MATIUS 9

Mawu Yesus napakapian tau nipeosẹ̌

(Mrk. 2:1-12; Luk. 5:17-26)

1Mawu Yesus simakẹ e su sakaeng, kụ liměbạe rano, kụ nẹ̌sul᷊e su soanʼE.#9:1: SoanʼE: Kapernaum (kakělla pasalẹ̌ 4:13). 2Paị sene taumata e němpanondạen tau nipeose su anunʼE, rụdal᷊oka su těpihẹ̌. Tangu Mawu Yesus nakasilọe kasarian pangangimang i sire e, kụ i Sie něhengetangke su tau peosẹ̌ ene angkuěng, ”Pakatarimạe naung u amang! Kal᷊awọu rosanu e seng niampungang.”

3Manga mananětirong agama němpẹ̌bẹ̌bera su ral᷊ungu naung i sire angkuěng, ”Tau ěndaịe kai mělẹ̌hodatẹ̌ Mawu Ruata e!”

4Mawu Yesus e masingkạu tiněnnan sire, kụ i Sie něhengetang, ”Kai unụe i kamene měmpẹ̌tẹ̌tiněnna ral᷊akị? 5Sude něngalembon nẹ̌tatarang: mẹ̌berau, ’Dosanu e seng niampungang’ arau, ’Pẹ̌bangungke, kụ dal᷊eng’? 6Arawe Iạ kai mapakasingkạ si kamene u su dunia ini e Ahusʼu Taumata kai kawasa mangampung dosa.” Tangu Mawu Yesus něhengetang su tau peosẹ̌ e, ”Pẹ̌bangungke, sapuạe ral᷊okaěngu kụ kapul᷊ẹ e!”

7Tau peosẹ̌ e nẹ̌bangung dingangu napul᷊ẹ sarang bal᷊ene. 8Tangu taumata l᷊awọ nakasilọe hal᷊ẹ̌ ene, něngkatakụe kụ němpẹ̌dalọe Mawu Ruata watụ u seng nangonggọu kawasa kerene kasariane su taumata.

Mawu Yesus kimui si Matius

(Mrk. 2:13-17; Luk. 5:27-32)

9Ene wọu e Mawu Yesus naněntangken soa ene. Kạpahundal᷊enge i Yesus nakasilọe maghaghělle bea sěngkatau mạiang su wal᷊em pěmamaehang bea e arenge i Matius, kụ něhengetang si sie, ”Tol᷊eko Siạ!”

Tangu i Matius nẹ̌buạe kụ timol᷊ẹ e Mawu Yesus.

10 # Luk. 15:1-2 Piạ e Mawu Yesus kạkaěnge su wal᷊eng Matius,#9:10: Su wal᷊eng Matius: arau su wal᷊ene (kụ kai wal᷊eng Yesus). narěntạe lai i sire maghaghělle bea riọ natimu, ringangu apang lẹ̌ěnnaěngu taumata l᷊awọe kai taumata raral᷊aị, kụ nahungkaěng sěngkakaěng dingangu Mawu Yesus dingangkewelain manga muritʼE. 11Piạ i sire tau Farisi nakasilo hal᷊ẹ̌ ene, nakiwal᷊ọe su manga muritʼu Mawu Yesus, ”Kawe unụe mananěntirong kamene kawe kụkaěng dingangu maghaghělle bea ringangu taumata warạdosa?”

12Mawu Yesus nakaringihẹ̌ kakiwal᷊on sire mase simimbang angkuěng, ”Mal᷊ahuwekae tawe wahal᷊uasʼu piạ mangangundang e, pianẹ e apan masasakị. 13#Hos. 6:6; Mat. 12:7 Sẹ̌suieko měnsang apa mangal᷊eng ayetʼu Winohẹ Susi ini: ’Iạ e kai měgẹ̌gausẹ̌, tatal᷊ěntụ, bal᷊inewe sasěmba binatang’. Batụ u Iạ diměnta wal᷊inewe kumui apam mal᷊aadilẹ̌ kaiso kawe apang barạdosa e.”

