MATIUS 27

I Yesus niwawa sarang koa i Pilatus

(Mrk. 15:1; Luk. 23:1-2; Yoh. 18:28-32)

1Mal᷊uka-l᷊ukari, kaul᷊i u manga tumbonangu imam l᷊au pangahau tau Yahudi namutusi mamate si Yesus. 2I sire nuhapusi si Sie, l᷊au numbawa si Sie, bou e'e nanarakangi Sie si Pilatus gubernur u Roma.

Papate ngi Yudas

(Wuk. 1:18-19)

3 # Wuk. 1:18-19 Su tempo ngi Yudas musasingking e'e nakawua si Yesus seng niponesi pateng, i sie nusisili. Bou e'e i sie nanul᷊e doi sal᷊aka tilumpul᷊o e'e su manga tumbonang u imam dingang u manga pangaha u tau Yahudi. 4I sie nangul᷊i, “Ia seng nubardosa nusingking taumata ko takoae sal᷊a nge, sarang i Sie i hukung pateng!”

Arawe i sire nusumimbahi, “Apawe i pudidato ngi kami? E'e ko urusangu!”

5I Yudas namal᷊o doi e'e sarang l᷊al᷊ungu Wal᷊e-Ngu Mawu, mbuhue tamai nunggantong badange.

6Manga tumbonang u imam nangemong doi e'e dang nangul᷊i, “Doi i'i hariga ngu daha. Tumuhu atorang u agama, doi i'i ta botonge i punderma sarang l᷊al᷊ung u Wal᷊e-Ngu Mawu.” 7Bou e'e suapang i sire nusingkanaung, doi e'e nipul᷊uangi sire tana ko nisigho Tana Mukakoa Kuring. Tana e'e nipake guna ngu pul᷊al᷊uwingang u tau raghi. 8E'e sabapie sarang l᷊ou i'i tana e'e nisigho “Tana Daha.”

9 # Za. 11:12-13 Dingangu e'e naganapi apang ko niul᷊i i Nabi Yeremia, “I sire nanarima doi sal᷊aka tilumpul᷊o, hariga ko nikirengu tau Israel kere wawaehi si Sie. 10Dang doi e'e nipul᷊uang i sire Tana Mukakoa Kuring, kere niparentang u Mawu si sia.”

I Pilatus namariksa parkara-Ngi Yesus

(Mrk. 15:2-5; Luk. 23:3-5; Yoh. 18:33-38)

11Su tempo ngu Yesus nupasaruang i Pilatus, gubernur su soa e'e, i Pilatus nukina, “Apa i Kau ratu ngu tau Yahudi?”

“Kere wisara ngu,” sasimbah I Yesus. 12Kateho su tempo ngu manga tumbonang u imam l᷊au manga pangaha u tau Yahudi mul᷊ahabaru maul᷊i l᷊aantang si Yesus, i Sie mang ta nusumimbahi sarang singkamohong.

13Ual᷊ingu e'e i Pilatus nangul᷊i si Sie, “Apa i Kau tanakaringihi, kaul᷊i u ko i pakabuha i sire si Kau e'e?”

14Kuteu I Yesus mang ta nusumimbahi sarang singkamohong, hakiu gubernur e'e ta nasue herange.

I Yesus niponesi hukumang papate

(Mrk. 15:6-15; Luk. 23:13-25; Yoh. 18:39–19:16)

15Suapang tempo sal᷊iwang u Paskah, i gubernur sintinia mul᷊iu ngu singkatau taumata ngu hukumang tumuhu pile ngu taumata maul᷊i. 16Su tempo e'e pia singkatau taumata ko nateleng nihukung. Arange I Yesus Barabas. 17Inau, su tempo ngu taumata maul᷊i seng nakomol᷊i, i Pilatus nukina si sire, “I sai kao i kumu dakui l᷊iu guna ngi kumu? I Yesus Barabas arako I Yesus ko nisigho si Kristus?” 18I Pilatus nangul᷊i kere'e watu u i sie matitong, apang mangangawasa ngu Yahudi nanarakang I Yesus si sie ual᷊ingu sakiunaung.

19Su tempo ngi Pilatus kakaiang su tampa u pusidangeng, kawinge nundohongu tatanata i'i si sie, “Kumbahang i kau mural᷊au dingang u parkarangu taumata ko takoae sal᷊ange i'i, watu u ual᷊ingu i Sie, kalonge ia nipi ko dal᷊ai-l᷊ai.” 20Kateho manga tumbonangu imam dang manga pangaha u tau Yahudi kasaunge maniti taumata maul᷊i e'e tadeau pundo si Pilatus i Barabas pakiliu dang I Yesus pakihukung mate. 21Bou e'e i gubernur sau nukina si sire, “Boi sire rua e'e, i sai kao i kumu daku i l᷊iu guna ngi kumu?”

“I Barabas,” sasimbahi sire.

22“Boko kere'e apa mambeng daku koateng si Yesus ko i susigho si Kristus?” kakina i Pilatus si sire.

