PĚNDARIADI 49

Bawerang Yakub pangěnsueěnge

1Ene i Yakub nakireạu manga anạ e kụ nẹ̌bera, ”Pẹ̌komol᷊ẹ̌ko sini su rěduhẹ̌ku. Sarung takụ ihabarẹ̌ si kamene apan sarung kahombangeng i kamene su ěllo samuri:

2Pěmpẹ̌komol᷊ẹ̌ko e manga anạ i Yakub,

pěmpẹ̌daringihẹ̌ko si Israel, i amang i kamene.

3I Ruben anạ e kaiakanenge,

seng i kau e katatoghasẹ̌ku, wuan saghedẹ̌ku kahumotongange.

I kau e kal᷊ěnggihange ringangu katoghasenge wọu tal᷊oarang kěbị anạku.

4I kau e mal᷊ighạ mẹ̌golang kere akẹ,

hakịu wal᷊inewe lai kahumotongange;

batụu i kau e nẹ̌tikị dingangu kapapuěngku,

i kau e napakaturạ u ral᷊okaěng i amangu e.

5I Simeon dingangu i Lewi tamahuari e,

aghidʼi sire ute kai aghidu tatingkaị.

6Iạ tawe mitụ su pẹ̌dararụdaton sire,

dingangu l᷊ai su ral᷊ungu pẹ̌kakomol᷊i sire e.

Batụu i sire kai mamate ringangu abul᷊in sire,

ringangu mapakaěnsum banteng baugu makapia ihạ.

7Kakutu sural᷊angehʼi rẹ̌dua e kahiang katědụ e.

Kakutu su ětohi rẹ̌dua kahian tingkaị e.

Iạ e sarung mapẹ̌sal᷊iawuhi sire su kasěllahu Israel.

Iạ e sarung mapakasal᷊iawuhʼi sire sutal᷊oarang kěbị umatẹ̌.

8I Yehuda, i kau e sarung maněngal᷊ẹ̌ pol᷊ohu rokạ u;

manga tuhangu e sarung mẹ̌dalo si kau

ringangu mẹ̌suba su tẹ̌ngonu.

9 # Pẹ̌t. 24:9; Pěl. 5:5 I Yehuda e mẹ̌sul᷊ungu singa kawuhuang;

i sie měmate kinaěnge mase mẹ̌sul᷊e su rěmunge;

i sie nẹ̌těngkahatedẹ̌ bọu e rimal᷊oka,

kụ tawẹu sarang sěngkatau wahani mělangehẹ̌ si sie.

10I Yehuda sarung mangumbelẹ e těkingu kararatuang,

hitene sarung mẹ̌parenta sarang marěngụ-děngụ.

Manga wansa e sarung měmpẹ̌bawa ghaghěllị#49:10: Manga wansa … ghaghěllị, luhude ěndaị e mangal᷊ene.

baugu ratu mase mẹ̌tumpẹ̌kuhẹ̌ kụ mẹ̌suba su těngone.

11Pěgol᷊u kalidene ikitange su kalu,

kalụeng anggorẹ̌ kal᷊enggihange.

I sie měngunsạ pakeange ringangu akẹ u anggorẹ̌ mahamụ mal᷊undaha.

12Kahamụ u matane e kere nanginung anggorẹ̌,

kawirang isine kai ual᷊ingu manginung susu.#49:12: Kahamụ … susu; arau matane něngalembong mahamụ bọu anggorẹ̌; isine něngalembong kawirane wọu susu.

13I Zebulon sarung mẹ̌banua su wiwihu apeng;

manga kapal᷊ẹ̌ sarung měmpẹ̌mal᷊ango su ligharenge;

sarangkewe pẹ̌saraěnge su Sidon.

14Isakarẹ̌ e kai tabidạu kalide matoghasẹ̌ rụdal᷊oka su

wěllạ u tatahoěngu wawawaěnge.

15Nikasilone kai apạe mal᷊ěnggihẹ̌ tampạ ene

ringangu kaholẹ e wanuane,

kụ i sie měngkatewe namengehẹ̌ běmbange mědeạu pakilěngkanengu wawawaěng,

dingangu nisihasa pělẹ̌hal᷊ẹ̌ kere ěllang.

16I kau Dan, sarung měhukungu kawanuanu,

i kau makoạ kawanua, kere kawanua wal᷊ine su Israel.

17I kau e kere těmpu su wiwihu ral᷊eng,

těmpu mawawisa su wiwihu ral᷊eng darodọ,

kụ měngẹ̌ngiki kal᷊entọ u kawal᷊o

sarang mẹ̌kẹ̌kal᷊imbahung sumasakene.

