MATIUS 17

Mawu Yesus mapakawantugẹ̌

(Mrk. 9:2-13; Luk. 9:28-36)

1 # 2Ptr. 1:17-18 Ěnnungu ěllo samurim Mawu Yesus namaringang si Petrus dẹ̌duang Yakobus dingangu tuarine i Yohanes, němpěněntani sol᷊ong bul᷊ude marangẹ sěmbaụ. 2Su kěllaěng i sire, Mawu Yesus kai nẹ̌bal᷊ui ghahịe: GatinʼE sụsěnnang kere matangěllo ringangu pakeange kụkerong mawira. 3Mase i sire těllu manga muritʼE nakasilo si Musa rẹ̌duan Elia mạhumbisara ringangu Mawu Yesus. 4Mase i Petrus nẹ̌bera su Mawu Yesus, ”Mawu, kai kapaelẹ̌ pěndange i kitẹ su tampạ ini. Kereu Mawu mal᷊uasẹ̌ ute iạ e reng mamětị selo tatěllu sini, sěmbaụ baugu Mawu, sěmbaụ baugʼi Musa, ringangu sěmbaụewe lai e waugʼi Elia.”

5 # Pěnd. 22:2; Pang. 18:15; Mzm. 2:7; Yes. 42:1; Mat. 3:17, 12:18; Mrk. 1:11; Luk. 3:22 Kutẹu i Petrus deng kapẹ̌bẹ̌berane, tangu winawa matuala-tualagẹ̌ e natimbuhungke si sire kụ bọu ral᷊ungu winawa ene kinaringihe tingihẹ̌ měbẹ̌bera, ”Ini e kai Ahusẹ̌-Ku ikẹ̌kěndagẹ̌. I Sie kai makạl᷊ahimpulu naungku e. Daringihe i Sie!”

6Lěpase manga muritʼi Yesus himaung nakaringihe tingihẹ̌ ene, i sire měngkatewe apa něngkatakụ hakịu něngkasumagẹ̌ su ěntana. 7Arawe Mawu Yesus himaung kụ nanenggehẹ̌ si sire, ”Pẹ̌bangungke,” angkuěngʼE, ”abe kěngkatakụ!” 8Sarạeng i sire němpamandạe, i sire tawe nakasilo si sai-sai tumbạben Mawu Yesus sẹ̌sane.

9Piạ e i sire kạpahundẹ̌sunge wọu wul᷊ude ene, Mawu Yesus kai mẹ̌gẹ̌gěllịu ingate si sire, ”Abe pěmpěhabarẹ̌ si sai-sai apang kinasilong kamene buhu-wuhu, těntal᷊ang Ahusʼu Taumata e reng tawe niapẹ̌bangung bọu papatene.”

10 # Mal. 4:5 Manga muritʼi Yesus nakiwal᷊ọe si Sie, ”Kawe unụe mananěntirong agama e němpẹ̌bera u i Elia kai harusẹ̌ duměnta kal᷊amona?”

11Mawu Yesus simimbang, ”Mambeng kahěngang i Elia riměnta kụ i sie sarung měngul᷊ị kěbị. 12#Mat. 11:14 Kai Iạ e maul᷊ị si kamene, i Elia seng diměnta, arawe taumata e tawe nakakiral᷊a si sie, kaiso i sire němpẹ̌koạ si sie wal᷊ạewe kapulun sire. Kụ kerene lai i sire sarung měmpẹ̌koạ Ahusʼu Taumata.”

13Mase manga muritʼE nakaěnnạe u i Yesus měbẹ̌bisara mạanung Yohanes Mananahani.

Mawu Yesus napakapian dariọ nikasuěkangu rohkẹ̌ dal᷊aị

(Mrk. 9:14-29; Luk. 9:37-43a)

14Piạ i Yesus dingangʼi sire těllu muritʼE nẹ̌bal᷊ị sol᷊ong anun taumata l᷊awọ ene, piạ sěngkatau esẹ himaung, kụ nẹ̌tumpěkuhẹ̌ su těngong Yesus, 15ringangu nẹ̌bera, ”Tuang, tal᷊ěntụkong anạku. I sie kai nitanggaěngu sakị u wawi. Tatanggang sakị u wawi e měngkate apa makasunsara, hakịu i sie seng tawẹ pal᷊ẹ e mawunsal᷊ẹ̌ su putung arau su akẹ. 16Iạ seng bọu nangěntudʼi sie su manga muritʼi Tuang, kai i sire tawe nakapia si sie.”

