HOSEA 13

Putusang pěngěnsueěnge mạanung hukumang su tau Israel

1Kal᷊imona e hěntong Efraim lẹ̌adateng hakịu kamagengu piạ parenta wọu hěnto ene, manga hěnto wal᷊ine su Israelẹ̌ e matakụ. Arawe hěntong Efraim barạdosa ual᷊ingu měnẹ̌němba Baal, ual᷊ingu ene i sie sarung mapuạ. 2Sarang orasẹ̌ ini e taumatang Efraim e wědang tatapẹ̌ mẹ̌bẹ̌baradosa; ual᷊ingu pẹ̌kakoạ kal᷊awọu tul᷊ada sal᷊aka mědeạu pěněmbaěng – tul᷊ada nạung ilẹ̌ol᷊ang u akal᷊u taumata, ringangu kẹ̌koatengu liman taumata. I sire němpẹ̌bera, ”Pěmpẹ̌gěllịkon sasěmba waugu manga tul᷊ada ini!” Makạdal᷊inaụ, taumata e nakaimbu tul᷊adang anạ u sapi! 3Ual᷊ingu ene taumata e sarung maparung kere hiwụ arau namuhẹ̌ su tempong mal᷊ukadẹ̌. I sire sarung kere awul᷊u wal᷊ẹ̌ka nitiụ u anging su pěndal᷊indaěng gandung, dingangu kere tipu siměbang bọu ontapeng.

4 Mawu e něhengetang, ”Kai Iạ e Mawu Ruatanu, naněbang i kamene wọu Misirẹ̌. I kamene tawe něnaghuang Duata sul᷊iung Iạ. Kai Iạ e měnanal᷊amatu man sěmbaụ. 5#Pang. 8:11-17 Kai Iạ e mělẹ̌lukadẹ̌ si kamene su wanua mamara su ngara l᷊inggi. 6Kai sarạeng i kamene seng su wanua mapia, kụ i kamene měngkal᷊aedẹ̌ ore mạbatụ kapulu, i kamene kawe něngkaobotẹ̌ kụ bọu ene kawe niwul᷊eng Iạ. 7Ual᷊ingu ene Iạ sarung měhěgạ si kamene kere singa. Kere Masang kambal᷊ọ Iạ sarung mẹ̌těgạ si kamene su ral᷊eng. 8Iạ sarung tuměmbo si kamene kere běruang kinailangengu manga anạ e. Iạ sarung měnggaghonaị si kamene. Kere singa Iạ sarung tuměmbo si kamene su katatanakeng i kamene, ringangu kere binatang marangěngisẹ̌ Iạ sarung měnggaghonaị si kamene.

9Iạ sarung mapakagholọ i kamene, ei tau Israel! Kụ kai i sai makatul᷊ung i kau? 10#1Sam. 8:5-6 I kamene mẹ̌dẹ̌dorong datu ringangu pangahạ e, kụ kawe suapa i sire kěbị e orasẹ̌ ini? Botonge i sire makasal᷊amatẹ̌ kawanuanu? 11#1Sam. 10:17-24, 15:26 Dingangu ral᷊angehẹ̌ Iạ e měngonggọu ratu si kamene, mase ringangu mahasa Takụ bol᷊engang kapia i sire.”

12 Mawu e něhengetang, ”Dosa ringangu pẹ̌sasal᷊ang Israel seng niketạ, dingangu wohẹ e seng niresọ. 13Israel piạ loahe waugu mẹ̌biahẹ̌, arawe i sie kereng kawodone hakịu tawe něpakẹ u loahe ene. I sie mẹ̌sul᷊ungu rariọ kadodọ kụ seng tạ kararěnane ipěhěnding kaiso mạdiri suměbang bọu gandongang i ninange. 14#1Kor. 15:55 Bansa ini e tawe Takụ ipakasal᷊amatẹ̌ bọu kawasan dunian tau nate. Ei papate, sawuhẹ̌ko sahindạu! Koạko hal᷊ẹ̌ u kụ makawinasa ene! Iạ tawe kuměndagu wansa ini e lai. 15Manilaing Israelẹ̌ e masorogạ biahe kere rěmpugẹ̌ matawa, kaiso Iạ e sarung měndingọ anging daki matětị bọu ngara l᷊inggi. Anging ene sarung mapakamarang kal᷊awọu simbul᷊ẹ̌ dingangu manga pahighi, sarangkewe maparung patikụ apang piạ arěgane.

Currently Selected:

HOSEA 13: SXN

Highlight

Copy