“Ghantong i Sie!” sasimbahi sire kaul᷊ie.

23“Kateho apa hal᷊i dal᷊ai ko seng nikoa-E?” kakina i Pilatus.

Sau i sire nukumiha mauha, “Ghantong te i Sie!”

24 # Ul. 21:6-9 Panginsuenge i Pilatus nakapundang i sie seng ta makakoa apa-apa l᷊ai, dang singkawawua taumata maul᷊i e'e nanulu. Inau i sie nangal᷊a ake su tingo ngu taumata maul᷊i e'e i sie nanguhasi l᷊imange dingang u nangul᷊i, “Kapapatengu taumata i'i bal᷊inge we makoa tanggunangku! E'e hal᷊e kumu!”

25Kaul᷊iu taumata e'e nusumimbahi, “Ore, balate i kami dingang u manga ana i kami mananggung hukumang watu u papateng-E!”

26Bou e'e i Pilatus nu pasuwang i Barabas guna ngi sire, dang nuparenta pul᷊uwaghi si Yesus; dingang nanarakangi Sie pakighantong.

I Yesus nipunangu manga sordado

(Mrk. 15:16-20; Yoh. 19:2-3)

27Bou e'e manga sordado ngi Pilatus numbawa si Yesus sarang l᷊al᷊ungu istana ngi gubernur, dang kaul᷊i u pasukang nukomol᷊i nutatal᷊iwung si Yesus. 28I sire nul᷊ua l᷊aku I Yesus, mbuhue i Sie nil᷊ohokangu kakingkaeng ko bung warnange. 29I sire nukoa makota wul᷊anta, dang nipake su timbo I Yesus. Bou e'e i sire nanile tiking simbau su l᷊imang-E ko kuaneng, mbuhue nusuba su tingong-E dang nuheghesi si Sie. “Sal᷊amati Ratu ngu Tau Yahudi!” angkungi sire. 30I sire nanguru si Sie, dang nangal᷊a tiking e'e, namukul᷊i si Sie su timbo-E. 31Nasue bou nutingkai si Sie, i sire nul᷊ua kakingkaeng ko bung warnange e'e, bou e'e sau nil᷊ohokangu pakeang-E sisane. Bou e'e i Sie niwawa sarang l᷊ikure tadeau ighantong.

I Yesus nighantong

(Mrk. 15:21-32; Luk. 23:26-43; Yoh. 19:17-27)

32Su ral᷊eng, i sire nusombang u singkatau bou kirene arenge i Simon. I sire nanihasa si sie pamasang kau salipi Yesus. 33Bou e'e i sire nurating u tampa simbau arenge Golgota, ko mangal᷊enge “Tampa u Duhi ngu Timbo.” 34#Mzm. 69:22Su se'e i sire nupanginung I Yesus dingang u anggori mapai. Kateho I Yesus bou nanemang anggori e'e, i Sie seng nandi nanginung.

35 # Mzm. 22:19 Bou e'e i sire nunggantong I Sie, dang nupapahia u pakeang-E dingang u niundi. 36Bou e'e i sire nukumaiang nundiaga si Sie se'e. 37Su kau salipi su wawou timbo-E, niwohekang i sire hal᷊i u antang si Sie, wisara nge: “Ii e I Yesus, Ratu ngu Tau Yahudi.” 38Nuhindoi Sie i sire l᷊ai nunggantong tau ko dal᷊ai duangkatau, singkatau su kuaneng, singkatau l᷊ai su kuihing-Nge.

39 # Mzm. 22:8, 109:25 Manga taumata ko sumahe su se'e kaul᷊ie kakilinge,#27:39: kakilinge: kakakoa u tau Yahudi boko muhinakang taumata. dang kapuhinakange si Yesus. 40#Mat. 26:61; Yoh. 2:19I sire nangul᷊i, “I Kau ko mo mul᷊engge Wal᷊e-Ngu Mawu Ruata, dang mupararisi su l᷊al᷊ungu tilo l᷊ou! Boko I Kau ko Ahusu u Mawu Ruata, lintue nae bou kau salipi'i e'e, dang pangambangte badang-U!”

41Kere'e l᷊ai manga tumbonang u imam, l᷊au manga meteru agama, dingang u pangaha u tau Yahudi kapuheghese si Yesus. Angkung i sire, 42“I Sie nangambang taumata kowal᷊inge, arawe badange sisane i Sie ta nakaambang! Boko i Sie Ratu ngu Tau Israel, mapiang i'i i Sie l᷊intu bou kau salipi, i kami mbuhue mo mangimang si Sie. 43#Mzm. 22:9I Sie mangimang su Mawu Ruata, dang muhabari ware i Sie ko Ahusu u Mawu Ruata. Ho, maite tuhungang i kite minsang Mawu Ruata mo mangambang si Sie orasi i'i.”

44Tau kapehi darua ko nighantong dingang-E mang l᷊ai kapuhinakange si Sie.

