HOSEA 2
2
1Ual᷊ingu ene kuieko sěndinganengu e ringangu arengu, ”Umatu Ruata” ringangu ”Ikẹ̌kěndagu Mawu.”
I Gomer tawẹ satiane mělẹ̌lahẹu Israel
2 Mawu e něhengetang, ”Ei manga anạ-Ku, i ninangu e sembeng bal᷊inewe lai kawing-Ku, dingangu Iạ sembeng bal᷊ine kawinge. Ual᷊ingu ene pěrkaraị e i sie tadeạu i sie kumbahangbe lai saụ mawuang dingangu abe relaing saụ mẹ̌sundal᷊ẹ̌. 3Mạeng i sie měngkai mawuang, Iạ e sarung měluạ pakeange tadeạu i sie těntol᷊e kere nạung i sie piněhěnding. I sie sarung Takụ ipakakoạ kere ěntana mamara ringangu kaigẹ̌, tangu i sie sarung maten dou. 4I kamene manga anạe, tawe sarung Takụ ikěndagẹ̌; i kamene piněhanạ u pẹ̌sasundal᷊ẹ̌. 5I ninang i kamene e tahapẹ̌sundal᷊ẹ̌ běga mamea. I sie něhengetang, ’Iạ e sarung tamai sol᷊ong anung manga ikẹ̌kěndagẹ̌ku kụ něngonggọu kaěng dingangu inumang, wolẹ̌ dingangu hekạ leneng, lanan zaitun dingangu anggorẹ̌.’
6Ual᷊ingu ene, Iạ sarung měngurung si sie ringangu kěhu mal᷊ahoro, dingangu měhěping dal᷊enge ringangu pagarẹ̌ meselẹ̌. 7I sie sarung měnahusu manga samolọ e, kaiso sarung tawe mẹ̌sombang i sire. I sie sarung mẹ̌deạ si sire, kaiso tawe makapẹ̌sombang i sire. Bọu e i sie sarung mẹ̌bera u, ’Iạ e sarung mẹ̌sul᷊e kapia su anung kawingku humotong; nạung kạngerẹ e pẹ̌bawiahẹ̌ku e limembong kapiane wọu orasẹ̌ ini.’
8I ninangu e tawẹ běke reng měngaku u kawe Iạ e něngonggọu gandung, anggorẹ̌, lanan zaitun, dingangu kal᷊awọu wul᷊aeng sal᷊aka nạung nipakẹ e waugu maněmba Baalẹ̌ ene. 9Ual᷊ingu ene, su musungu pamaměnsạ, Iạ e sarung měngul᷊e kapia gaghěllị-Ku, kụ kai gandung dingangu anggorẹ̌, ore lai wolẹ̌ dingangu hekạ leneng nạung Takụ nionggọ si sie nakoạ pakeange. 10Takụ pakatěntol᷊e i sie su těngong kěbị samolọ e. Tawẹu sarang sěngkatau wọʼi sire makal᷊iwirʼi sie wọu kawasa-Ku. 11Kal᷊awọu sal᷊imbang i sie Takụ ipakiědo, baewe sal᷊imbangu apan taung, arau lai sal᷊imbangu apaʼm bul᷊ang dingangu apang ěllon Sabatẹ̌; nimbụe, kal᷊awọu pěngangagamane. 12Iạ e sarung mapakagholọ u kal᷊awọu kalung anggorẹ̌ dingangu kal᷊awọu kalung ara kụ angkuěnge kai tatendengu pẹ̌tatangkiange su manga samolọ e. Sarung Takụ bal᷊uiang baelu manga anggorẹ̌ e ringangu waelu manga arane makoạ kěhu; manga binatang dul᷊u sarung mapakagholọ ene. 13Iạ sarung měhukung i sie batụu kanandung ěllo e nipakẹ e gunang měnutung buwụ baugu Baal, mase mẹ̌tẹ̌těngkal᷊ěnggihu wadange ringangu ral᷊ěgahẹ̌, mědeạu měnahusu manga samolọ e, mase mẹ̌timbul᷊eng Iạ marihutu. Iạ e kai Mawu, seng nẹ̌bisara.”
