SASABANGNGA 21

Su ola'u mammarenta allangnga

(Tah. 15:12-18)

1Ana see Mawu nabbisara si Musa, “Onggol᷊a'e su manga taumatan Israel manga atoranna indi: 2Amungkangngu i yamiu mamalli sangkatou allangnga wuassu walahannu sassane, i tou ṛinone mammanara ringannu al᷊annune annummu tonna. Sul᷊alummu tonna appitune i tou ṛinone ipallossa wuṛṛu tate iapa'awaekka manga apa. 3Unnu wisara i tou ta'e umbasanna su tempo i tou naola'a allangngu, ne awingnge tawe wotongnge tumantalongnga su tempo i tou sumabbangnga. Arawe unnu wisara i tou buatte na'awingnga su tempo naola'a allangngu, awingnge wotongnge tumantalongnga suadio'a ringanni tou. 4Amungkangngu mawune nangawingngi tou ringannu sangkatou wawine, ana see i tou naasomba ana'a, ne awingnge wuṛṛu anangnge udde maola tatahuanannu mawune, wuṛṛu tawe wotongnge tumantalongngu allangnga udde su tempo i tou ipallossa. 5Arawe unnu wisara allangnga udde namasingkatta manungku i tou marangngu awingnge, manga anangnge, wuṛṛu mawune, wuṛṛu maddirite ipallossa, 6ne mawune ṛinone mangapiddi tou watukku tampa patataṛṛamawuanna. Poiaroddi allangnga udde irolokka rumarisikka uasaṛṛadda su ngara ara'e su diṛṛin ngaran patataṛṛamawuanna, wuṛṛu mawune ṛinone mamebbetta tal᷊ingan allangnga udde. Ne i tou sarun mabbal᷊i allangnge su al᷊o'engngu pabbiaṛṛanne.

7Amungkangngu sangkatou wawinen Ibrani niwal᷊u'u iamangnge maola'a allangnga, wawine udde tawe iapallossa napawe anumpe su tonnane, nariaddi uapapaṛṛalan allangnga esakka. 8Amungkangngu i tou tawe maal᷊uassa mawune apan pia naungnga ma'awingngi tou, ne i tou ṛinone iwal᷊u'a apia su hagurangnge. Wawine udde tawe wotongnge iwal᷊u'a su taumata raho, ana waugu i tou buatte niola'u mawune tawe su ṛinone apan tawe nanipussa paddariandine. 9Amungkangngu pia sangkatou mamalli allangnga wawine maola'a awingngu anangnge, allangnga wawine udde ṛinone olaanne naal᷊ihidda anangnge sassane. 10Amungkangngu ana'a esakka udde ma'awingnga apia, i tou sidutu mangonggollu wiakka wuṛṛu laubba see lai sarangkanambone ere buatte nionggola su awingnge paarorone. 11Amungkangngu i tou tawe manuungngu winabbawa udde, i tou ṛinone mamallossu awingnge udde ringannu tawe manengkamma roitta wawaekke.”

Atoranna su ola'u araṛṛagissa

12“Isai apan mamuulla taumata waine maddatingngu mate, ṛinone iṛṛuumanna pateanna. 13Arawe amungkangngu i tou namuulla ringannu tawe nipattatudda wuṛṛu tawe pandumma mamate, i tou wotongnge tumal᷊angngu watanganne su sambau tampa apan ta'u ita'e si'o, wuṛṛu poiaroddi i tou sarun maasomba tul᷊unganna. 14Arawe amungkangngu sangkatou masa'u wuṛṛu ringannu nipattatudda mamate taumata waine, wua'udde i tou tumal᷊angnga su mezba-U tadea'u maasomba tul᷊unganna, taumata udde ṛinone al᷊apanna wuassu mezbah wuṛṛu iṛṛuumanna pateanna.

15Isai apan namuulla iamangnge ara'e inangnge ṛinone iṛṛuumanna pateanna.

16Isai apan natal᷊angngu sangkatou taumata, ṛinone iṛṛuumanna pateanna, tanne taumata udde buatte niwal᷊ungnge ara'e ta'e su wal᷊ene.

17Isai apan mammontoga iamangnge ara'e inangnge, ṛinone iṛṛuumanna pateanna.

18Amungkangngu sulal᷊ummu pabbawawul᷊o pia sangkatou apan namuullu watu su taumata waine ara'e nango'a, arawe tawe namate si tou, i tou tawe iṛṛuumanna. Amungkangngu taumata apan nipuulla udde nawantingnga ana waugu nio'a, 19arawe wua'udde nararisikka wuṛṛu niumamatta apia ringannu ta'inna, taumata apan namuulla ṛinone mangundamma si tou ma'oman sara mapia wuṛṛu mamaekka su al᷊annune i tou maradda'a.

