HOSEA 10

1Israelẹ̌ e kere kalung anggorẹ̌ nẹ̌bua mahěbung. Mangkeng kakạl᷊awọe kakakalạ e, mangkeng kakạl᷊awọe pananěmbaěng kẹ̌koateng e. Mangkeng kakạpiane wiahẹ̌, mangkeng kakạpaele lai manga palẹ̌ u mahang duata kụ sẹ̌sěmbaěnge. 2Taumata apan naunge wengkọ ene, ini e harusẹ̌ měnanggung aị u rosane. Duata e sarung mapakagholọ u pananěmbaěng i sire ringangu mapakaghoghahu apam palẹ̌ u mahang duataʼn sire.

3Tawẹ kạděngụe lai i sire sarung mẹ̌bera, ”I kitẹ e tawẹ datung kitẹ batụu i kitẹ tawe matatakụ u Mawu. Apạe gunane sěngkatau ratu e si kitẹ?” 4I sire e mẹ̌bẹ̌bisarang konti ringangu mẹ̌kẹ̌kědo konti ore lai mạngikị u riandi tawẹ kěhase. Toratẹ̌ e ipẹ̌kẹ̌kal᷊intuinge hakịu tạ kạadile sụsombọ kere sasuang makạkilu su sasuang kụ seng nipacolẹ̌.

5Tumanạ u soan Samaria sarung matakụ; i sire ringangu manga imang kụ mẹ̌tẹ̌tangkiang sapi wul᷊aeng su Betel#10:5: Betel arau Awen: Kakělla pasalẹ̌ 4:15. e sarung masusa naunge ringangu mahungkiạ ual᷊ingu kawantugu mahang duatan sire e seng napuạ. 6Mahang duata ene sarung hengketang sol᷊ong Asyur mědeạu iporoseěng su ratu masěllahẹ̌. Israel tụtol᷊e karaki kụ makạmea ringangu makạsamedẹ̌ si sire. 7Samaria e sarung magholọ dingangu ratune sarung ital᷊ang kere kalu sěmpědi i onodu akẹ. 8#Luk. 23:30; Pěl. 6:16 Manga pangkunang su manga wul᷊ude su Betel#10:8: Betel arau Awen: Kakělla pasalẹ̌ 4:15. tampạu tau Israel měmpaněmba mahang duata e sarung ipakagholọ. Kal᷊awọu hanggange ringangu rěmpugẹ̌ e sarung tumuwo su pananěmbaěng i sire. Bọu e i sire sarung mahungkui manga wul᷊ude, ”Ambungẹ e i kami!” ringangu su manga wongkone, ”Lingkubẹ e i kami!”

Israel niěnsakengu hukumang

9 # Měl. 19:1-30 Mawu e něhengetang, ”Nanětạ bọu apa nariadi su Gibea,#10:9: Gibea: Kakělla pasalẹ̌ 9:9. tau Israel lai wědang tawe nạngědo nẹ̌dosa rimokạ si Siạ. Ual᷊ingu ene i sire sarung aloěngu sekẹ su Gibea lai. 10Iạ sarung měnekẹ taumata apam baradosa ene, kụ měhukung i sire. Manga wansa e sarung mẹ̌tatal᷊iwung si sire, kụ i sire sarung ihukung ual᷊ingu rosan sire mal᷊awọ ene.

11Kal᷊imona e Israelẹ̌ mẹ̌sul᷊ungu sapi kawuhuang kụ seng nipakanarang su hal᷊ẹ̌, kụ makěhagẹ̌ měndal᷊inda gandung. Iạ e sen tawahal᷊uasu mělěngkangu papal᷊inge su rěhụ e mal᷊ěnggihẹ̌ ene. Arawe ini e Iạ seng němutusẹ̌ u tadeạu měnihasa pěhal᷊ẹ̌ pakasěgadẹ̌. Yehuda Takụ irolohẹ̌ pěngal᷊i ěntana ringangu Israelẹ̌ e pěnambeka. 12#Yer. 4:3 Iạ e něhengetang, ’Ei Israel! Pěmukako sasuangu wuhu, kụ pěnawuhẹ̌kom bineng kaadilẹ̌ e, ringangu pěměnsạkong al᷊amatẹ̌ kụ nikaual᷊ing kạguwạu naungu e kuměndagu Iạ. Batụu sen tempone waugʼi kau mẹ̌deạ si Siạ, Mawunu. Iạ sarung duměnta ringangu maparasehʼi kau kahiang kal᷊awọu al᷊amatẹ̌-Ku.’ 13Arawe kẹ̌koatengu kawe mẹ̌dẹ̌darol᷊e; i kau kawe měkẹ̌koạ dal᷊akisẹ̌, dingangu mạměnsạ u tạkạadile. I kau e seng kimaěng wua-buang ual᷊ing kontinu.”

Mawu e něhengetang lai, ”Ei tau Israel, ual᷊ingu i kamene kawe mạngumbalang karetan sekẹ i kamene ringangu kal᷊awọu manga sordadong kamene, 14tangú kawanuang kamene sarung kahinoěngu paraěng dingangu kěbị těndạ i kamene sarung ipakaghoghahẹ̌. Kakakoạ e sarung kere su ěllong Datu i Salman napakawinasang soang Bet-Arbel su ral᷊ungu pẹ̌seketang dingangu měngěpisẹ̌ kal᷊awọu manga marehokang dingangu manga anạ i sire. 15Kai ene sarung mariadi si kamene, ei tumanạ u Betel, batụu i kamene seng nẹ̌koạ karal᷊akisẹ̌ masaria. Su tempong běmbanaho, tạ kararěngụ e sarětạeng pẹ̌sasekẹ e nanětạ, datung kamene e sarung mate.”

Currently Selected:

HOSEA 10: SXN

Highlight

Copy