HOSEA 14

1Samaria harusẹ̌ ihukung ual᷊ingu nẹ̌buntirisang dimokạ si Siạ. Kawanuane sarung mapělegẹ̌ su pẹ̌seketang; manga anạ e rarodọ e sarung ěpisang, dingangu manga wawine piạ kapapia e uaěng tiange.”

Hosea kụkakindoạ u tadeạu Israelẹ̌ e mẹ̌tobatẹ̌

2Pẹ̌sul᷊eko su Mawu Ruatanu, ei tau Israel! Dosanu e seng nakakariading kamene něliondohẹ̌ kụ nanawo. 3Pẹ̌sul᷊eko su anung Mawu kụ habarẹ̌ko kakal᷊iomaneng ini kere sasěmbanu si Sie, ”Mawu, ampungeko kal᷊awọu rosang kami, ringangu tarimạko kakal᷊iomaneng i kami ini, tangu i kami e sarung mẹ̌dalo si Kau kerẹewe seng nikědong kami. 4Asyur sarung tawe makasal᷊amatẹ̌ si kami, dingangu kawal᷊ong sekẹ tawe makatul᷊ung si kami. I kami semben tawe lai mẹ̌bera su manga tul᷊ada koạ i kami hala u i sire kawe Ruatang kami. O Mawu, i Kau e kụkěndagu kal᷊awọu taumata kụ tawe mananaghuang si sai-sai kụ pěngumbalaěng i sire.”

Mawu e nẹ̌diandiʼm pẹ̌bawiahẹ̌ buhu waugu Israel

5 Mawu e něhengetang,

”Umatẹ̌-Ku apang němpělenga e, Takụ al᷊akeng kapia,

kụ Takụ kěndagengu ral᷊ungu naung;

i sire semben tawe saụ Takụ pẹ̌pěduang.

6Baugu tau Israel Iạ e kere tahiti

kụ makaholo ěntana mamara.

I sire sarung měměsị kere bungang

dingangu kere kalun cěmara kụ hamụ e maral᷊ung.

7I sire sarung mẹ̌biahẹ̌ dingangu mahuntinamba

kere sasuang himětị su apan tampạ,

kere kalun zaitun kal᷊ěnggihe

mawěngi kere kalun cěmara!

8I sire sarung mẹ̌sul᷊e su anu-Ku

kụ matanạ su ral᷊ungu pěnanirung-Ku.

I sire sarung mahuntinambang kasorogạ e pẹ̌bawiahʼi sire

kere gandung timuwo su rahami matendang

dingangu kere waelu anggorẹ̌.

Kerẹewe akẹ u anggoru Libanon areng i sire timeleng.

9Tau Israelẹ̌ e sarung měnděmẹ u manga tul᷊adan mahang duatane;

i sire Takụ padul᷊iang dingangu Takụ daringihang kakal᷊iomaneng i sire.

Mẹ̌sul᷊ungu kalu kụ hanesẹ̌ mal᷊awọ daukalune,

Iạ e sarung měngěllung si sire.

Iạ e kai simbul᷊u kal᷊awọu al᷊amatẹ̌ si sire.

Iạ e Mawu, seng něhengetang.”

Kakunsị e

10Mal᷊owọko patikụ taumata kụ pelesa e makaěnna apang kụ mạbawohẹ sini e, ringangu měnẹ̌naung ene. Kal᷊awọu tatěntiro wọu Mawu e mamben těngadẹ̌, dingangu taumata maagimatẹ̌ e mẹ̌bẹ̌biahẹ̌ tụtuhụ apan těntiro ene. Arawe taumata waradosa e tawẹ agise hakịu i sire něliondohẹ̌ dingangu nanawo.

Currently Selected:

HOSEA 14: SXN

Highlight

Copy