HABAKUK 1
1
1Seng ini e wal᷊on papaul᷊ị nilahẹu Mawu su Nabi i Habakuk.
I Habakuk kụkěndungu hal᷊ẹ̌ u tawẹ kaadile
2O Mawu, sarang kạděngụ e iạ harusẹ̌ makitul᷊ung? Angerẹ i Kau e sarung makaringihẹ̌ dingangu měngambang si kami wọu pěnananědạ? 3Unụ e iwẹ̌balanʼU e iạ makasilo kereng kal᷊awọ e kararal᷊akisẹ̌ e tangu? Ěllụe i Kau e makạdaragẹ̌ makasilo kereng kal᷊awọ e baebe? Suapa mang piạ kaghagholang dingangu pẹ̌tatatingkaị, pẹ̌kakakoka ringangu pẹ̌dararendehẹ̌. 4Toratẹ̌ e tawe sasěmpikang dingangu tawẹ běke kụ deng mapakateing kạadilẹ̌ e. Taumata ral᷊akisẹ̌ e mạkoạ su horone wọu taumata kụ matul᷊idẹ̌ e, tangu kạadilẹ̌ e ipẹ̌kẹ̌kal᷊intuing.
Sasimbahu Mawu
5Bọu e Mawu něhengetang su manga umatʼE, ”Tatinganeko manga wansa kụ mạngělikụ si kau e, tangú i kamene sarung mạherang dingangu rumal᷊inaụ. Batụu su temponu e Iạ sarung mẹ̌koạ manga apa kụ tawe pangimangeng i kamene kereu kětạeng ipaul᷊ị si kamene. #MMR. 13:41 6Tau Babel kụ marangěngisẹ̌ dingangu mal᷊ibutu e sarung Takụ iapakakoạ bansa piạ kawasane. I sire měmpẹ̌tẹ̌tente sụsěbang bọu wanuan sire kụ mạngělikụ kasěllahu dunia waugu mapẹ̌samal᷊ẹ u manga wansa wal᷊ine. #2Rat. 24:2 7Suapan tampạ i sire makạkaděntan takụ; dingangu kal᷊aobotẹ̌ i sire měmpạnighe kěbị tiahane tabeạu katewe apạewen sěndal᷊engu ěnning i sire.
8Kawal᷊one limembong kahawese wọu masang kambal᷊o, dingangu limembong karangěngise wọu ral᷊ugẹ̌ kụ seng karal᷊unuse. Buntuangu piạ kawal᷊one nahunděnta wọu wanua mararau; i sire riměnta kere kalěmba kụ měnahedẹ̌ kinaěnge.
9Sordadone měngalo mẹ̌deạu mẹ̌tingkaị, kěbị taumata e ghụgiantang makasilo rarěntan sire.#1:9: Kasariange mangal᷊ene: kěbị taumata ... rarěntan sire. Apang kinataweng i sire e tawe kinarekenang kal᷊awọe. 10I sire mělẹ̌heghesẹ̌ manga ratu ringangu rụl᷊ěgeng manga sawohị mararangẹ e. Kẹ̌koatenge tawẹ mangal᷊ene apang bal᷊oarị, dingangu niambunge ěntana kụ mase nipul᷊ahone wal᷊oarị ene. 11Kụ kere kasahawụ u anging tangú němpẹ̌buạ e apan taumata kụ měmpạngumbala katoghase hala ene.”
I Habakuk saụ kapia kụkahiorọ su Mawu
12 Mawu, nạung deng kal᷊imona e i Kau kai Ruata. I Kau e Ruataku susi ringangu kakalẹ̌.#1:12: Kakalẹ̌: Su teksẹ̌ u Ibrani: i kami e sarung tawe mate. Mawu Ruataku ringangu měngangěllungku, wansang Babelẹ̌ e nipile-Nu ringangu pinakahasa mědeạu měhukung si kami. 13Kaiso kereapa i Kau makararagẹ̌ měmanda taumata raral᷊akisẹ̌ matatingkaị ene? Kai wal᷊inewe tumanịu susi i Kau e ipěmanda kararal᷊akisẹ̌ tangu? Kai wal᷊inewe makạpěndang mạsahe makasilo tawẹ kạadile tangu? Kụ kawe unụe i Kau e měngkawe marěmasẹ̌ kereu piạ taumata adilẹ̌ e pakawihua su taumata duruhaka?
14Unụe taumata e ikẹ̌koạʼU kere kinạ su laudẹ̌, dingangu kere binatang sụsahomang kụ tawẹ apa měngangahạ e? 15Tau Babelẹ̌ e měngẹ̌ngal᷊ạ taumata ringangu wawaẹ, kụ i sire e tabidạu kinạ. I sire ene e lẹ̌hiudang sol᷊ong dal᷊ungu manga somạ dingangu tau Babelẹ̌ e měbẹ̌batụ kapulu ringangu manga ěbạ i sire. 16Mase somạ ene sẹ̌subaěng i sire ringangu ghẹ̌gělirang i sire e sasěmba ghaghěllị, batụu ual᷊ingu somạ ene i sire e makạěbạ asẹ̌ki mẹ̌dẹ̌dal᷊embo ringangu masukụ.
17Unụ e wue i sire měngkai tiniạ měngasa pedan sire mase mamate apam bansa, tawẹ ampunge?
Currently Selected:
HABAKUK 1: SXN
Highlight
Share
Copy
Want to have your highlights saved across all your devices? Sign up or sign in
