa nianamma wuassu witu'a, anambon saranapan mezbah, 31apampakku senggota uapal᷊iwutta rallaka wuṛṛu ngaran pasallanganna, anambon pati'annu Rasanna ahewallu rallake.

Currently Selected:

SASABANGNGA 38: LAITLD

Highlight

Copy