Hal᷊ẹ̌ u pẹ̌tatělling

(Mrk. 2:18-22; Luk. 5:33-39)

14Bọu e manga tumatol᷊e si Yohanes Mananahani e němpẹ̌děnta su anum Mawu Yesus, kụ nakiwal᷊ou, ”Kawe unụe i kami ringangu tau Farisi e měpẹ̌puasa wue, arawe manga muritʼi Tuang kawe tala?”

15Mawu Yesus simimbang, ”Kereapa ngae su tiněnnan kamene? Botonge sake su sal᷊iwangu pẹ̌kakawinge lumahunsusa kereu kaghiang esẹ e wědang ene sutal᷊oaran sire? Tantu tala wue! Kai hědowen su tempong kaghiang esẹ e al᷊akeng bọu anun sire. Kụ su tempo ene wuhụe i sire měmpẹ̌tělling.

16Tawẹ taumata měnděpelʼu ririsẹ̌ buhu su lakụ těbe. Batụ u ririsẹ̌ ene kai měngahimběsọ dingangu makaghehẹ lakụ ene hakịu makakatapeng gehẹ e limembong kasariane. 17Kerene lai tawẹu makapěndal᷊ingu anggorẹ̌ buhue su ral᷊ungu wakuhẹ̌ pisị seng těbe. Batụ u wakuhẹ̌ ene e kai mạběse ringangu magholang, mase anggorẹ̌ e mạboso. Anggorẹ̌ buhue harusẹ̌ itaho su ral᷊ungu wakuhẹ̌ lai wuhu tadeạu i rẹ̌dua ene mapiawe kěbị.”

Pẹ̌bawangungu anạ u těmbonang u wal᷊em pẹ̌kakal᷊iomanengang dingangu tau wawine nanenggehẹ̌ lakụ u Mawu Yesus

(Mrk. 5:21-43; Luk. 8:40-56)

18Piạ e Mawu Yesus kạpěhengetange su manga tumatol᷊e si Yohanes Měnanahani e, ute riměntạe sěngkatau těmbonang u wal᷊em pẹ̌kakal᷊iomanengang. I sie nẹ̌tumpěkuhẹ̌ su těngom Mawu Yesus dingangu nẹ̌bera, ”Anạku wawine wuhu-wuhu nate. Kai karimạko i Tuang deng duměnta mědeạu makapěnělidʼu l᷊imanʼU e tadeạu i sie mẹ̌biahẹ̌ kapia.”

19Ene Mawu Yesus dingangu manga muritʼE měngkatewe nẹ̌buạ kụ timol᷊e si sie.

20-21Ene kạpahundal᷊enge kai piạ tau wawine kụ seng mapul᷊o dua su taunge karěngụe masakị dẹ̌dal᷊engangu raha, himaung si Yesus wọu l᷊ikude. I sie mětẹ̌tiněnna u, ”Manịeng kětạeng manenggehẹ̌ kakingkaengʼE, iạ e mang sarung mapia.” Mase i sie nanenggehe humbung kakingkaengu Mawu Yesus.

22Su orasẹ̌ ene lai Mawu Yesus nẹ̌bihụe kụ nakasilo si sie, kụ nẹ̌bera u, ”Pakatarimạ bue inang! Ual᷊ingu pangangimangu e nakapia si kau!” Ene tau wawine e nul᷊ẹ e wọu orasẹ̌ ene.

23Bọu e Mawu Yesus narangengke su wal᷊en těmbonang u wal᷊em pẹ̌kakal᷊iomanengange. Sarạeng i Sie nakasilo měmamusikẹ̌ u pěhampugang dingangu taumata l᷊awọ měmpẹ̌gẹ̌ganohạe, 24i Sie něhengetang si sire, ”Sẹ̌bangko kěbị i kamene! Dariọ ini e tawe nate; i sie kětạeng mětẹ̌tikị.”

