ZEPANYA 1
1
1 #
2Rat. 22:1–23:30; 2Kar. 34:1–35:27 I Zepanya ute kai anạ i Kusyi. Pẹ̌tatuhukangu salakẹ̌boěng bọu wawa taraị ute kai Kusyi, i Gedalya, i Amazia ringangu Datu i Hizkia. Seng ini e tatanatang Mawu si Zepanya su tempon Datu i Yosia anạ i Amon nẹ̌parenta su Yehuda.
Ělloʼm pělahukungu Mawu
2 Mawu e něhengetang, ”U Iạ e sarung mapakaupung kal᷊awọu sabarang su wowon dunia: 3kěbị taumata ringangu binatang, narekeng lai manụ winalangeng dingangu kinạ. Taumata ral᷊akisẹ̌ e sarung Takụ binasaěng.#1:3: Kasariange mangal᷊ene: sarung Takụ binasaěng; Ibrani: batu katatanggaěng. Patikụ taumata e sarung Takụ ipakawihua, kụ tawẹ u sarang sěngkatau e Takụ iwala wiahẹ̌. Iạ e Mawu, kụ seng nẹ̌bisara.
4Iạ e sarung měhukungu lohong Yerusalem dingangu kạguwạu Yehuda. Manga lěmbeng pěnanal᷊e su Baal sarung Takụ ipakapuạ bọu apan tampạ ene. Manga imang kụ mẹ̌tẹ̌tangkuang Baal sarung ipakawul᷊e sěngapam botonge. 5Iạ e hědong měngaehẹ̌ pakawurěsi si sai-saing kụ maawị su atụ maněmba matangěllo, bul᷊ang dingangu manga wituing, Takụ lai ipakailang i sire apang kụ měmpạněmba si Siạ dingangu nẹ̌salu mẹ̌těngkasatia si Siạ, kutẹu kawe lai nẹ̌salu su arengu mahan duata i Milkom. 6Iạ e sarung mapakawinasaʼn sire kụ tawe riměnta su anu-Ku arau mẹ̌dorong laahạ-Ku dingangu apan seng něněntangu Iạ tawe lai mapulu tumol᷊e si Siạ.”
7Ěllong Mawu e seng masandigẹ̌, su ěllo ene tangú Ruata sarung mẹ̌karadiahang; ual᷊ingu ene katanạ e pakarěmmasẹ̌ su těngo-Ne. Mawu e sarung mẹ̌dẹ̌dariahi waugu měmotọ manga umatʼE kere sasěmba ghaghěllị dingangu i Sie e seng nẹ̌gausẹ̌ manga sědụ u Yehuda e. 8”Su ělloʼm pěmamotọ ene,” angkuěngu Mawu, ”Iạ e sarung měhukungu apang manga těmbonange, apang ahusu manga ratu, ringangu kěbị taumata kụ tụtol᷊e tundun taumata raghị e. 9Iạ sarung měhukungu patikụ taumata kụ mẹ̌kẹ̌kal᷊iomaneng kere taumata kụ tawe mẹ̌kakiral᷊a si Siạ, dingangu apan nẹ̌tako ore lai němate mědeạu makapenẹ bal᷊en tuang i sire e#1:9: Bal᷊en tuang i sire e arau: pangkunangu ruatang sire. ringangu manga apal᷊iwụ hampasẹ̌ e.”
10”Su ěllo ene,” kerene angkuěngu Mawu, ”sarung ikaringihẹ̌ sasangị su Pasěllangengu Kinạ. Tingihu ral᷊ěmpasiang e sarung ikaringihẹ̌ bọu soa wuhu, dingangu tingihu kal᷊aopehẹ̌ maihạ e sarung piạ bal᷊embenge wọu manga wěntihe. 11Kěngkasusa e ringangu pahungkiạ e su tempong i kamene makaringihẹ̌ ene, ei ral᷊ohong soa watuhu wawa, watụ u kěbị apang mal᷊ahumbal᷊ụ dingangu taumata apang mapěngědangu roitẹ̌ e seng nịpapate!
12Su tempo ene Iạ e sarung měngal᷊ạ oborẹ̌, dingangu měnal᷊iongkahẹ̌ sol᷊ong Yerusalem. Takụ sarung ihukung kal᷊awọu ral᷊ohone kụ tawẹ madenge ene, kụ kětạeng makạbatụ kapulune hala e, dingangu mẹ̌tẹ̌tiněnnang Iạ e, kai Mawu kụ tawe nẹ̌kẹ̌koạ kere ini arau kerene. 13Arětạ i sire e sarung hampaseng dingangu wal᷊en sire e ipakagholọ. I sire e sarung měmẹ̌tị bal᷊e, kaiso tawe pẹ̌tanakenge. I sire e sarung mẹ̌koạ pẹ̌sasuangengu anggorẹ̌ e kaiso tawe měnginung akene.”
14Ěllong pělahukungu Mawu e seng marani, ore seng enẹ e karanine, ore lai sen tạ kararěnane marěnta e. Ěllo ene e napenẹ u susa naung, hakịu apan tahapẹ̌sekẹ e kụ apang něngalembong mahasa e lai#1:14: Ěllo ... mahasa e lai arau; Daringihẹ̌ko! Ěllo makạtatakụ ene e sarung duměnta, saral᷊aing manga sordado kal᷊ahasaěnge sarung ... sarung měngkahuangu ral᷊umpasiang i sire e! 15Ěllo ene e kai ěllong dal᷊angehẹ̌, kasasigěsạ dingangu kasasusa, ěllong kal᷊aopehẹ̌ dingangu kaghagholọ e, ěllong kararěndung dingangu ěllong kasasul᷊akọ, ěllong karal᷊ěhubẹ̌ dingangu piạ hiwụ e. 16Kanandung ěllo ene e ikaringihẹ̌ tingihu slompretẹ̌ dingangu wansagu pẹ̌seketang bọu manga apam bawahani kụ němpěngalo su manga soa piạ těndạ e ringangu piạ manga měnarane mararangẹ.
17 Mawu e něhengetang, ”Iạ e sarung mapakarěntan sawěda mal᷊awọ baugu riadikang taumata, hakịu i sire e sarung mẹ̌sẹ̌saghipo kere tau wuta. I sire e seng nẹ̌dosa su těngo-Ku, ringangu orasẹ̌ ini e dahan sire e sarung mẹ̌boso kere akẹ, dingangu manga maietʼi sire e měngkawuhụ su wowong ěntana e.”
18Su ěllo kụ mahuagatẹ̌ ene e Mawu sarung mapatodẹ u ral᷊angehʼE, tangú kal᷊awọu wul᷊aeng dingangu sal᷊akaʼn sire e tawe makasal᷊amatẹ̌ si sire. Kal᷊awọu dunia e sarung maghagholọ marasai matutungu putungu ral᷊angehʼE. Dingangu sěngkělěndịe sarung sawukangʼE kal᷊awọu niawa su dunia ini.
Currently Selected:
ZEPANYA 1: SXN
Highlight
Share
Copy
Want to have your highlights saved across all your devices? Sign up or sign in
