MATIUS 8

Mawu Yesus napakapian sěngkatau piạ sakịe su pisị makạtatakụ

(Mrk. 1:40-45; Luk. 5:12-16)

1Ene Mawu Yesus narěsungke wọu wul᷊ude e, i Sie nitol᷊eěngken gapaěngu taumata l᷊awọ. 2Arakutẹu riměntạe tau piạ sakịe su pisị makatatakụ.#8:2: Piạ sakịe su pisị makatatakụ: Tumuhụ atorangu agaman Yahudi; sakị ini makạdiadi taumatane tawe wotonge meněmba Ruata su tampạ u pẹ̌kakal᷊iomanengang. (Kakělla su kamusẹ̌.) I sie nẹ̌suba su těngom Mawu Yesus, kụ nẹ̌bera, ”Tuang, kereu wotonge, apakaul᷊eko iạ.”

3Tangu Mawu Yesus nanenggeheng limane si sie apidʼu kạpěberane, ”Iạ mapulu. Kapiạe!” Kụ orasẹ̌ ene lai sakịe nailang. 4#Imng. 14:1-32 Mase angkuěngu Mawu Yesus si sie, ”Pakatahěndung! Abe pẹ̌běke si sai-sai. Kaiso pětěngkatodẹko su imang kụ gause i sie pěnahutěngadẹ̌kong kau u, kawe seng naul᷊e. Bọu ene pangěntudẹ̌be sasěmba ilẹ̌oron Musa e, makoạ tatahutěngadẹ̌ su těngon sire u i kau e mamben těngadẹ̌ seng naul᷊e wọu sakị!”

Mawu Yesus napakapiang ěllangu mananěmbonang u sordadong Roma

(Luk. 7:1-10)

5Sarạeng Mawu Yesus nasuẹ̌ e su Kapernaum, piạ e těmbonangu sordadong Roma e riměnta mẹ̌sombang i Sie, kụ kimahiorọe. 6”Tuang,” angkuěngu těmbonang ene, ”ěllangku e masakị su wal᷊e. I sie nipeose, rụdal᷊oka kụ mambeng matědụ.”

7Angkuěngu Mawu Yesus, ”Iạ e tamai mapakapian sie.”

8”Seng tawahal᷊uasẹ̌ i Tuang,” angkuěngu těmbonang ene, ”Iạ e tawe hinone manarimạ i Tuang su wal᷊eku. I Tuang pěhengetangke ěllangku e seng mul᷊e. 9U iạ e mal᷊aing harusẹ̌ sumasuměllung su parentang těmbonangku e. Kụ su al᷊ungkue piạ l᷊ai manga mẹ̌sasekẹ, kụ mal᷊aing su al᷊ungu kawasaku e. Kereu iạ měndolohʼu sěngkatau sordado, ’Dakọko!’ ute i sie mal᷊aing tamai. Iạ mẹ̌berạe wue su wal᷊ine u, ’Damahiko!’ i sie mal᷊aing damahi; kụ kereu iạ mẹ̌parenta ěllangku e, ’Koạko ini!’ ute i sie mang mẹ̌koạ.”

10Suapan Mawu Yesus nakaringihẹ̌ apan niweran těmbonang u sordado ene, i Sie rimal᷊inaụe tạ sihinge. Mase i Sie něhengetang su taumata apan mạhuntol᷊e si Sie, ”Taumatawe lai wotonge ini! Maninglai bọu tal᷊oaran taumatan Israel e, Iạ e mambeng ta nakahombang pangangimang kere ini kasěllahe! 11#Luk. 13:29 Mambeng kahěngang! Lawọ taumata sarung duměnta wọu sěmběkan daki ringangu wahẹ kụ měmpahul᷊uasẹ̌ dingang i Abraham, Ishak ringang i Yakub su ral᷊ungu Runian Duata Wuhu.

12 # Mat. 22:13, 25:30; Luk. 13:28 Arawe i sire kụ mạngakum batangenge hinong makoạ kawanuan Duata e sarung iwahung su ral᷊ungu kararěndung su l᷊ikude. Sene sarung piạ pal᷊ahunsangị dingangu kasasigěsạ.” 13Mase Mawu Yesus něhengetang su těmbonang u sordado ene, ”Kapul᷊ẹ e, ual᷊ingu pangangimangue apang ikẹ̌kahiorọ u e sarungbe mariadi.”

Kụ orasẹ̌ ene lai ěllange napiạe.

Mawu Yesus napakapian taumata l᷊awọ

(Mrk. 1:29-34; Luk. 4:38-41)

14Mawu Yesus e nakoạ sarang bal᷊em Petrus. Sene i Sie nakasilọe si ninang i Petrus kinaratingang, kạl᷊ěhabe sural᷊okaěng. 15Tangu Mawu Yesus nanenggehẹ̌ l᷊imane, kutẹu l᷊ěhabe nailangke. I sie nẹ̌bangung kụ nanětạe nẹ̌tangkiang Mawu Yesus.

