MATIUS 18

I sai ngae kasěllaheng e?

(Mrk. 9:33-37; Luk. 9:46-48)

1 # Luk. 22:24 Su tempo ene manga muritʼi Yesus himaungke si Sie kụ nakiwal᷊o, ”I sai ngae lẹ̌ěnnaěng kasěllaheng e su tal᷊oarang kawanuan Duata?”

2Mawu Yesus kimuịe sěngkatau rariọ kadodọ, kụ niapararisị su těngon sire. 3#Mrk. 10:15; Luk. 18:17 Mase Mawu Yesus něhengetang, ”Pangimangke! U kětạeng kereu i kamene měmpẹ̌bal᷊ui kụ měngkakoạ kere manga rariọ e ute, i kamene makoạ kawanuan Duata. 4I sai mẹ̌těngkasanạu watangenge kụ mẹ̌těngkakoạ kere rariọ ini, ute i sie kai kasěllaheng e su tal᷊oarang kawanuan Duata. 5Dingangu i sai kụ manarimạ u rariọ kere ini e ual᷊ingu Iạ e, mangal᷊ene manarimạ u Iạ.”

Hal᷊ẹ̌ e makạkoạ taumata mẹ̌dosa

(Mrk. 9:42-48; Luk. 17:1-2)

6”I sai makạbodaị sěngkatau wọu taumata kakạdọdokange ini e kụ seng tawe saụ mangimang si Siạ e, ute mạpiangbe i sie ikitangu watung gilimang su l᷊ehẹ e bọu e iwontol᷊ẹ̌ su l᷊audẹ̌ maral᷊ung. 7Kai kạěngkěhang bue dunia ini ual᷊ingkeng apan makạbodaị taumata měmpẹ̌dosa. Kahěngang bue kěbị-kěbị e mang těbe ene, kaiso kạěngkěhang bue i saing makạkoạ ene!

8 # Mat. 5:30 Kereu l᷊imanu arau l᷊aedʼu kawe makạbaradosa si kau e, ute potọe kụ děmmẹ. Mapiangbe i kau měbẹ̌biahẹ̌ dingangu Ruata tawẹ l᷊imanu sěmběka arau l᷊aedu sěmběka, kai sul᷊ungu i kau irěmmẹ su ral᷊ungu putung u naraka ringangu l᷊imanu arau l᷊aedu ruam běka. 9#Mat. 5:29 Kụ kereu matanue kawe makạdiading kau warạdosa, ute lěsạe kụ hipẹ. Mạpiangbe i kau měbẹ̌biahẹ̌ dingangu Ruata kụ tawẹ matanu sěmbẹ̌ka, sul᷊ungu irěmmẹ su naraka ringangu matanu ruam běka.”

Papinintun Domba nailang

(Luk. 15:3-7)

10”Pakapia wue! Kumbahang měhinakang su sarang sěngkatau wọu taumata kakạdọdokange ini. U pẹ̌tahěndung, batụ u manga malạekatʼi sire sidutu mang ene su těngong Amang-Ku su Sorga.

[ 11#Luk. 19:10 U Ahusʼu Taumata e kai riměnta waugʼu měngambang apan nailang!]

12Kereapa su tingirangu? Kereu piạ u sěngkatau piạ dombane mahasụ, kutẹu sěmbaụe kawe nailang, kai a koateng e? Nal᷊ahẹu i sie reng maněntangu dombane siom pul᷊o sio e su wawul᷊urange mase tamai mědeạ sěmbaụ kụ nailang e. 13Kụ kamagengu sembeng kareakeng domba ene, ute – pangimangke Siạ – u i sie kai sarung nangělembo lumuasẹ̌ su sěmbaụe wọu siom pul᷊o sio wal᷊ine kụ tawe nailang. 14Kerene lai i Amangu#18:14: I Amangu: Binohẹ pira-pira nạung kal᷊imona: I Amangku. su Sorga e mạdiri piạ u sěngkatau wọu taumata apan buhụewe mangimang si Siạ e miwuhị.”

Kereu anạ u sěngkataunue nẹ̌dosa

15 # Luk. 17:3 ”Kereu anạ u sěngkataunue nẹ̌dosa su těngonu#18:15: Su ral᷊engu winohẹ pira-pira nạung kal᷊imona e tawẹ apa: su těngonu. ute, kakoạko sol᷊ong anune kụ pělahẹkon pẹ̌sasal᷊ane. Kụ koạko ene pakapěnisẹ̌ kụ pianẹ e i rua hala e masingkạ. Kereu i sie tumuhụ manga waweranue ute, nẹ̌barauntu i kau e nakawol᷊eng kapia anạ u sěngkataunue. 16#Pang. 19:15 Kai kereu tala e ute, saụko l᷊ai pamaringang sěngkatau arau ruang katau. U su ral᷊ungu Winohẹ Susi mạbawohẹ, ’Mẹ̌těngkahal᷊i rarua arau těllungkatau sahidi ipẹ̌nahuntěngadẹ̌ sěngkatau kaěnsilangu pẹ̌sasal᷊a.’