Papate-Ngi Yesus

(Mrk. 15:33-41; Luk. 23:44-49; Yoh. 19:28-30)

45Su kal᷊ihae, tilung kaorasi l᷊iwuenge, kaul᷊i u soa e'e narundung. 46#Mzm. 22:2Pukul᷊i tatilu wawul᷊aeng, I Yesus nukumiha dingang u tingih-E mauha, “Eli, Eli lama sabakhtani?” mangal᷊enge, “O Mawu Ruata-Ku, o Mawu Ruata-Ku, nakurawe I Kau nanintangu Ia?”

47Pirangkatau taumata su se'e nakaringihi tingih-E e'e, nangul᷊i, “I Sie kakui nge si Elia!” 48#Mzm. 69:22Singkatau boi sire dingang u nangal᷊a bungang u huso, nil᷊awu su anggori mahingisi. Bou e'e nisusu su pondol᷊u kau simpoto, dingang nitogori sarang wiwih I Yesus.

49Arawe taumata singga nangul᷊i, “Hindoko, maite tuhungang i kite, minsang i Elia sumongo mangambang si Sie!”

50Bou e'e I Yesus sau nukumiha dingang u tingihi mauha, mbuhue namal᷊usi sinango panginsuenge.

51 # Kel. 26:31-33 Pampele kawawiting su l᷊al᷊ung u Wal᷊e-Ngu Mawu Ruata naghehe napahia darua bou rasie sarang wawae. Dunia nu rinuhi dang manga wul᷊uru watu nawuka. 52Manga kubul᷊i nawuka, dang maul᷊i umat u Mawu Ruata ko seng nate sau nipuwangung. 53I sire nusumuwang bou manga kubul᷊i samuringi Yesus nuwangung bou papate, dang i sire nusumu su Yerusalem. Dang pai se'e napene taumata kaputuhunge si sire.

54Timbou pasukang dingang manga prajuriti ko kapudiagae si Yesus kaul᷊ie su katatakutang su tempo nakapundang rinuhi dingang nakawua apang ko nariadi e'e. I sire nangul᷊i, “Tingari, i Sie i'i Ahusu u Mawu Ruata!”

55 # Luk. 8:2-3 Su se'e l᷊ai pia kowawine maul᷊i katuhunge bou raunge. I sire e'e ko seng nutumuhu nutul᷊ung I Sie mborong bou Galilea. 56Su tal᷊oara i sire pia i Maria Magdalena, Maria mama ngi Yakobus sirerua ngi Yusuf, l᷊au mama ngu manga ana i Zebedeus.

Pul᷊al᷊uwing I Yesus

(Mrk. 15:42-47; Luk. 23:50-56; Yoh. 19:38-42)

57Su huwi e'e nusumongo singkatau ko kala bou Arimatea, arenge i Yusuf. I sie l᷊ai tumatuhu si Yesus. 58I sie nakoa sarang koa i Pilatus mundo badang I Yesus. I Pilatus nuparenta tadeau badang I Yesus pakisarakang si sie. 59Kute i Yusuf nangal᷊a badang e'e, nipikunge dingang u heka mawira ko wuhu. 60Bou e'e i sie namilo badang I Yesus su l᷊al᷊ung u kubul᷊e sisane ko nikoa su l᷊iang u wul᷊uru watu simbau. Bou e'e i sie nul᷊unggingu watu ko l᷊abo simbau nipuhumping kubul᷊i e'e, bou e'e napul᷊e. 61Maria Magdalena dingang i Maria kowal᷊inge natana nukumangiang su se'e nupasaruang kubul᷊i e'e.

Mundadiaga su kubul᷊i

62Ndai mal᷊ou, su l᷊ou ngu Sabati, manga tumbonang u imam l᷊ai manga tau Farisi natamai singkatamai musombang si Pilatus, 63#Mat. 16:21, 17:23, 20:19; Mrk. 8:31, 9:31, 10:33-34; Luk. 9:22, 18:31-33dingang nangul᷊i, “Tuang i kami nakatinaung su tempo taumata ko tahal᷊eo e'e mborong wiahi, i Sie mbuae nangul᷊i, ‘Mal᷊iu tilu l᷊ou Ia sarung sau muwangung’ 64Ual᷊ingu e'e, parentaiko taumata pudiaga kubul᷊e pakapia-pia sarang muratingu l᷊ou katilunge, tadeau manga tumatuhu-E ta makapanako badang-E bou e'e, mbuhue mul᷊ahabari sumanga taumata i Sie seng nuwangung bou papate. Dang l᷊eo samuri i'i seng nangilebe kadal᷊aie bou horo.”

65“Si kumu pia sordado diaga,” angkung i Pilatus, “tamaite diagate kubul᷊i e'e pakatoghasi.”

66Bou e'e i sire natamai sarang kubul᷊i, nitungkal᷊engi sire watu l᷊ahumpinge dang nipilonangu mudadiaga su tingonge, tadeau takoae ko makapunakali kubul᷊i e'e.

Currently Selected:

MATIUS 27: LAISXN

Highlight

Copy