ZAKHARIA 14
14
Yerusalem dingangu manga wansa
1Ěllong pělahukungu Mawu e seng marani. Tangú Yerusalem sarung pěmul᷊ahoěng, dingangu lẹ̌tạ e sarung ipẹ̌papahiạ su siloʼm matanu. 2Mawu sarung měnampungu kěbị bansa waugu měngalo Yerusalem. Soa ene e sarung pul᷊ahoěng, manga wal᷊ene e pěmul᷊ahoěng dingangu manga wawine e liaěng. Sěngkapahiakeng darua wọu tumanạ e sarung ihengkẹ sarang pěmamembangeng, arawe lěmbene e sarung matanạ su soa ene. 3Mase Mawu e sarung tamai kụ mẹ̌sekẹ dumokạ manga wansa ene, kere nạung nikakoạ e su tempo kal᷊imona. 4Su ěllo ene i Sie sarung dumarisị su Wukidʼu Zaitun, su sěmběkan daki wọu Yerusalem. Tangú Wukidʼu Zaitun, sarung mawěka kahiang bal᷊ane mawěnahẹ̌, měnětạ bọu sěmběkan daki sarang sěmběkam bahẹ. Sěngkapahiakeng darua wọu wongkone ene e sarung kumanoạ sarang sawěnahẹ̌ dingangu sěngkatahạpahiakeng darua e lai sarang timuhẹ̌. 5I kamene sarung tumal᷊ang bọu wal᷊ane kụ němahiạ bongkone ene nakoạ darua.#14:5: Kasariange mangal᷊ene: I kamene sarung tumal᷊ang ... darua. I kamene e sarung tumal᷊ang kere manga i upung i kamene su tempong nariadi linuhẹ̌ su tempong pẹ̌paparentang i Uzia, ratung Yehuda. Bọu e riměntạ e Mawu Ruataku, nitakinangu kěbị malạekatẹ̌ e.
6Kereu ěllo ene marěnta, sarung tawẹ apa lai rahěndong arau eisẹ̌.#14:6: Kasariange mangal᷊ene: rahěndong arau eisẹ̌. 7Su ěllo ene tawẹ apa lai kararěndung. Ěllo e mang těbe matualagẹ̌, kerene lai su tempong hěbị. Kaiso kětạeng Mawu e masingkạ měnsang angerẹ ěllo ene marěnta.
8 #
Yeh. 47:1; Yoh. 7:38; Pěl. 22:1 Su ěllo ene, akẹ matilang e sarung melehẹ̌ bọu Yerusalem, sěmběka wọu akẹ ene sarung mẹ̌timona Laudẹ̌ Nate dingangu sěmběka ewe lai sol᷊ong Laudẹ̌ Tal᷊oara. Akẹ ene sarung melehẹ̌ kanandun taung, baewe su musungu tahiti arau lai su musungu měhangu. 9Tangú Mawu e sarung mẹ̌parenta kere sěngkatau ratu waugu kasěllahu wowon dunia e; apan taumata e sarung měmpaněmba si Sie al᷊ingkai Ruata ringangu makakiral᷊a si Sie ringangu areng mẹ̌sul᷊ung.
10Kasěllahu wanua wọu Gibea su sěmběkan sawěnahẹ̌ sarang Rimon su sěmběkan timuhẹ̌, sarung makoạ tenene. Arawe Yerusalem sarung tumiol᷊ẹ̌ marangẹ, limembong karangẹ e wọu ěntana mạngělikụ e; soa ene e sarung mal᷊oahẹ̌ bọu Tukadu Pasěllangeng Benyamin sarang Tukadu Pasěllangeng Bukune, kụ kai tampạ u tukadu pasěllangeng Humotong dingangu wọu Měnara Hananel sarang tampạ u pěmaměhang anggorẹ̌ tataghuanengu ratu. 11#Pěl. 22:3 Taumata e sarung matanạ dingangu mal᷊enehẹ̌ su soa ene, tawẹ papatakụ u kawawinasa.
12 Mawu sarung mapakarěntang sakị kụ makạtatakụ su patikụ bansa kụ seng nẹ̌sekẹ dimokạ Yerusalem. Mata ringangu lilan sire e, ore lai kạguwạu wadang i sire e sarung mawuhụ těntal᷊ang i sire wědang biahẹ̌.
13Su ěllo ene Mawu sarung mapakariading manga wansa ene e apạ e niwingọ e ringangu něngkatakụ hakịu apan taumata e sarung měnamẹ hapị e apang ene su sěmběkane kụ makatěmbọ e. 14Apaʼm manga esẹ su Yehuda e sarung mẹ̌sekẹ baugu mẹ̌tahutěndạ u Yerusalem. Kere apal᷊iwụ pul᷊ahon sire e sarung měngal᷊ạ kěbị arětạ u manga wansa su rěduhe kere wul᷊aeng, sal᷊aka ringangu pakeang mẹ̌bẹ̌bilowoi.
15Piạ sakị sěmbaụ kụ matědụ e mal᷊aing sarung tumangga su kawal᷊o, bagal᷊ẹ̌, onta ringangu kalide, ore kěbị binatang su pẹ̌darasengang u sědụ.
16 #
Imng. 23:39-43
Bọu ene kěbị taumata kụ bědang biahẹ̌ e sutal᷊oarang manga wansa kụ měngalo Yerusalem, sarung makoạ sarang soa ene waugu měněmba Ratu, Mawu Kụ Limembong Kawasa e, ringangu waugu měmantugẹ̌ Sal᷊imbangu Selon Daukalu. 17Kereu piạ bansa kụ mạdiri makoạ sarang Yerusalem baugu měněmba Ratu, Mawu Kụ Limembong Kawasa, tangú su wanuane e sarung tawe rumasehẹ̌. 18Kụ kereu tau Misirẹ̌ e mạdiri měmantugẹ̌ Sal᷊imbangu Selon Daukalu, tangú i sire e sarung kahinoěngu sakị kụ niaparěntam Mawu suapaʼm bansa kụ mạdiri tamai mẹ̌kal᷊iomaneng. 19Seng ene e hukumang baugu Misirẹ̌ e ringangu waugu kal᷊awọu wansa kụ mạdiri měmantugẹ̌ Sal᷊imbangu Selon Daukalu.
20Su ěllo ene manga lonceng su pakeangu kawal᷊o sarung kětakengu wawera ”Kětạeng baugu Mawu.” Manga pantisẹ̌ su Wal᷊em Mawu e sarung arěgaěng kere manga lainumangu sasěmba su těngoʼm pananěmbaěng. 21Kěbị pantisẹ̌ su Yerusalem dingangu su kasěllahu Yehuda e sarung ipakatuntụ makoạ tataghuanengu Mawu Kụ Limembong Kawasa. Tumanạ e kụ měnarakangu binatang sarung mẹ̌pakẹ u ene kụ mẹ̌tuěng gẹ̌sing sasěmba. Kereu tempo ene marěnta, sen tawẹ apa lai mal᷊ahumbal᷊ụ su Wal᷊em Mawu Kụ Limembong Kawasa.
Currently Selected:
ZAKHARIA 14: SXN
Highlight
Share
Copy
Want to have your highlights saved across all your devices? Sign up or sign in