Mawu e kụkěndagu umatʼE
14 Mawu e něhengetang, ”Ual᷊ingu ene Iạ sarung mẹ̌bawa si sie sol᷊ong ngara l᷊inggi; kụ sene i sie sarung Takụ ologang dingangu wawerang pẹ̌sasamolọ. 15#Yos. 7:24-26 Manga waelu anggore sarung Takụ isul᷊e si sie, ringangu Wal᷊an Susa e sarung Takụ koateng tukadu pělaharapẹ̌. Sene i sie sarung měnarimạ u Iạ kere su tempong kangangudạ e, piạ i sie wuhu sasěbang bọu Misirẹ̌. 16Mase i sie sarung mẹ̌sěbạu Iạ kawinge, kụ bal᷊ine relaing Baale.#2:16: Baal: Ini e kai arengu mahang duatang Kanaan kụ mangal᷊ene ”Mawu”; mangal᷊ene wal᷊ine wọu wawera ini ute ”kawing esẹ”. 17Iạ e tawe mapakawalan sie relaiʼm mẹ̌sěbạ arengu Baal, mědeạu taumata e sarung miwul᷊eng areng ene.
18Su tempo ene Iạ sarung mẹ̌koạ pẹ̌dariandi ringangu kal᷊awọu haghiʼm binatang tadeạu i sire kumbahang měnahaghe umatẹ̌-Ku. Iạ sarung mapakaědong kal᷊awọu pẹ̌sasekẹ dingangu mapakaraung aghidẹ̌ bọu wanuang umatẹ̌-Ku ene, ringangu mapakariadin sire wiahẹ̌ dingangu mal᷊enehẹ̌ dingangu tawẹ konsange apa.
19Israel, i kau sarung Takụ koateng kawing-Ku,
kawing kahěngang sarang karěngụ e.
I kau sarung Takụ kěndageng dingangu sěntiniạ tal᷊ěntukang;
Iạ e sarung mẹ̌těngkatul᷊idẹ̌ dingangu masatia.
20Natuhụ kere su kědo-Ku, i kau sarung Takụ koateng kawingku.
I kau sarung mangakung Iạ e kai Mawunu e hala.
21-22Su tempo ene, kereu umatẹ̌-Ku Israel#2:21-22: Israel: Su teksẹ̌ u Ibrani, Israel su ral᷊ungu ayetẹ̌ ini nisěbạ Yisreel (kakělla 1:4, 11). mẹ̌kal᷊iomaneng,
Iạ e sarung dumaringihẹ̌ si sire.
Bọu l᷊angị Iạ mapakahondosu tahiti,
hakịu wanua e makaual᷊i gandung, anggorẹ̌ dingangu lanan zaitun.
23 #
Rm. 9:25; 1Ptr. 2:10 Umatẹ̌-Ku e sarung Takụ apakal᷊unsemahẹ̌
dingangu apakatatapẹ̌ su wanuan sire.
Baugʼi sire apan nisěbạ ’Apan Tawe Nikěndageng’
sarung Takụ lahekang u i sire kai ikẹ̌kěndagẹ̌-Ku
dingangu waugʼi sire apang isẹ̌sẹ̌bạ ’Bal᷊inewe Umatẹ̌-Ku e’
sarung Takụ pẹ̌beraěngu, ’I kamene e kai Umatẹ̌-Ku’.
I sire sarung sumimbahẹ̌ kere ini,
’Seng i Kau e Ruatang kami.’ ”
Currently Selected:
HOSEA 2: SXN
Highlight
Share
Copy
Want to have your highlights saved across all your devices? Sign up or sign in
