SASABANGNGA 20

Mapul᷊o Tita

(Tah. 5:1-21)

1Ana see Ruata nabbisara, wuṛṛu indiwe manga wisara-Ne, 2“Ete i Ya'u Ruatanu apan nangapiddi yamiu sinumabbangnga wuassu Mesir su tampa i yamiu niallangnga.

3Imbaṛṛangnga masubba manga Mawu waine. Passubbate si Ya'u.

4Imbaṛṛangnga i'o ma'ola'a paal᷊uanna hun su batangannu apan lihidde ere roso su langitta, su runia ara'e sulal᷊ummu ua'e su al᷊ungngu runia. 5Imbaṛṛangnga massubba paal᷊uanna ere udde, ana waugu ete i Ya'u Ruatanu, wuṛṛu i Ya'u maddiri isul᷊ungngu sarangkanambone. Manga taumata apan maddanting-Ku, Ta'u iṛṛuumanna sara ṛawanna atallune wuṛṛu aiappanne. 6Arawe i Ya'u mapal᷊iatta'u darangngu-U su ṛiwune papapulunnu manga taumata marangngu si Ya'u wuṛṛu matuṛṛutta tita-U.

7Imbaṛṛangnga managon arang-Ku walate asagone, ana waugu i Ya'u, Ruatanu, makkuumanni sai-sai apan walate assagoneng arang-Ku.

8Laghua'awe allon Sabat wuṛṛu addate allo udde maola'a allo apan na'ukkassa. 9I yamiu Ta'u nionggol᷊annu annummu allo ipammanara, 10arawe allo appitune uddewe allo pangillol᷊oanna apan niṛṛae tumba'u hunane si Ya'u. Su allo udde tawe saran sangkatou apan botongnge mammanara, mawae i yamiu, ara'e lai manga anangngu, manga allangngu, winatangngu ara'e taumata raho apan uatana'a su wanuanu. 11Sulal᷊ummu tempo annummu allo, i Ya'u, Mawu, na'ola'a runia, langitta, tahal᷊oangnga, wuṛṛu al᷊awo'a sulal᷊umme, arawe su allo appitune i Ya'u nangillol᷊o. Ana waugu udde i Ya'u, Mawu, nangal᷊amatta allon Sabat wuṛṛu niṛṛae passubanna si Ya'u.

12Pangaddata iamangngu wuṛṛu inangngu, tadea'u i yamiu mabbiaka su lal᷊umanna'a wuṛṛu mabbiakka malannu su wanua apan sarun Ta'u ionggolla si yamiu.

13Imbaṛṛangnga mamate.

14Imbaṛṛangnga sumandaga.

15Imbaṛṛanganga manna'o.

16Imbaṛṛangnga mattiala awusu su ola'u taumata waine.

17Imbaṛṛangnga numemma darotongngu taumata waine, wal᷊ene, awingnge, manga allangnge, winatangnge, keledaine, ara'e sarangkanambone apan tatahuananne.”

Taumatan Israel matta'utta

(Tah. 5:22-33)

18Napawe manga taumata naaringikka rallu'a wuṛṛu tingikku trompeta, apiddu naasilo sawallo wuṛṛu wowone pia timbulla, i mangitou mangngiladda matta'utta wuṛṛu dirumarisikka marau-rau. 19Unni mangitou si Musa, “I'o pabbatti'a si yami, yami sarun maddaringikka; arawe ariewe Ruata mabbisara si yami, aṛṛengenne yami mate.”

20I Musa sinumimbakka, “Arie pa'ata'utta. Ruata dirumanta tumba'u manal᷊u'atta si yamiu tadea'u i yamiu sidutu matuṛṛutta, wuṛṛu tawe ma'ola'a rosa.” 21Arawe manga taumata udde sidutu uarisikka marau-rau, wuṛṛu tumba'u i Musa nangundannin winabbawa marandumma su tampan Duata nirumanta.

Atoranna su ola'u mezbah

22 Mawu namarenta si Musa iapaiwal᷊o su walahannu Israel, “I yamiu naasilote ereapa i Ya'u, Mawu, nabbisara si yamiu wuassu langitta. 23Imbaṛṛangnga aola'a su watangannu manga paal᷊uanna sal᷊a'a ara'e wul᷊awanna apan subbanni yamiu wal᷊ine wuassi Ya'u. 24I Ya'u ola'ete sambau mezbah waussu leta'a, ana see onggola'e isudde domba wuṛṛu sapinu maola'a sasamba itattambunna wuṛṛu sasamba paddarame. Su al᷊awo'u tampa apan buatte nitantunna si yamiu maola'a tampa patataṛṛamawuanna si Ya'u, i Ya'u sarun dumanta wuṛṛu mangal᷊amatta si yamiu. 25Amungkangngu i yamiu ma'ola'a si Ya'u sambau mezbah wuassu watu, imbaṛṛangnga olaanna wuassu watu nipaangnga, ana waugu amungkangngu i yamiu mappaattu papaangnga ipama'a watu, mezbah udde tate iapaatta si Ya'u. 26Imbaṛṛangnga maparisikku mezbah apan matanggakka na'oman sara ṛinone suma'e ringannu tuadda, tadea'u tawe asiloanna wageangngu wadangngu apan tawe ṛinone ellehanna.”

Currently Selected:

SASABANGNGA 20: LAITLD

Highlight

Copy