O KEJADIAN 12
12
O Abram ma Jou Madutu wïahoko
1 #
Kis. 7:2-3; Ibr. 11:8 Ma Jou wïtemo o Abramika, ”Namal̄a ani berera, ani roriadodoto deʼ ani ama ai tau, deʼ o berera aha Ngohi tonihidö dumu-dumutu ngonaika noiki gënangika. 2Ngohi aha tonihidöaka ngonaika o ngohaka de o danongo mangangoë, deʼ önanga aha yodadi o berera deʼ o hoana ma ago-agomo. Ngohi aha tonihi barakati ngona deʼ Tadiai ani romanga kaya heto-hetongo, hiädono ngona aha nodadi o barakati.
3 #
Gal. 3:8
Ngohi aha tahibarakati o nyawa inihi böbarakati ngona
deʼ tahilolai o nyawa inihi lololai ngona.
De karana ngona
Ngohi aha tahi barakati mata-mata o nyawa o duniaka.”
4-5O Abram ai umuru o taongo moritumidi deʼ motoa maöraha ünanga wamal̄a o Haran maberera, ima moteke deʼ ma Jou Aipareta ünangika. O Abram womä jobo o Kanaan matonakika kama moi deʼ ongo Sarai ngoihekata, deʼ ai dodoto aingohaka o Lot, deʼ hagala ai arata deʼ o gogilaongo önanga yamömake-make o Haran mabereraka.
Onanga imahiadonika o Kanaan matonakoka, 6O Abram wödagi watailako o tonaka gënanga hiädono ünanga womahiädono o gota mautu ikokaramatika o More mabereraka, enagënanga o puji mangï o Sikemoka. Öraha gënanga o Kanaan manyawa kayö gogerohi o tonaka gënanga. 7#Kis. 7:5; Gal. 3:16 Ma Jou womahimatoko ai diri o Abramika deʼ wïtemo ünangika, ”Nënanga doka o berera aha tahidoa-doaka ani ngohaka de ani danongika.” Daha o Abram wohigoko gënangokadau o huhuba mangï o gahumu moi, mangale ma Jou womahimö mato-matokoka Ai diri ünangika. 8Ipaha deʼ gënanga ünanga wohi gila-gila ai dodagi o koreharail̄e, madaira itotoporono o Betel makota o wange mahiwaroko, deʼ womä tau o Betel deʼ o Ai makota mahidogoronaka: o Betel o wange madumuniha deʼ o Ai o wange mahiwaroko. Genangokadau ünanga wohigoko huhuba mangï, deʼ ma Jou wïhuba. 9Ipahaika ünanga wohigila-gilaoli ai dodagi o ngï moioka deʼ moikali, ai dumutu o Kanaan ma tonakika o koreharail̄e i daduoka.
O Abram o Mesir mabereraka
10Mä o Kanaan matonakoka magogiria naga o habirokata duru kohagiria, hiädono o Abram woiki iholoi ikurutikali o koreharail̄e, o Mesir mabereraika hupaya dokengoka wogogere hiädono o huha gënanga ipaha. 11Maöraha ünanga watilakuru mabatingi deʼ wowohama o Mesir mabereraika, ünanga womitemo o ngo Sarai ngoi hekatika, ”Ngona nohailoa ngohi hekata. 12Nako o Mesir manyawa inimake, önanga aha yato ngona ngohi hekata daha ngohi marai ihitoma deʼ ngona inimal̄aika nowango. 13#Kej. 20:2, 26:7 Ho, kayaoa denahetongo dika ngona ngohihiranga, hupaya ngohi ihimal̄aika towango deʼ ihihidiai yaoa karana ngona.” 14Deʼ itiai, ipaha o Abram watilakuru mabatingi deʼ imahiädono o Mesir mabereraika, o Mesir manyawa imimake o ngo Sarai duru mohailoa. 15Yamoruono naga okadatoka mapegawe imimake munanga deʼ ihingahu makoanoika hokokia amihailoa ongoheka gënanga; hababu gënanga munanga imiao makoano ai kadatoika. 16Mangale o ngo Sarai, makoano kawihidodiai o Abraham deʼ wihidöaka unangika ogilaongo, o duba deʼ matika deʼ o kabingi, o hapi, o keledai deʼ o unta.
17Mä karana makoano womil̄ë o ngo Sarai, ma Jou wadotagao hagala opanyake homodo-modongo makoanoika deʼ ainyawa ai kadato magoronaka. 18Daha makoano wiahoko o Abram de wïleha ünangika, ”Okia nodiaioka ngohino nënanga? Yadodoaho, nohihingahua munanga gënanga ngoni hekata? 19Yadodoaho ngona nahetongo munanga ganga ngoni hiranga deʼ mal̄aika ngohi tomi l̄ë idadi ngohi hekata? Nenanga munanga ngoni hekata; nomi l̄ë deʼ nioiki!” 20Makoano wohi döaka o pareta o pegaweika yamuruononaga, deʼ önanga iwihihupu o Abram o bereraka gënanga kamamoi deʼ ngoihekata deʼ hagala tounanga ai kiahonanga.
Currently Selected:
O KEJADIAN 12: TLB
Highlight
Share
Copy
Want to have your highlights saved across all your devices? Sign up or sign in