YOËL 2

Pělahabaru mạanung Ěllom Mawu e sarung marěnta

1Pěniụko slompretẹ̌, apahěteko tatialang silakạ,

su Wul᷊udu Sion kụ susi, kal᷊aianengu Ruata.

Pěmpẹ̌ganuẹ̌ko, ei tumanạ u Yehuda!

Batụu Ěllom Mawu e masandigẹ̌ dingangu sen tạ kararěnane marěnta.

2Ěllo ene e marěndung dingangu malělubẹ̌,

napenẹ u hiwụ kụ masunaubẹ̌.

Sordadong kal᷊imbotong kạpahunděntane

kere winawa kụ nawatedẹ̌ su wowom bawul᷊urange.

Hal᷊ẹ̌ kerene e ren tawẹ běke kụ piạ,

kụ tawe saụ mariadi sarang marěngụ-děngụ.

3Mẹ̌sul᷊ungu putung kụ nanutung dingangu něhěngisẹ̌,

i sire něngupu kal᷊awọu sasuang.

Kal᷊imonang banua ene e, kere Eden, dahaming Mawu,

mal᷊iung ene e, mẹ̌sul᷊ungu wanua l᷊inggi kụ nẹ̌kěllisẹ̌.

Tawẹ manga apa-apa kụ nal᷊ěmbe,

tawẹ apa kụ nal᷊iwirẹ̌ bọu pěngangalong sire.

4 # Pěl. 9:7-9 Lulun sire kai mẹ̌sul᷊ungu kawal᷊o;

tatal᷊ange kere tatal᷊angu kawal᷊o su tampạ u pẹ̌seketang.

5I sire měmpạhul᷊insọ su wongkom bawul᷊urange,

tingihe kere tatarangkal᷊u karetan sekẹ

dingangu kere tahěteng putung mạnutung kalung ěmme.

I sire měmpẹ̌bẹ̌barisẹ̌ kere wuntuangu wawahani,

kụ seng tumotọ tampạ u pẹ̌seketang.

6Su tempong i sire seng něhěso, kěbị e něngkawintogẹ̌,

kěbị gati e něngkawilosẹ̌ dingangu něngkal᷊uạ.

7Tabidạu mol᷊ensekẹ i sire němpěngalo,

ringangu němpẹ̌awị meselẹ̌ kere mahorone.

I sire mẹ̌bẹ̌barisẹ̌ matul᷊idẹ̌ sol᷊ong těngo,

tawẹ lengane arau měmal᷊engkọ mona.

8I sire tawe měmpẹ̌sasasěsẹ,

su sal᷊uhe hala i sire mědẹ̌daral᷊eng.

I sire sěngkapěněnehẹ̌ kal᷊awọu wal᷊oarị,

kụ tawe kinaědung pẹ̌tatenten sire.

9I sire němpěngalo sol᷊ong dal᷊ungu soa,

kụ mạhuntal᷊ang su wowom meselẹ̌.

I sire němpẹ̌awị sol᷊ong dal᷊ungu manga wal᷊e;

kere tahatako, i sire němpẹ̌suẹ̌ bọu těba.

10 # Pěl. 8:12 Těntal᷊ang i sire kạpahundal᷊enge, wanua e gimanuẹ̌,

dingangu langị mal᷊aing gụganuẹ̌.

Mase narěndungke matangěllo ringangu wul᷊ang,

dingangu tualagu manga wituing e nailang.

11 # Pěl. 6:17 Tingihu Mawu e nẹ̌děllụ nẹ̌gěllịu komando,

su wuntuangu sekẹ e.

Apạ e kasěllahe rekenangu sordadone!

Kai apạ e kakuate sordado měndal᷊engu parentanʼE!

Mamben těngadẹ̌ maraitẹ̌ dingangu mahuagatẹ̌ Ěllom Mawu!

Tawẹu sarang sěngkatau makararagẹ̌.

Pělahabaru tadeạu pěngul᷊ị pẹ̌bawiahẹ̌ kapia

12 Mawu e něhengetang, ”Kai orasẹ̌ ini e,

pẹ̌sul᷊ẹ e sol᷊ong anu-Ku, ringangu kasěllahu ral᷊ungu naung,

kapẹ̌puhědange, sụsindukung dingangu sụsangị.

13Gaghonaịko naungu kụ kumbahangbe pakeangu.”

Pẹ̌bịhuko su Mawu Ruatanu.

I Sie manandụ sabare ringangu matal᷊ěntụ

maělugẹ̌ dingangu napenẹ u kakěndagẹ̌.

Mal᷊uasẹ̌ mẹ̌gěllịu ampung dingangu mạdiri

měndal᷊engu hukumang.

14Aramanung Mawu Ruatanu e němal᷊ui tingirang,

kụ něngal᷊amatẹ̌ si kamene niapẹ̌dal᷊embo.

Hakịu i kamene makapaněmbang

sasěmba anggorẹ̌ dingangu gandung baugu Mawu Ruatanu.

15Tiụko slompretẹ̌ su Sion, bul᷊udu Ruata,

pěhabarẹ̌kong ěllong pẹ̌papuhědang,

dingangu koạko pẹ̌sasombang masaria.

16Tampungko kal᷊awọu kawanua,

mase pakasueko apẹ̌komol᷊ẹ̌ kal᷊awọu umatẹ̌.

Aparěntako kal᷊awọu apang maghaghurang,

manga rariọ dingangu manga rariọ bědang darodọ lai.

Saral᷊aing manga boroitẹ̌ buhu e harusẹ̌be rěnta lai.

Dolohẹ̌ko i sire apěněntangu manga kamarʼi sire.

