MATIUS 25

Papinintu i sire mapul᷊o ko mahua

1 # Luk. 12:35 “Boko Ahusu Taumata sumongo kere Mawu, kakakoae musul᷊ung u papinintu i'i: I sire mapul᷊o ko mahua mananundughi boroiti nangal᷊a sol᷊o ngu simbau-simbau, mbuhue nusumuwang nanginsomahi pardegong. 2L᷊imangkatau boi sire ko bodoki, dang l᷊imangkatau ko wal᷊inge ko pande. 3I sire l᷊ima mahua ko bodoki, numbawa sol᷊o, kateho ta numbawa wawagheu l᷊ana. 4I sire l᷊ima mahua ko pande nahia u sol᷊ongi sire dingang u l᷊ana wawaghe'e. 5Pardegong e'e nal᷊iwue nusumongo, inau manga ana ko mahua e'e nanita nikapatikilang.

6Kal᷊oarange, mbuhue nikaringihi pia tingihi kiha, ‘Pardegong nasongo! Maite somahe i sie!’ 7I sire mapul᷊o ko mahua e'e nuwangung, nundiko sol᷊o ngi sire. 8Manga mahua ko bodoki e'e nangul᷊i si sire ko pande, ‘Onggol᷊eko singkodo l᷊anangi kumu si kami, watu u sol᷊o ngi kami seng kaul᷊usu.’ 9‘Ta makaonggo!’ sasimbahi sire ko pande, ‘watu u ntihang l᷊ana ngi kite kaul᷊ie ta makataung. Dal᷊eng te pul᷊uang su toko.’ 10Kute manga ana ko mahua ko bodoki e'e nul᷊umal᷊eng nundea l᷊ana. Su tempo ngi sire Karal᷊enge pardegong nasongo. I sire l᷊ima ko mahua ko seng nasadia e'e, nusumu singkahindo dingang i pardegong su wal᷊engu sal᷊iwang, dang tukari dingang nihumping!

11 # Luk. 13:25 Bou e'e i sire l᷊ima ko wal᷊inge nasongo. I sire kakuinge, ‘Tuang, Tuang, bukako tukari.’ 12Arawe pardegong e'e nusumimbahi, ‘Ia wugha ngi kumu!’ ”

13Bou e'e I Yesus nanginsue papinintu-E e'e kiri'i: “Ual᷊ingu e'e pakadiagate, watu u i kumu wugha ngu l᷊ou nge arako l᷊ai orase.”

Papinintu i sire til᷊u paparentang

(Luk. 19:11-27)

14 # Kej. 19:11-27 “Boko Ahusu Taumata musumongo musul᷊ungu Mawu kakakoae l᷊ai kere papinintu i'i. Pia singkatau koese manadia muwua sarang tampa ko marau. I sie nukumui manga paparentange, bou e'e nanarakang u rarotonge pakituhunge si sire. 15Su manga apang paparentange nionggol᷊ang tuhu kuatu simbau-simbau. Su singkatau i sie nangonggo l᷊ima hiwu doi wul᷊aeng. Su kowal᷊inge i sie nangonggo dua hiwu doi wul᷊aeng. Dang su singkatau l᷊ai i sie nangonggo sihiwu doi wul᷊aeng. Bou e'e i sie namundal᷊i. 16Paparentang ko nanarima l᷊ima hiwu doi wul᷊aeng e'e dingang u natamai nudagang, bou e'e nakarea untunge l᷊ai l᷊ima hiwu doi wul᷊aeng. 17Kere'e l᷊ai paparentang ko nanarima dua hiwu doi wul᷊aeng e'e nakarea untunge dua hiwu l᷊ai 18Arawe paparentang ko nanarima sihiwu doi wul᷊aeng e'e natamai nukal᷊i l᷊ohange su tana, bou e'e niwuninge doi ngu tuange e'e su se'e.

19Mal᷊iwue kahingang bou e'e, Tuang i sire mbuhue nusul᷊e, dang nanita nurarekeng dingang i sire. 20Paparentang ko nanarima l᷊ima hiwu doi wul᷊aeng e'e nusumongo, dang nanarakang mapul᷊o hiwu. ‘Tuang,’ angkunge, ‘i Tuang nanarakang l᷊ima hiwu doi wul᷊aeng si sia. Tuhungete, ia nakarea untunge l᷊ima hiwu l᷊ai.’ 21‘Masidada,’ angkungu Tuange, ‘I kau paparentang mapia dingang u satia. Ual᷊ingu i kau botonge i ka pangumbang su hal᷊i kodio, ia sarung manarakang hal᷊i ko nangilebe l᷊aboe si kau. Su e tuhu dingang ku su l᷊al᷊ung u kal᷊al᷊uasiku!’