I sire kěbị němpěheghesẹ̌ Mawu Yesus. 25Kụ sarạeng taumata l᷊awọe nahunsẹ̌bang, tangu i Sie simuẹ̌ e su ral᷊ungu kamarʼu rariọ e, mase nangumpaedẹ̌ limane. Tangu rariọ e nẹ̌bangungke. 26Habarẹ̌ ene e nasěsahe su kaguwạu wanua ene.

Mawu Yesus napakapian tau wuta ruang katau

27Kutẹu, sarạeng i Yesus dimal᷊eng bọu ene, i Sie kai niwatukangu tau wuta ruang katau kapẹ̌kuine angkuěng, ”Tal᷊ěntụkong kandua e Ahusʼi Daud!”

28Sarạeng i Yesus simuẹ̌ su wal᷊e, tau wuta rarua e himaungke si Sie. Ene i Yesus nakiwal᷊ọe si rẹ̌dua, ”I rua mangimang u Iạ makakaul᷊ewen dua wọu sakịe?”

”Mangimang Tuang!” angkuěng i rẹ̌dua.

29Mase Mawu Yesus nanenggehe matan dẹ̌dua apidʼu něhengetang, ”Ual᷊ingu i rua mangimang, ute kariadịe kere lẹ̌harapeng i rua.” 30Tangu i rẹ̌dua e někěllạe. Ene Mawu Yesus kai nẹ̌sẹ̌ding masěga-sěgadẹ̌ u kumbahang měhabarʼu hal᷊ẹ̌ ene si sai-sai.

31Kaiso i rẹ̌dua e mang nahundal᷊eng nẹ̌dal᷊ahabarʼu Mawu Yesus su kạguwạu wanua ene.

Mawu Yesus napẹ̌beran tau mou

32Piạ i rẹ̌dua kạpahul᷊intụe, tangu piạko i anu mou nisawelangu rohkẹ̌ dal᷊akị niěntudẹ̌ su anung Yesus. 33Mawu Yesus nanokol᷊eng rohkẹ̌ dal᷊akị e, kụ i anu mou e nakawerạe. Taumata l᷊awọe něngkaherangke ringangu němpẹ̌bera u, ”Kakakoạ kere ini e tawe kinasilo sarang sěnsul᷊e su Israel e!”

34 # Mat. 10:25, 12:24; Mrk. 3:22; Luk. 11:15 Kai tau Farisi e němpẹ̌bera u, ”kai těmbonang u rohkẹ̌ dal᷊akị e nangonggọu kawasa si Sie mẹ̌deạu manokol᷊ẹ̌ manga rohkẹ̌ dal᷊akị e.”

Mawu Yesus timal᷊ěntụ nakasilo taumata l᷊awọ e

35 # Mat. 4:23; Mrk. 1:39; Luk. 4:44 Kerene raral᷊engu Mawu Yesus bọu soa sěmbaụ sarang soa wal᷊ine, wọu kampong sěmbaụ sarang kampong bal᷊ine. I Sie mạněntiro su manga wal᷊em pẹ̌kakal᷊iomanengang, dingangu mělẹ̌habarʼu Injilẹ̌ mạanun kararatuang u Mawu. I Sie mapakạpian taumata wọu kal᷊awọu haghin sakị dingangu kurangu wadang. 36#Pẹ̌t. 27:17; 1Rat. 22:17; 2Kar. 18:16; Yeh. 34:5; Za. 10:2; Mrk. 6:34 Ene Mawu Yesus tụtal᷊ěntụ i sire, watụ u i sire měngkatewe nionganenge ringangu tawe makapẹ̌kapura, mẹ̌sul᷊ungkewen domba tạ měndal᷊ukade. 37#Luk. 10:2 Kụ i Yesus něhengetang su manga muritʼE, ”Paměnsakenge mal᷊awọ bue, arawe měmaměnsạe kawe mahal᷊i. 38Tangu pẹ̌dorongke su taghuangu waelẹ̌ e tadeạu měndolohʼu mamaměnsạ ipaměnsạ.”

Currently Selected:

MATIUS 9: SXN

Highlight

Copy