NAHUM 3
3
1Kạěngkěhang soa ini kụ napenẹ u konti ringangu pẹ̌papate;
napenẹu apal᷊iwụ pul᷊aho arau hampasẹ̌.
2Daringihẹ̌ko papahesu cambokẹ̌ dingangu tatarangkal᷊u roda,
tatarangkal᷊u tal᷊angu kawal᷊o ringangu kakiọ u kareta.
3Buntuangu sumasake kawal᷊o e němpěngalo marehe,
pedane sụsěnnang, běngkone kụkerong.
Taumata nate tawe ikarekeng,
kasuang i sire e němpẹ̌tẹ̌tatimbo,
makạkatangga taumata e.
4Niniwe tahakiwuang ene e kạpanarimạ e hukumang.
Kal᷊aholẹ e mambeng makạbinsana.
Mal᷊awọ bansa e nihopaěnge,
ringangu niologangu#3:4: niologangu arau: nikoạ ěllange. al᷊usẹ̌.
5 Mawu Kụ Limembong Kawasa e měhengetang,
”Ei Niniwe, i kau e sarung Takụ sigěsakeng!
Kahiwunu e Takụ bingkaheng su těngong manga wansa,
hakịu aị u e ikasilon sire.
6I kau e Takụ koateng kere barang makạdarěnting,
I kau e Takụ berengangu kotorẹ̌;
i kau e Takụ koateng kere wawialaěng.
7Měmamanda si kau e sarung mẹ̌těngkaraung batangenge kụ mẹ̌bera,
’Niniwe e kate kạtatanạ opehe samatang!
I sai wue masusa naunge ringange?
Tawẹ apa kụ deng měhiborẹ̌ si sie.’ ”
8Ei Niniwe, tumanị e wue i kau e limembong kapiane wọu i Tebe, niupunangu soang Misirẹ̌? Tebe mal᷊aing kaěbakeng su wiwihu sal᷊ụ kụ měnẹ̌něndạ si sie tabidạu meselẹ̌. Ore, Sal᷊ụ u Nil ene e těndạ nakoạ bal᷊oarị e. 9Tebe nẹ̌parenta waugu Sudan dingangu Misirẹ̌ e, kụ kawasane tawẹ kẹ̌takenge; Libia ringangu Put e kai sěndinganenge. 10Maning kerene, tumanạ u Tebe nitaweng dingangu nihengkẹ sarang pinamembangeng. Su kěbị pělelangenge, manga anạ e sarung bẹ̌baheng pakapate. Manga těmbonange ikitangu hante ringangu ipẹ̌papahiạ sutal᷊oarang manga měnanawenge.
11Ei Niniwe, i kau e mal᷊aing sarung mapinsang ual᷊ingu niwukang. I kau mal᷊aing sarung mẹ̌tawakal᷊i mědeạu mal᷊iwirẹ̌ bọu manga sědụu. 12Kal᷊awọu těndạu e sarung kere kalung ara kụ napenẹ u wua-bua masasasạ. Kereu kalu ene kiotang, manga wuane mahondosẹ̌ su ral᷊ungu mohongu taumata kụ mapulu kumaěng. 13Manga tahapẹ̌sekẹ u e lome kere wawine ringangu wanuanu e mamben tawe makakoạ manga apa mẹ̌těngon dokạ. Putunge sarung makahěngisẹ̌ kal᷊awọu papal᷊e tukadu pasěllangengu. 14Měngkate pěnimbạ akẹ baugu rariahi karěngụu i kau e tal᷊iwungang, dingangu pěnoghasẹ̌ko, manga těndạu! Tatahidaiko lěbo waugu pẹ̌koạ tela e ringangu pěndiahingkong pastakane! 15Waẹbe apa koatengu e, měngkate tạ kěhase samatang, batụu i kau e nal᷊ahẹ u sarung masue matutung arau mawihua su ral᷊ungu pẹ̌seketang. I kau e sarung mapuạ kere ghěsin sasuang kinaseng u kal᷊imbotong.
I kau e seng něhite kere kal᷊imbotong! 16Manga mal᷊ahumbal᷊ụ e něngalembo wọu rekenangu manga wituing su l᷊angị! Arawe orasẹ̌ ini e i sire e mapuạ kere kal᷊imbotong kụ měmingkahẹ̌ papanide wọu e tuměllạ mẹ̌těngkailang. 17Apan těmbonange ringangu mapapangkatu e mẹ̌sul᷊ungu ghapaěngu kal᷊imbotong kụ mẹ̌tẹ̌ngkal᷊indung su manga meselẹ̌ su tempong matěho. Arawe sarětạeng matangěllo e suměbang, i sire e tawẹ kararěnnane něngkailang; kụ tawẹu sarang sěngkatau e masingkạ u makoạ sarang apa i sire.
18Ei ratung Asyurẹ̌! Apang guběrnurẹ̌ u e seng něngkapohong, dingangu manga bupatinu e kinahuntikilang sarang marěngụ-děngụ. Kawanuanu e nẹ̌sal᷊iawuhẹ̌ su wawul᷊urange, ringangu tawẹ u lai sarang sěngkatau e makaparingang si sire kapia mapul᷊ẹ. 19Bahosu e tawe kaundangeng dingangu manga lesẹ u e tawe mapia. Kěbị taumata apan nakaringihẹ̌ habaru kaghagholangu e měmpẹ̌tal᷊okạu ral᷊uasẹ̌ e. Batụu kěbị taumata kụ seng nasigěsạ ual᷊ingu karal᷊akisu kụ tawe masue ene.
Currently Selected:
NAHUM 3: SXN
Highlight
Share
Copy
Want to have your highlights saved across all your devices? Sign up or sign in