16Sarạeng kạkabawěllone taumata e němpangěntuden sire lawọ apan niwal᷊iuang u rohkẹ̌ dal᷊aị e su anum Mawu Yesus. Kụ kětạewen dingangu wawera pẹ̌sěngkamohong, Mawu Yesus mạnokol᷊u manga rohkẹ̌ dal᷊aị e dingangu mạpakapian kěbị apan taumata masakị. 17#Yes. 53:4 Mawu Yesus měkẹ̌koạ kěbị ene, kụ ual᷊ingu ene ute nisěhụe apan nịbaweran Nabi Yesaya, u, ”I Sie manal᷊udẹ̌ tědụ i kitẹ dingangu mapakapian sakị i kitẹ e.”

Taumata apan mapulu tumol᷊e Mawu Yesus

(Luk. 9:57-62)

18Měngkate mal᷊awọ-l᷊awọ taumata mělẹ̌liwung Mawu Yesus e. Sarạeng Mawu Yesus nakasilọe si sire ene kěbịe, i Sie nangorọe su manga tumatol᷊ene apạl᷊iu rano e. 19Mase sěngkatau mananěntirong agama e himaung si Sie kụ nẹ̌berạe, ”Tuang Guru, iạ mapulu tumol᷊e si Tuang balạewe měnsang sarang a!”

20Mawu Yesus simimbangu, ”Ral᷊ugẹ̌ e piạbe liange, ringangu manụ u winalangenge piạbe sal᷊ehe, arawe Ahusʼu Taumata e tawẹu pangulelengange.”

21Mase sěngkatau tumatol᷊enʼE wal᷊ine nẹ̌berạe, ”Tuang, kereu wotonge iạ deng mapul᷊ẹ kal᷊imona měngubul᷊ʼi amangku e.”

22Arawe Mawu Yesus e kawe simimbahʼu, ”Tol᷊ẹ e Siạ, kụ balạe taumata nate e apělěbingken taumatan naten sire hala.”

Mawu Yesus napakal᷊enehu rěllang

(Mrk. 4:35-41; Luk. 8:22-25)

23Mawu Yesus simakẹ e su sakaeng kụ manga muritʼE nahunsakẹ e ringang. 24Sěngkělěndị u piạ anging maihạ-ihạ timangga su rano e hakịu sakaenge tẹ̌takal᷊eng u wělladẹ̌ e. Su tempo ene Mawu Yesus e kạpěhědange. 25Ene manga muritʼE himaungke kụ namukọe si Sie. ”Tuang! Ambangeko! I kitẹ kai miwonohẹ̌!” angkuěng i sire.

26”Kawe unụe i kamene něngkatakụ?” angkuěngu Mawu Yesus. ”Kai kadodọ pangangimang i kamene si Siạ e!” Bọu e i Sie rimarisị e kụ namal᷊ěndihẹ̌ anging dingangu rano e. Tangu měngkatewe nal᷊ene-l᷊enehẹ̌.

27Manga muritʼu Mawu Yesus něngkaherang. Angkuěng i sire, ”Kai taumata kereapa ěndaịe, kal᷊ingung anging dingangu rano e kawe mạhimang si Sie!”

Mawu Yesus napakapian duang katau niwal᷊iuangu rohkẹ̌ dal᷊aị

(Mrk. 5:1-20; Luk. 8:26-39)

28Mawu Yesus nahumpạe su sěmbẹ̌kan dano su soang Gadara. Paị sene i Sie nihaungangken taumata niwal᷊iuangu rohkẹ̌ dal᷊aị duang katau. I rẹ̌dua e kai taumata makạtatakụ tạ sihinge, hakịu tạ u sarang sěngkatau nakal᷊awesʼu ral᷊eng ene. 29I sire nahunsẹ̌bang bọu manga ral᷊ungu wangkang kubul᷊ẹ̌ kạpěmansage, ”Ahusʼu Ruata, sarung pẹ̌kapuranengʼU i kami e? Kai seng mapulu manịgěsạ si kami maningbe wẹ̌dang bal᷊ine tempone?”

30Ene tawẹ karaune wọu ene, piạko ghapaěngu wawi mal᷊awọ-l᷊awọ kạpẹ̌dẹ̌deạe kaěnge. 31Tangu manga rohkẹ̌ dal᷊aị e němpẹ̌kal᷊iomanengke si Sie angkuěng, ”Kereu i kami e itokol᷊ʼu, ute rolohẹ̌ko i kami pasuẹ̌ su ral᷊ungu manga wawi tamai e.”

32”Dakọe!” angkuěngu Mawu Yesus. Manga rohkẹ̌ dal᷊aị e nahunsẹ̌bangke wọʼi rẹ̌dua e, kụ nahunsuẹ̌ e su manga wawi ene. Kutẹu manga wawi e nahuntal᷊angke apidʼu nahuntumpa wọʼu wiwihu tagial᷊u sarang dano e, mase něngkal᷊ěmisẹ̌.

33Měndal᷊ukadẹ̌ bawi e nahuntal᷊ang sol᷊ong soa, kụ němpẹ̌běkem patikụ apan nariadi su wawi ringangu su ruang katau niwal᷊iuangu rohkẹ̌ dal᷊aị e. 34Tangu sěngkasoange měngkatewe nahunsěbang naněnsomahẹ̌ Mawu Yesus. Su tempong i sire nakasilọe Mawu Yesus, i sire němpẹ̌dorongke sěngapam botonge tadeạu i Sie maněntang bọu wanuan sire.

Currently Selected:

MATIUS 8: SXN

Highlight

Copy