ZAKHARIA 10
10
Mawu e nẹ̌diandi sarung měngambang umatʼE
1Kereu musungu mal᷊ěhubẹ̌ e masongo, pẹ̌gause tahiti su Mawu e. Tangú Mawu e sarung měnampung u winawa malělubẹ̌ e, mase maparasehu tahiti mal᷊awọ-l᷊awọ hakịu manga rahami e měngkaido ringangu mẹ̌biahẹ̌ baugu kěbị taumata. 2#Mat. 9:36; Mrk. 6:34 Taumata e mẹ̌dorong tatumbal᷊ung su manga mahan duata ringangu apan tahapatehẹ̌, kaiso kal᷊awọu sasimbang i sire kẹ̌kaěbakeng e kai konti ringangu wisara tạ lohone samatang. Piạ makatualagẹ̌ ipi, kaiso tatualagʼi sire e kětạeng makapal᷊idẹ̌ si kamene, ringangu lahiborẹ̌ kụ ilẹ̌onggọ tawẹ mangal᷊ene. Ual᷊ingu ene kawanua e nẹ̌sal᷊iawuhẹ̌ kere domba. I sire e mạsusan tawẹ apa těmbonang i sire e.
3 Mawu něhengetang, ”Iạ e lumangehẹ̌ marasai su měngangawasa kụ mẹ̌pẹ̌parenta umatẹ̌-Ku, ringangu i sire e sarung Takụ ihukung. Arawe tumanạ u Yehuda e ute kai tataghuaneng-Ku, ringangu Iạ e Mawu Kụ Limembong Kawasa e sarung měhiking si sire e. I sire e sarung Takụ koateng kawal᷊on sekẹ mahasa waugu Iạ e. 4Bọu tal᷊oarang sire sarung Takụ pileěng měngangawasa, měngangahạ dingangu mol᷊ensekẹ kụ sarung mẹ̌parenta umatẹ̌-Ku.”#10:4: Bọu tal᷊oarang ... umatẹ̌-Ku arau: Kěbị měnanědạ, měngangawasa, pangahạ e ringangu mol᷊ensekẹ – sarung sěngkapěněntangu Yehuda. 5Tumanạu Yehuda e sarung makauntu kere manga tahapẹ̌sekẹ kụ měmpanahida manga rokạ kere lěbo sural᷊eng. I sire sarung mẹ̌bangkuadẹ̌ ual᷊ingu Iạ, Mawu měnẹ̌nongka si sire, ringangu wuntuangu sekẹ kụ sụsake kawal᷊o kụ sarung ikawatạ i sire kěbị.
6”Tumanạu Yehuda e sarung Takụ ipakatoghasẹ̌,
umatu Israelẹ̌ e sarung Takụ ipakasal᷊amatẹ̌.
Takụ bawaěng i sire e kapia sarang banuane
ual᷊ingu Iạ e kụkěndagʼi sire.
Takụ koateng i sire e
kere wansa kụ tawe Takụ nipẹ̌sẹ̌sunial᷊ẹ̌.
Seng Iạ e Mawu Ruatan sire,
kal᷊awọu kakal᷊iomaneng i sire e sarung Takụ naungang kapia.
7Umatu Israelẹ̌ e sarung kere wawahani kụ matoghasẹ̌,
mẹ̌sul᷊ungu taumata kụ něnginung anggorẹ̌, i sire e sarung mal᷊uasẹ̌.
Pal᷊ahiten sire e wọu tempo sarang tempo
tawe sarung mapakawul᷊eng kal᷊auntu kụ Takụ nionggọ ini e.
I sire sarung měmpahul᷊uasẹ̌
ual᷊ingu kakanoạ-Ku e waugi sire e.
8Umatẹ̌-Ku e sarung Takụ kuiang dingangu Takụ komol᷊ang makoạ sěmbaụ.
I sire Takụ ipakal᷊iwirẹ̌ dingangu Takụ ipakal᷊awọ kere kal᷊imona.
9Manilaing Takụ ipẹ̌kakeke i sire sutal᷊oarang manga wansa,
i sire e sarung těbewe mẹ̌tẹ̌tahěndung si Siạ paịse.
I sire e sarung masal᷊amatẹ̌, kerene lai manga anạ e
ringangu sarung mapul᷊e sěngkakapul᷊ẹ sarang banuane.
10Bọu Misirẹ̌ dingangu Asyurẹ̌, i sire e sarung Takụ ipakapul᷊ẹ.
Su wanuane hala e i sire sarung Takụ ipěllọ.
I sire e Takụ paringaneng sarang Gilead dingangu Libanon lai;
hakịu kal᷊awọu wanuane napenẹ i sire e.
11Kereu i sire e lumiu l᷊audu kasasigěsạ e,
Iạ Mawu sarung měměbahẹ̌ manga luạ;
tangu wal᷊an Sal᷊ụ u Nil mal᷊ěsa mamara.
Tau Asyurẹ̌ mal᷊aobotẹ̌ e sarung ipakasanạ,
dingangu Misirẹ̌ kụ mahasa e sarung kailangengu kawasa.
12Iạ e sarung manoghasẹ̌ umatẹ̌-Ku,
i sire e sarung mararingihẹ̌ dingangu mẹ̌tahamawu si Siạ.
Iạ e Mawu kụ seng nẹ̌bisara.”
Currently Selected:
ZAKHARIA 10: SXN
Highlight
Share
Copy
Want to have your highlights saved across all your devices? Sign up or sign in