17Dolohẹ̌ko manga imang kụ pẹ̌tangkiang Mawu,

apasangị su wěllạ u pananěmbaěng dingangu tanumbal᷊e su těngone,

apidu kapẹ̌berane, ”Tal᷊ěntuke wue umatʼU, o Mawu;

abe wala tataghuanengʼU e apakasamedẹ̌,”

hakịu manga wansa wal᷊ine e měnindirẹ̌ dingangu mẹ̌bera u,

”Kai suapa Ruatan sire?”

Duata e mapakatawang ěntana e kapia

18Bọu e Mawu tụtatingang ěntananʼE ringangu kụkěndagu umatʼE.

19I Sie sụsimbahẹ̌ si sire kerei,

”Ini e i kamene kěbị Takụ gěllirangu:

gandung, anggorẹ̌ dingangu lanang zaitun baugu kanengang,

tadeạu i kamene kěbị ipakal᷊aedẹ̌.

Iạ e tawe ipakawalang kamene hinakaneng

arau ipahul᷊ěgeng manga wansa.

20Gapaěngu kal᷊imbotong bọu sawěnahẹ̌ sarung Takụ liwuaheng,

sěnggạ Takụ saghaěng sol᷊ong banua l᷊inggi.

Gapaěng su těngone e Takụ suhudang sol᷊ong Laudẹ̌ Nate,

arawe ghapaěng e su l᷊ikude Takụ suhudang sol᷊ong Laudẹ̌ Tal᷊oara.

Manga maiete sarung dumal᷊uru.

I sire e Takụ ipakawinasa u kawe seng nanịgěsạ si kamene.

21Abe katakụ, ei manga rahami; pakal᷊uasẹ̌ bue naungu;

pẹ̌tahěndung bue hal᷊ẹ̌ masaria kinoạ u Mawu e si kamene!

22Ei manga binatang, kumbahangbe rěnděnganeng.

Manga wimbaengu rěmpugẹ̌ orasẹ̌ ini e seng něngkaelong.

Manga kakaluang měngkai němpẹ̌bua mal᷊ahěbung,

kụ buang anggorẹ̌ dingangu ara kai apạe mahěmpal᷊iung kal᷊awọe.

23Ei kawanuang Sion, pahul᷊uase!

Pahul᷊uasẹ̌ dingangu pahul᷊iagẹ̌!

ual᷊ingu kapiang Mawu Ruatanu.

Su musungu měngkahondosẹ̌ e nighěllirangu tahiti mal᷊awọ si kamene.#2:23: Su musungu ... si kamene arau: Nionggotange si kamene tahiti su musungu kal᷊ahondosẹ̌ batụu i Sie kai adilẹ̌.

Su musungu matěho e tahiti e niaparasehʼE,

kụ kerene su musungu kalalělubẹ̌ e kerẹewe lai nạung kal᷊imona.

24Tangú gandung sarung lai měloho tampạ u raral᷊indaěng;

anggorẹ̌ dingangu lanan zaitun sarung maelọ bọu tampạ u papěhaseng e.

25Iạ e sarung měngaweng kal᷊awọu ruginu

su apạeweng taung kụ nạung kal᷊imbotonge nahungkinạ manga ghěsin sasuang i kamene.

U kai Iạ e něndingọ u kal᷊imbotong ene si kamene.

26I kamene sarung makahombang kaěng mạhěmpal᷊iu kụ makapěndang mal᷊aedẹ̌.

Mawu Ruatanu e sarung daloěng i kamene,

u waugʼi kamene e sarung koatengʼE karal᷊inạu mal᷊awọ.

Umatẹ̌-Ku e sen tawe lai makoạ laheghesang i kamene!

27Tangú kasingkạ e i kamene tau Israel, u Iạ e kai ene su tal᷊oarang kamene,

kụ Iạ e kai Mawu Ruatanu.

Tawẹ Duata wal᷊ine, tabeạu katewe Iạ sẹ̌saku.

Umatẹ̌-Ku e sen tawe lai ipakamea!”

Ělloʼm Mawu

28 # MMR. 2:17-21 ”Bọu ene tangú kal᷊awọu taumata e sarung Takụ ipẹ̌papinunụ u rohkẹ̌-Ku.

Tangu manga ahusu dingangu sangiangu sarung měmpěhabaru kal᷊awọu tatumbal᷊ung-Ku;

manga matatimadẹ̌ su tal᷊oarang kamene e sarung makahombang ipi,

papasilo e sarung ionggọ su kal᷊endesang manga esẹ dingangu wawine.

29Su tempo ene rohkẹ̌-Ku e sarung Takụ lai wěmbingang lai

su manga mẹ̌tatangkiang esẹ dingangu wawine.”

30Su langị dingangu dunia e sarung Takụ koateng karal᷊inaụ mal᷊awọ. Sarung piạ katatědọ u raha, rěllị u putung dingangu ghopol᷊angu tipu. 31#Mat. 24:29; Mrk. 13:24-25; Luk. 21:25; Pěl. 6:12-13 Matangěllo e sarung marěndung dingangu wul᷊ange mẹ̌těngkahamụ kere raha. Kěbị ene e sarung mariadi těntal᷊ang Ělloʼm Mawu e tawe nạděnta, ěllọ e mahuagatẹ̌ dingangu makạbintogẹ̌! 32#Rm. 10:13 Kaiso i saing kụ mẹ̌dẹ̌dorong tul᷊umang u Mawu e sarung ipakasal᷊amatẹ̌. Mawu e něhengetang, ”Su Yerusalem tangú taumata kụ Takụ nipile e sarung masal᷊amate.”

Currently Selected:

YOËL 2: SXN

Highlight

Copy