20Isai apan mamuulla allangnge esakka ara'e waawine na'oman sara allangnge udde nasal᷊a nate, ṛinone i tou iṛṛuumanna. 21Arawe amungkangngu allangnga udde tawe nate sulal᷊ummu massallo ara'e dua allo, mawune udde tawe iṛṛuumanna. Ararugi apan naṛṛia'a si tou ana waugu niawul᷊iannu allangnge udde maola'a sambau ṛuumanna si tou.

22Amungkangngu manga siri pira esakka tantal᷊anna uawawul᷊o wuṛṛu sangkatou suwallati mangitou piaddu naal᷊essa su sangkatou wawine pia illoṛṛone na'oman sara i tou nanawoanna, arawe tawe angngone su wageangnge waine, taumata udde ṛinone mamaekka denda anambone ere raddorongannu awingnge wuṛṛu asingkatannu manga mallaṛṛuungnga. 23Arawe amungkangngu wawine udde nasilaka lembon wahewalla, ne ṛuumannu al᷊al᷊eo udde eteudde niawa hantiannu niawa, 24mata hantiannu mata, isi hantiannu isi, ta'iakka hantiannu ta'iakka, ledda hantiannu ledda, 25lessa hantiannu lessa, lessa nal᷊oso hantiannu lessa nal᷊oso, hoggo'a hantiannu hoggo'a.

26Isai mamuulla mata allangnga ma'oman sara mawuta, ṛinone mamallossu allangnga udde maolaa'a wawaekku matane udde. 27Amungkangngu sangkatou mamuulla allangnge ma'oman sara mapaddi isine, i tou ṛinone mamallossu allangnga udde maola'a wawaekku isine udde.”

Manara manga taumata apan uatahuanna darotongnga

28“Amungkangngu pia sambau sapi esakka nanandu'a sangkatou taumata na'oman sara nate, sapi udde ṛinone pateanna ringannu tuntungannu watu, wuṛṛu ṛemenne tawe wotongnge inasanna, arawe tatahuanne tawe iṛṛuumanna. 29Amungkangngu sapi esakka udde anaramme mannandu'a, wuṛṛu tatahuanne buatte niapanaungnga, arawe tawe nallu'adda winatangnga udde, ana see amungkangngu sapi esakka udde nanandu'a sangkatou taumata naddatingngu nate, ne winatangnga udde ṛinone pateanna ringannu tuntungannu watu wuṛṛu tatahuanne lai ṛinone iṛṛuumanna pateanna 30Arawe amungkangngu tatahuannu sapi udde niwala mamaekka sal᷊ane, i tou ṛinone mamaekka anambone nassulungngu raddoronganna ipanubbussa niawane. 31Amungkangngu nate udde sangkatou ana'a esakka ara'e wawine, atoranna udde lai iappaatta. 32Amungkangngu niapate udde sangkatou allangnga esakka ara'e wawine, tatahuannu sapi ṛinone mamaekka tallun pul᷊o roitta sal᷊a'a su tatahuannu allangnga udde, wuṛṛu sapi esakka udde ṛinone tuntungannu watu ma'oman sara mate.

33Isai apan nanganu lal᷊aabbu paṛṛihi ara'e na'al᷊i paṛṛihi wuṛṛu tawe nilaawanna, ana see sambau sapi esakka ara'e keledai nanawo sulal᷊umme, 34tatahuannu paṛṛihi udde ṛinone mamaekka sal᷊ane su tatahuannu winatangnga udde, arawe i tou wotongnge mangal᷊appa winatangnga apan natete udde su watanganne. 35Amungkangngu pia sapi erakku sangkatou namate sapi esakku taumata waine, tatahuanne ruan katou udde ṛinone mabbal᷊u'u winatangnga apan ta'e wiakka udde wuṛṛu mattahia roinne. Itarua lai mattahia ṛemessu winatangnga apan natete udde. 36Arawe amungkangngu niasingkatante manungku sapi esakka udde inanaramanne mannandu'a, wuṛṛu tatahuanne tawe mallu'adda, i tou ṛinone mallanna'a ringannu sapi esakka apan ta'e wiakka, wuṛṛu wotongnge manganu winatangnga apan natete udde su watanganne.”

Currently Selected:

SASABANGNGA 21: LAITLD

Highlight

Copy