O KEJADIAN 13
13
O Abram deĘĽ o Lot ima tingaka
1O Abram wamal̄a o Mesir deʼ woiki o koremieuku, wödumutu o Kanaan o koreharail̄e idaduoka deʼ ngoihekata deʼ hagala ai kia honanga, deʼ Lot ünangö wonïki. 2O Abram duru wokaya; ünanga deʼ ai duba, o kabingi, o hapi, o haakaö deʼ o gurasi. 3De ünanga woiki o ngï moioka deʼ o ngi mahomoaika, wodumutu o Betel makotaika deʼ o Ai, o ngï ikokaramatioka kiaka ünanga mahira womä tau, 4deʼ wohigoko o huhuba mangï. Genangokadau ünanga wï huba ma Jou.
5O Lot ünangö deʼ ai hekata deʼ ai ngohaka deʼ ai gogilaongo inoli ai duba, o kabingi deʼ o hapi. 6Karana gënanga o tonaka genangoka mamomo imakewedonua yögogere yahinoto honanga, hababu manga aiwani o gigini iwöeholi. 7Ipaha idadi imatekeributu o Abram aiwani magogoana deʼ o Lot ai aiwani magogoana. (O öraha gënanga o Kanaan manyawa deʼ o Feris manyawa kayö gogerohi otonaka gënanga).
8O Abram wïtemo o Lotika, ”Ngone nënanga oriadodoto, i torou nako ani nyawa deʼ tongohi ahi nyawa imatekeroributu. 9Hababu gënanga kayaoa deʼ ngone homa tingaka. Nairiki o tonaka nënanga kiaika idadu ngona nöigo. Nako ngona nameta nënangika, ngohi aha toiki tameta mahomoaika.”
10 #
Kej. 2:10
O Lot wapulono mahigilolitino deʼ wamake o Yordan mawai mata-mataika, hiädono o Zoar makotaika maakere iwöe, hokä ma Jou Ai dumule ekola hokä o Mesir matonaka. (Hoko gënanga naga madodagi ihira de ma Jou kowabinahauwahi o Sodom de o Gomora makota.) 11Mabaha o Lot wairiki o Yordan ma Wai gënanga mata-mataika, daha womagoraka wosobo o wange mahiwaroko. Hoko gënanga o nyawa yahinoto gënanga imatingaka. 12O Abram hirahi wogogere o Kanaan matonakoka, enahioko o Lot womä tau o kota-kotaika owaioka hiädono womahitigika deʼ o Sodom. 13O Sodom makota gënanga yögogere hagala o nyawa madorou deʼ yobaradoha ma Jouika.
O Abram womatururu o Hebronika
14O Lot deʼ wopahaka, ma Jou wïtemo o Abramika, ”O ngï no ma oko-okoinoka gënanga, napulono nohidodiai o ngï yögeto-getongo; 15#Kis. 7:5 Ngohi aha tonihidöaka ngonaika deʼ aningohaka deʼ ani danongika o tonaka namömake-make gënanga hupaya idadi ngona madutu kahiado-adonika. 16Ngohi aha tonihidöaka ngonaika o ngohaka deʼ o danongo duru kamanga ngoë, hiädono o nyawa moiö yakunua yäetongo. Ho kaonyawa yakunua yaetongo o kafo o tonakoko, hokogengoli ani difauku yakunua yaetongo. 17Oraha nënanga, nodagi natailako otonaka nënanga mata-mataika, hababu Ngohi aha tonihidöaka ngonaika.” 18Ipaha gënanga o Abram watururu ai tau-tau daha wogogere itatapu womahi tigi-tigika o gota ikokaramatika o puji mangï o Mamre mabereraka imahi tigi-tigika deʼ o Hebron, deʼ genangoka ünanga wohigoko o huhuba mangï mangale ma Jou.
Currently Selected:
O KEJADIAN 13: TLB
Highlight
Share
Copy
Want to have your highlights saved across all your devices? Sign up or sign in