22Bou e'e paparentang ko nanarima dua hiwu doi wul᷊aeng e'e nusumongo, dingang nangul᷊i, ‘Tuang i Tuang nangonggo dua hiwu doi wul᷊aeng si sia. Tuhungete, ia nakarea untunge sau dua hiwu.’ 23‘Masidada,’ angkungu Tuange, ‘i kau paparentang mapia dingang u satia. Ual᷊ingu i kau i kapangumbang su hal᷊i ko dio, ia sarung, manarakangu hal᷊i ko nangilebe l᷊abo. Su e tuhu ringangku su l᷊al᷊ungu kal᷊al᷊uasiku!’ 24Bou e'e paparentang ko nanarima sihiwu doi wul᷊aeng e'e nusumongo, dingang nangul᷊i, ‘Tuang, ia matitong i Tuang taumata ko mahasa. I Tuang manipo wuang su tampa ko i Tuang tanusuang, dang mangal᷊a hasile su tampa i Tuang ta nanawuhi sasuang. 25Ia mataku, inau ia natamai namuni doi ngi Tuang su l᷊al᷊ungu tana. Nanang i'i doingi Tuang.’ 26‘I kau paparentang ko dal᷊ai dingang u ko malasi!’ angkungu tuang e'e. ‘I kau wal᷊ingewe seng matitong ia manipo wuang su tampa ia tanusuang, dang mangal᷊a hasile su tampa ia tananawuhi sasuang? 27Kiko kere'e hinonge i kau mundeso doi ku e'e su bank, tadeau su tempo ia mapul᷊e, ia sau makatarima doiku e'e dingang u rentenge. 28Ual᷊ingu e'e, al᷊a doi e'e boi sie, dang onggoe su taumata ko seng pia mapul᷊o hiwu doi wul᷊aeng e'e. 29#Mat. 13:12; Mrk. 4:25; Luk. 8:18Watu u su taumata ko seng pia, sarung sau onggol᷊ang pakaul᷊i, dang i sie sarung nangilebe nasuku. Arawe su taumata ko takoae, singkodo ko mborong ene si sie sarung ial᷊a l᷊ai. 30#Mat. 8:12, 22:13; Luk. 13:28Dang paparentang ko takoae gunange e'e, rumete sul᷊ikure su l᷊al᷊ungu kararundung. Pai se'e i sie sarung mumpal᷊ehe dingang mutatahang u singsara!’ ”

Pangadilang su L᷊ou Kiamati

31 # Mat. 16:27, 19:28 “Boko Ahusu Taumata sumongo musul᷊ung u Ratu hindinganeng u apang malaekat-E, i Sie sarung kumangiang su kakangianeng-E ko mawantughi. 32Kaul᷊iu bangsa sarung i komol᷊e su saruang-E. Mbuhue i Sie mupuhaengi sire makoa duang kamonang kere gembala mupuhaengu domba bou kambing. 33Manga taumata ko mukoa kao u Mawu Ruata nitani su simbuka kuaneng-E, dang i sire kowal᷊inge su kuihing-E. 34Bou e'e Ratu e'e sarung mungul᷊i si sire su kuaneng-E, ‘Maite i kumu ko seng nial᷊amateng I Yamang-Ku. Sue su l᷊al᷊ung u kararatuang ko seng masasadia si kumu mborong bou tita u dunia. 35Watu u su tempo Ia nahutung i kumu nupakang si Sia, dang su tempo Ia narou, i kumu nupanginung si Sia. Ia singkatau raghi, i kumu nanarima si Sia su wal᷊e ngu. 36Ia takoae l᷊aku, i kumu nangonggo l᷊aku si Sia. Ia masaki, i kumu nutal᷊ung si Sia. Ia su tutupang, i kumu seng nutul᷊ung si Sia.’

37Bou e'e manga taumata e'e sarung mangul᷊i, ‘Mawu, kangereng i kami nakawua si Kau nahutung bou e'e i kami nupakang si Kau, arako narou bou e'e i kami nupanginung si Kau? 38Kangereng i kami mbuae nakawua si Kau kere tau raghi, bou e'e i kami nanarima i Kau su wal᷊e ngi kami? Kangereng i Kau takoae l᷊aku-U, bou e'e i kami nangonggo pakeang si Kau? 39Kangereng i kami mbuae nakawua si Kau masaki arako su l᷊al᷊ung u tutupang, bou e'e i kami nutul᷊ung si Kau?’ 40Ratu e'e sarung sumimbahi, ‘Katitongte su tempo ngi kumu nukoa e'e, su singkatau bou tal᷊oara u ana u singkatau ngu maneng kokadal᷊aikange, e'e musul᷊ung u nikoai kumu si Sia!’

41Bou e'e Ratu e'e sarung mangul᷊i si sire su kuihing-E, ‘Pangensoe bou i'i, manga kasuang! Putingkahunue su putung ko tamate, ko seng masasadia guna ngu setang dang apang malaekate! 42Watu u tempo ngu Ia nahutung, i kumu takoae ko nupakang si Sia, su tempo ngu Ia narou i kumu ta nupanginung si Sia. 43Ia singkatau raghi, i kumu tananarima si Sia su wal᷊e ngu. Ia takoae l᷊aku-Ku, i kumu ta nangonggo u l᷊aku si Sia. Ia masaki l᷊au su l᷊al᷊ung u tutupang, i kumu tanutal᷊ung si Sia.’ 44Kute i sire sarung mangul᷊i si Sie, ‘Mawu, kangereng i kami nakawua si Kau nahutung, arako narou, arako kere tau raghi, arako takoae papikungu wadang, arako masaki, arako su tutupang, dang i kami ta nutul᷊ung si Kau?’ 45Ratu e'e sarung sumimbahi, ‘Katitongte: su tempo ngi kumu mandiri mutul᷊ung u taumata singkatau ko kadal᷊aikange, mangal᷊enge i kumu mandiri mutul᷊ung u Ia.’ 46#Dan. 12:2Kuteu i sire e'e sarung i hukung su hukumang kakal, arawe i sire apang ko nukoa kao u Mawu Ruata sarung makapundang puwawiahi kahingang dang kakal!”

Currently Selected:

MATIUS 25: LAISXN

Highlight

Copy