MATIUS 2

Darěntang mapapande wọu sěmbẹ̌kan Daki

1Mawu Yesus kinawantelẹ̌ su soam Betlehem su wanuang Yudea su tempon pẹ̌paparentan Datu i Herodes. Su orasẹ̌ ene kai piạ mapapandeng bituing pirang katau wọu sěmbẹ̌kan daki nahunděnta su Yerusalem. 2I sire němpẹ̌kibal᷊o su apan tampạ, ”Kai su apa Rariọ buhu nawantelẹ̌ kụ sarung makoạ datun tau Yahudi e? U i kami e kai nakasilo wituing tatialane, siměbang bọu sěmběkan daki, kụ i kami e riměnta mědeạu mẹ̌suba si Sie.”

3Ene sarang Datu i Herodes nakaringihẹ̌ habarẹ̌ u kai piạ datu wal᷊ine nawantelẹ̌ makoạ datun tau Yahudi e, ute i sie himěkosẹ̌ tạ sihinge, dingangu l᷊ai kal᷊awọu taumata su Yerusalem. 4Tangu i sie nakireạeng kěbị těmbonangu imang dingangu manga mananěntirong agama tau Yahudi apětẹ̌tampung. Mase i sie nakiwal᷊o si sire, ”Kai suapa sarung kawantelangu Ratun nikẹ̌dom Mawu Ruata e?”

5I sire simimbang, angkuěng, ”Su soam Betlehem, su wanuang Yudea. U kai kere ini niwohẹ u sěngkatau nabi e,

6 # Mi. 5:1 ’Ei Betlehem, su wanuang Yehuda,

i kau mambeng bal᷊inewe kakạdọdokangu soa wọu tal᷊oaran kěbị soa su Yehuda.

Ual᷊ingu kai wọu i kau e sarung duměnta sěngkatau pangahạe

kụ sarung měngahạ kawanuaku Israel.’ ”

7Sarạeng nakakasingkạ kerene i Herodes kimuịe mapapandeng bituinge bọu sěmbẹ̌kan daki mapěni-pěnisẹ̌. Mase i sie nakiwal᷊o si sire, kai nạung dokeng kạnge wituing ene kinasilo. 8Bọu ene i sie rimolohʼi sire sarang Betlehem kụ timanata, ”Dakọe kụ sẹ̌suieko Rariọ ene pakapia-pia. Kụ kereu Rariọ ene kahombangeng i kamene, ute habareko iạ e, tadeạu iạ e mal᷊aing tamai makapẹ̌suba si Sie.”

9-10Mase němpẹ̌dal᷊engke i sire. I sire saụewe nakasilo wituing nạung seng bọu kinasilon sire kangerẹ su sěmběkan daki. Kụ měngkate mal᷊ua-l᷊uasẹ̌ i sire mạmanda wituing ene! Bituing ene mạngalimona si sire, bọu ene timaing su lantehʼu tampạ u Rariọ ene. 11I sire nahunsuẹ̌ su ral᷊ungu wal᷊e ene kụ nakasilo Rariọ ene ringang i Maria, i ninangʼE. I sire němpẹ̌těngkasanạe ringangu němpẹ̌subạe Rariọ ene, kụ němpangukahẹ̌ tampạ u arětạ i sire, mase němpangonggọu sasěmba wul᷊aeng, kamania, ringangu mur.#2:11: Kamania: Kakoạ buwụ arěgane mal᷊ěgadẹ̌, nikoạ bọu ghahị u kalu sěmbaụ. Mur: Pul᷊ụ kụ seng namara ringangu mawěngi wọu ghahị u kalu sěmbaụ. (Kakělla su kamusẹ̌). 12Tangu Mawu Ruata e nẹ̌gěllịu ingate si sire su ral᷊ungu ipi tadeạu abe pẹ̌bal᷊ị sarang anung Herodes. Kụ i sire něngkapul᷊ẹ e nẹ̌batụ dal᷊eng bal᷊ine.

Nělingkạ sarang Misirẹ̌

13Su apan manga mapapandem bituing něbuạe, tangu malạekatʼu Mawu nẹ̌těngkasilom batangenge si Yusup su ral᷊ungu ipi. Malaekatẹ̌ e nẹ̌bera, ”I Herodes e měkẹ̌karaki u mědeạ Dariọ ene pateěng. Ual᷊ingu ene, pěbangungke, ku lingkạko Rariọ ene dẹ̌duan ninangʼE sarang Misirẹ̌. Kěngkatanạe sene sarang Iạ mẹ̌kui kapia si kau.”

14I Yusup něbangungke, kụ su hěbi ene apidẹ̌ nịbawawane Rariọ ene dingang i ninangʼE niingkạ sarang Misirẹ̌. 15#Hos. 11:1 I sire nẹ̌tanạ sene sarang i Herodes nate.

Tangu nariadịe kere nihengetangʼu Mawu, limiu nabinʼE, kere ini, ”Iạ měkẹ̌kui Ahusẹ̌ku wọu Misirẹ̌.”

Pěmamate manga rariọ

16Sarạeng i Herodes nakaěnnạe u mapapandem bituing bọu sěmběkan daki ene němpangakal᷊ẹ̌ si sie, tangu i sie měngkatewe limangehẹ̌ marasai. Mase i sie nẹ̌parenta pěmẹ̌mate kal᷊awọewen manga rariọ esẹ apang umure rua taung tanaẹ su Betlehem ringangu apan soa mạngělikụ e. Ene nipẹ̌tatahinong habarẹ̌ kụ kinaěbakeng bọu mapapandem bituing ene mạanun orase wituing ene kinasilo.

17Tangu nisěhụe kere nạung nitẹ̌bal᷊ʼu Nabi Yeremia u;

18 # Yer. 31:15 ”Su Rama kinaringihẹ̌ tingihu ral᷊ungkang,

kakuhau ore lai sasangị.

I Rahel lụl᷊ungkangu manga anạe;

i sie mạdiri hiborang batụ u i sire kai seng natạdise.”

Němpẹ̌sul᷊e wọu Misirẹ̌

19Sarạeng i Herodes nate, su tempong i Yusup bẹ̌dang su Misirẹ̌, piạ malạekatʼu Mawu e nẹ̌těngkal᷊ahẹu watangenge kapia si Yusup su ral᷊ungu ipi. 20Malạekatẹ̌ e nẹ̌berạe, ”I sire apan mapulu měmpamate Rariọ e seng něngkate. Ual᷊ingu ene pẹ̌bangungke, al᷊ạko Rariọ ene dẹ̌duang ninangʼE kụ pẹ̌sul᷊ẹ e sarang Israelẹ̌ e.” 21I Yusup nẹ̌bangungke, bọu e nẹ̌bawa Rariọ ene dẹ̌duam Maria nẹ̌sul᷊e sarang Israel.

22Kutẹu samurine i Yusup e nakaringihẹ̌ u i Arkelaus, anạ i Herodes seng nakarol᷊osẹ̌ si amange naratu su wanuang Yudea. Tangu i Yusup matakụ makoạ sarang ene. Sarạeng i sie nakaěbạe tatul᷊adang Mawu nangělembo su ral᷊ungu ipi, i sie něngingkạe sarang banuang Galilea. 23#Mrk. 1:24; Luk. 2:39; Yoh. 1:45 Sene i sie nẹ̌tanạ su soa isẹ̌sěbạ Nazaret. Kụ mang nisěhụ kere nạung niweran manga nabi e mạanung Dariọ ene: ”I Sie sarung isěbạ Tau Nazaret.”

Currently Selected:

MATIUS 2: SXN

Highlight

Copy