17Mawu Yesus simimbang, ”Bal᷊inewe mal᷊ongkọ i kamene ini! I kamene mangkewen taumata lụl᷊awang dingangu tawe měmpangangimang. Delaing kạděngụe Iạ mẹ̌tanạ dingangʼi kamene ringangu mẹ̌tingkědang ual᷊ingʼi kamene? Mahịe tonda rariọ ene!” 18Mase Mawu Yesus e namal᷊ěndihẹ̌ rohkẹ̌ dal᷊akị su ral᷊ungu rariọ ene niapasẹ̌bang. Tangu rohkẹ̌ dal᷊akị e simẹ̌bangke, kụ dariọ ene nul᷊ẹ e lai orasẹ̌ ene.

19Bọu e manga muritʼi Yesus němpẹ̌haungke si Sie pẹ̌sěngkatau kụ makịbal᷊o si Sie, ”Tuang! unụe i kami tawe makatokol᷊ẹ̌ rohkẹ̌ dal᷊akị ene?”

20 # Mat. 21:21; Mrk. 11:23; 1Kor. 13:2 Mawu Yesus simimbang, ”Suwụ u i kamene kadodọ pangangimang e. Tahěndungeko! Kamageng i kamene piạbe pangangimang i kamene kadiongeng kere kạguwạu wakị u sawi, ute i kamene makapẹ̌bera su wul᷊ude ini, u, ’Pangal᷊ingko sarang pai!’ mambeng těngadẹ̌ bul᷊ude ini sarung maal᷊ing. Tawẹu ta ikakoạ i kamene! [ 21Kai rohkẹ̌ dal᷊akị kere ini e kětạeng botonge ikatokol᷊u kakal᷊iomaneng dingangu pẹ̌tatatělling samatang.]”

Mawu Yesus nẹ̌saụewe nẹ̌bisaran hal᷊ẹ̌ u kapapohongʼE

(Mrk. 9:30-32; Luk. 9:43b-45)

22Piạ e manga muritʼi Yesus měmpẹ̌tẹ̌tampung su Galilea, Mawu Yesus něhengetang si sire, ”Selaing tawẹ karěngụe, Ahusʼu Taumata e sarung isarakang su kawasan taumata. 23I Sie sarung pateěng, kaiso su katěllu ěllone i Sie sarungbe iapẹ̌bangung.”

Tangu manga muritʼE měngkate něngkasusa tawẹ sihinge.

Bawaehẹ̌ pajakʼu Wal᷊em Mawu

24 # Sas. 30:13, 38:26 Sarạeng Mawu Yesus dingangu manga muritʼE narěntạe su Kapernaum, maghaghělle pajak u Wal᷊em Mawu e nahunděnta anum Petrus dingangu nakiwal᷊o, ”Mananěntironu e mạmaehẹ̌be pajak u wal᷊em Mawu arau tala?”

25I Petrus simimbang, ”Mạmaehẹ̌!”

Sarạeng i Petrus e napul᷊ẹ, Mawu Yesus nakiwal᷊o si sie kal᷊amona, ”Simon, kerea su tiněnnanu e? I sai harusẹ̌ mamaehẹ̌ bea arau pajakẹ̌ su těmbonang u dunia ini e? Kawanua arau taumata raghị?”

26”Tau raghị,” angkuěng i Petrus.

”Kamageng kerene,” angkuěngu Mawu Yesus, ”pamanuane sembeng tawe wahal᷊uasʼu mamaehẹ̌ ho. 27Kai kumbahangbe i kitẹ makaněnggạ pěndang i sire ene. Kụ dakọe sol᷊ong dano pěngekẹ. Al᷊ạko kinạ nikaal᷊ạu humotonge. Su ral᷊ungu mohonge ene tangu, sarung makahombang doitẹ̌ kụ seng botonge makawaehẹ̌ pajakʼi kadua. Al᷊ạko roitẹ̌ ene kụ baehẹ̌ko pajakʼi kadua baugu Wal᷊em Mawu si sire.”

Currently Selected:

MATIUS 17: SXN

Highlight

Copy