ZAKHARIA 8
8
Mawu e nẹ̌diandi saụ měmangung kapia Yerusalem
1 Mawu Kụ Limembong Kawasa e něngonggọu tatanata ini e si siạ, 2”Iạ e mapulu-pulu mẹ̌tul᷊ungu Yerusalem batụu Iạ e makěnda-kěndagẹ̌ su tumanạ e, ringangu ual᷊ingu kakěndagẹ̌-Ku ene, naung-Ku e natětị su manga sědụ su soa ene. 3Iạ e sarung mẹ̌sul᷊e kapia sarang Yerusalem, soa-Ku kụ susi ene, ringangu mẹ̌tanạ sene. Yerusalem sarung ikakiral᷊a kere soa kụ satia, ringangu bukidʼu Mawu Kụ Limembong Kawasa e#8:3: Bukidʼu Mawu Kụ Limembong Kawasa e: Bukidʼu Sion. sarung isěbạ Bukide Susi. 4Su wimbaengu soang Yerusalem, sarung saụ maiang manga opọ dingangu manga nenẹ kụ seng maghurang-gurang kụ dumal᷊eng seng harusẹ̌ mẹ̌pakẹ u těking. 5Apan dal᷊eng su soa sarung lai mapenẹu manga rariọ kụ měmpěnẹ̌nalang.
6Hal᷊ẹ̌ ene aramanung tawe mariadi su taumata kụ bědang biahẹ̌ bọu wansa ini, kaiso wal᷊inewe tawe mariadi si Siạ e. 7Iạ e sarung mapakasal᷊amatu umatẹ̌-Ku bọu manga wanua katatanakeng i sire e piněhengketang, 8dingangu nẹ̌bawa si sire kapia wọu sěmběkan daki ringangu sěmběkam bahẹ, hakịu i sire nẹ̌tanạ su Yerusalem kapia. I sire sarung makoạ umatẹ̌-Ku ringangu Iạ e Ruatan sire. Iạ e sarung mẹ̌parenta si sire ringangu satia ore lai adilẹ̌.”
9 Mawu e něhengetang su manga umatʼE, ”Pakatoghasẹ̌ bue naungu! Orasẹ̌ ini i kamene e seng nakaringihẹ̌ manga wawera kụ seng niwerang manga nabi su tempong batu wawuku e seng nipěllọ, baugu měmangung kapia Wal᷊e-Ku. 10Kal᷊imonan tempo ene tawẹ u makaumal᷊ẹ̌ měnewa tenagan taumata arau binatang, dingangu tawẹ u reng makapěndang mal᷊enehẹ̌ bọu sasal᷊ukạ u sekẹ e. Iạ e seng napẹ̌tanggan sěmbaụ su wal᷊ine e. 11Arawe ini e taumata kụ bědang biahẹ̌ e bọu wansa ini e Takụ nikoạ nipẹ̌tatěntang u nạung kal᷊imona e. 12I sire e sarung měnawuhu wine su pẹ̌darame. Manga kalung anggorʼi sire e sarung mẹ̌bua, ěntana e sarung mẹ̌gěllịu ghěsine, ringangu tahiti e sarung dumasehẹ̌ mahěmpal᷊iu. Kal᷊awọu al᷊amatẹ̌ ene Takụ nionggọ su taumata kụ bědang biahẹ̌ bọu wansa ini. 13Ei tumanạ u Yehuda ringangu Israel! Su tempo nal᷊iu, kereu tau raghị e kụ lawọ mẹ̌pẹ̌papangane, i sire e nẹ̌bera, ”Karimạko hombang kụ seng nawuạ su Yehuda ringangu Israelẹ̌ e mal᷊aing mihombang lai si kau!” Arawe Iạ e sarung měngambang si kamene, hakịu apan tau raghị ene sarung mahumbisara lawọ i sire, ’Karimạko al᷊amatẹ̌ kụ seng natěntung baugu Yehuda ringangu Israelẹ̌ e mal᷊aing matěntung su watangengu!’ Ual᷊ingu ene apakatoghasẹ̌ko naungu e ringangu kumbahang matakụ!”
14 Mawu Kụ Limembong Kawasa e něhengetang, ”Piạ e manga i upung i kamene e napakariading Iạ e limangehẹ̌, Iạ e němutusu waugu měhukung i sire e pakatědụ. Iạ e tawe měmal᷊ui putusang-Ku ene, kaiso kawe mẹ̌koạ ene. 15Arawe orasẹ̌ ini Iạ e měngal᷊amatẹ̌ tumanạ u Yerusalem dingangu tumanạ u Yehuda. Kụ kumbahangbe matakụ. 16#Ef. 4:25 Kai ini e tita kụ harusẹ̌ koateng i kamene: Kamagengu mẹ̌bisara, pẹ̌berangkong apa kahěngang su sěndinganengu. Pěngonggọkong putusangu pěngadilang kụ su kạadilẹ̌ e ringangu makawawa pẹ̌darame. 17Kumbahangbe mẹ̌karakin dal᷊akisẹ̌ e waugu sěndinganengu. Kumbahangbe mẹ̌salu konti. Iạ e mạběnsingu konti ringangu tawẹ kạadile ore lai kal᷊ahasa e.”
18 Mawu Kụ Limembong Kawasa e timanata kere ini si siạ baugu umatʼE, 19”Pẹ̌papuhědang kụ ikẹ̌koạ su wul᷊ang kaěpạ e, kal᷊imane, kapitune, ringangu kapul᷊one sarung mariadi pěmamantugẹ̌ napenẹ u ral᷊uasẹ̌ dingangu ral᷊iagẹ̌ baugu tumanạ u Yehuda. Pẹ̌karalọkong katul᷊idẹ̌ dingangu pẹ̌darame!”
20 Mawu Kụ Limembong Kawasa e něhengetang, ”Tempone sarung marěnta, tumanạ u soa mal᷊awọ#8:20: Soa mal᷊awọ arau: manga soa ghaghuwạ. e sarung makoạ sarang Yerusalem. 21Tumanạu soa sěmbaụ sarung mẹ̌bera su tumanạu soa wal᷊ine, ”Bọete i kitẹ e tamai měněmba Mawu Kụ Limembong Kawasa e ringangu mẹ̌dorong al᷊amatʼE. Tol᷊eko si kami!” 22Mase mal᷊awọ taumata ringangu mal᷊awọ bansa kụ matoghasẹ̌ e ruměnta sarang Yerusalem baugu měněmba si Siạ Mawu Kụ Limembong Kawasa e ringangu kụkakindoạ u al᷊amatẹ̌-Ku. 23Su ěllo tamai ene, i sire mapul᷊o tau raghị e sarung duměnta su anung sěngkatau tau Yahudi kụ nẹ̌bera, ’I kami e mapulu l᷊ai mẹ̌barauntu kere i kamene; u i kami e nakaringihẹ̌ u Ruata e něngal᷊amatẹ̌ si kamene.’ ” Mawu Kụ Limembong Kawasa e seng nẹ̌bisara.
Currently Selected:
ZAKHARIA 8: SXN
Highlight
Share
Copy
Want to have your highlights saved across all your devices? Sign up or sign in