17Kereu i sie tawe manarimạ u sasasan sire ene ute pěhabarẹ̌kong hal᷊ẹ̌ ene su jamaatẹ̌. Kụ samurine, kereu i sie tawe manarimạ u sasasang jamaatẹ̌ ute koạe i sie al᷊ingkai maghaghělle pajakẹ̌ dingangu al᷊ingkai sěngkatau wẹ̌gam Mawu Ruata.”

Apan tawe wotonge ringangu hinone

18 # Mat. 16:19; Yoh. 20:23 ”Kasingkạko: Apang isẹ̌sěding i kamene su dunia e ute, mal᷊aing isẹ̌sěding su sorga. Dingangu apan ipahuntěngadʼi kamene su dunia e, ute mal᷊aing ipahuntěngadẹ̌ su sorga.

19Dingangu kasingkạko l᷊ai: Kamageng su tal᷊oarang kamene ini kụ piạ duang katau kụ mẹ̌sěngkanaungu apa-apa ringangu mẹ̌kal᷊iomanengu ene ute, kakal᷊iomaneng ene sarung daringihang i Amang-Ku su Sorga. 20U suapan piạ darua arau těllungkatau mětẹ̌tampung ual᷊ingu Iạ, ute Iạ ene su tal᷊oaran sire.”

Papinintung ěllang kụ tawe mẹ̌gěllị u ampung

21 # Luk. 17:3-4 Bọu e i Petrus himaung si Yesus kụ nakiwal᷊o, ”Mawu, kereu anạ u sěmbaụku němpẹ̌dosa su těngoku ute, kai sarang kapiran sul᷊ene ia harusẹ̌ mapěngampung i sie? Sarang pitun sul᷊e ngae?”

22Mawu Yesus simimbang, ”Tala, bal᷊inewe sarang pitun sul᷊e, kaiso pitum pul᷊o pitung kapitun sul᷊ene!#18:22: Pitum pul᷊o pitung kapitun sul᷊ene: arau pitum pul᷊o pitung sul᷊ene. 23U kamagengu Ruata e mẹ̌parenta, kakakoạe kai kere su ral᷊ungu papinintu ini: Piạko sěngkatau ratu mapulu mẹ̌darekengu utangu manga ěllang e. 24Piạ i sie nanětạe nẹ̌darekeng ute, piạko sěngkatau ěllang něngutang yutane kụ nipẹ̌těngon sie, 25kụ seng tawe nakawaehẹ̌. Kụ datu e nẹ̌parenta tadeạu ěllang ene pakiwal᷊ụ sěngkawal᷊ụ dingangu anạe ringangu kawinge, ringangkewen patikụ darotonge tadeạu ipěmaehẹ̌ utang e. 26Ěllang ene nẹ̌tumpěkuhẹ̌ su těngon datu e, kụ kapědẹ̌doronge, ’Tuang, pakanandụko wue naungu su ěllangu e. Ěllang hědowen měmaehẹ̌ utang pakasueng baehe.’ 27Tangu ratu e měngkatewe nẹ̌kakal᷊ěkadʼu tatal᷊ěntụe hakịu i sie niliwirẹ̌ bọu kal᷊awọu utange.

28Arakutẹu ěllang ene nasẹ̌bangke, i sie nẹ̌sombangkeng hapịe, mal᷊aing sěngkatau ěllang, kụ piạ utange manga pira hiwu. I sie měngkatewe něhěgo hapịe ene, nikěllọe kapẹ̌bẹ̌berane, ’Baeheko kěbị utangu e!’ 29Mase hapịe ene nẹ̌tumpěkuhẹ̌ su těngone kapẹ̌dẹ̌doronge, ’Pakasabarẹ̌ko wue hapị, kěbịe sarungbe takụ baehang!’ 30Arawe ěllang ene kai tawe nahimang. Kụ ěllange měngkatewe tamai nanuẹ̌ i sie su ral᷊ungu tahungkụ sarạeweng i sie namaehẹ̌ utang e. 31Ene manga ěllang bal᷊ine e nakasilọe apang seng nariadi, i sire něngkasusa kụ něhabarẹ̌ hal᷊ẹ̌ ene su anun datu. 32Tangu ratu e kimui ěllang dal᷊aị ene kụ nipẹ̌beraěng, ’E ěllang dal᷊aị! Kal᷊awọu utangu e seng takụ nirědasẹ̌, sěmatang ual᷊ingu i kau e nakitul᷊ung si siạ. 33Kụ i kau e wal᷊inewe lai hinong kuměndagʼu hapịu e kerẹewe iạ e seng kiměndagʼi kau?’ 34Datu e limangehẹ̌ matědụ. Kụ ěllang dal᷊aị ene nịsasuẹ̌ e su ral᷊ungu tahungkụ sarang i sie nakawaehẹ̌ kěbị utang e.”

35Mawu Yesus nangěnsue wẹ̌kene ringangu wawerane kere ini, ”Kerene lai i Amang-Ku su Sorga e sarung mapěkoạ i kamene sěngkatau-sěngkatau, kereu i kamene tawẹ karal᷊uase mẹ̌gěllị u ampung su manga anạ u sěngkataunue.”

Currently Selected:

MATIUS 18: SXN

Highlight

Copy