18 Mawu Kasěllahenge, kasasal᷊amatẹ̌ ighẹ̌gěllị u e, kai ene takụ lẹ̌ampal᷊eng.

19Gad, i kau e sarung sahẹ̌sekangu mẹ̌sasekẹ,

kaiso i kau mawal᷊ị mẹ̌nahěsẹ si sire.

20Asyer, kaěngu e mẹ̌dal᷊embong kal᷊ěnggihe,

i kau e sarung měnadiang simokol᷊u manga ratu.

21I Naftali e tabidạu rusa nakapěllọ, apạe masasadadạ manga anạ e.#49:21: I Naftali … manga anạ e; arau Naftali mẹ̌sul᷊ungu kalu mahěbung dingangu manga lelange tamatạ.

22I Yusupẹ̌ e tabidạu kalide kawuhuang,

kalide maghaěng su rěduhu simbul᷊u akẹ,

mẹ̌tẹ̌tatal᷊ang su manga wěntihe.#49:22: Yusup … manga wěntihe, arau i Yusup mẹ̌sul᷊ungu kalu su simbul᷊u akẹ, kalung manga wua-bua kụ nawal᷊andang su meselẹ̌.

23Manga sekẹ měmpěngalo marasai,

měmpěnahusu ringangu naěnakeng dingangu horom papitị.

24Kai arawe i Yusup man těbe matoghasẹ̌ takiahe,#49:24: Arawe … takiahe, arau arawe papitị i sire e napědi ringangu naghagholang, ghěsing manga takiahe naghahonaị.

papitị e matětogẹ̌,

ual᷊ingu kawasang Měndal᷊ukadẹ̌ Kasěllahenge,

Duatang Yakub, Mananěntanudẹ̌ Israel.

25Duatang amangu e mẹ̌tul᷊ung i kau;

Kawasang patikụ e měngal᷊amatẹ̌ si kau,

dingangu tahiti wọu langị ore lai

akẹ bọu al᷊ungu ěntana.

Ringangu anạ, dingangu sapi,

26gandung dingangu bungang.#49:26: Kasariange ayetẹ̌ ini e mangal᷊ene: Gandung dingangu bungang; su Ibrani e něngalembong bahani sul᷊ungu.

Barakatin Duatang amangu

mạmal᷊iu kal᷊awọu kakalạu manga wul᷊ude kụ tumanịu marěngụ ene.#49:26: Sembaụ tungkangu kal᷊imonane: Manga wul᷊ude kụ tumanịu marěngụ ene; su Ibrani e i upungku e waugu.

Mal᷊owọko kal᷊awọu al᷊amatẹ̌ ene e matěntung su wowom těmbọ i Yusup su wowon děhụ e.

Seng i sie ene nangělembong kapiaěnge wọu tal᷊oarang manga anạ u sěmbaụ e.

27I Benyamin tangu kai ral᷊ugẹ̌ marangěngisẹ̌.

Kamal᷊ukarenge i sie mẹ̌němbo kinaěnge.

Su tempong hěbi e i sie mạmahiạ kinaěnge kụ naal᷊ạ si sie.”

28Kụ ene kěbị e tangu hěntọeng Israel mapul᷊o dua e kụ apạeweng bawera kụ pinẹ̌berang amang i sire piạ e mẹ̌kẹ̌katạ i sire e sěngkatau-sěngkatau.

Kapapohong i Yakub dingangu pěnanampạ e

29-30 # Pěnd. 23:3-20 Bọu ene i Yakub timanata su manga anạ e, ”Sen tawe kararěnane lai iạ maněntangu wowon dunia ini kere manga i upungku. Kụ lẹ̌bingkong kamene iạ e surěduhʼi sire su ral᷊ungu liang su Makhpela, sěmběkang daki wọu Mamre su ěntanang Kanaan. I Abraham kai sen němělli liang ene ringangu winal᷊aeng mạngělikụ e bọʼi Efron tau Het tadeạu koateng pěndal᷊ěbingang. 31#Pěnd. 25:9-10, 35:29 Su tampạ ene i Abraham dẹ̌duan Sara, i Ishak dingangu i Ribka; kụ mal᷊aing sene iạ měnampạ i Lea. 32Binal᷊aeng dingangu liang sene kai sen niwělliang bọu tau Het. Lẹ̌bingke iạ sene.” 33#MMR. 7:15 Ene i Yakub e nasuẹen tatanatane su manga anạ e tangú, rimal᷊okạ e i sie kụ bọu ene naminsul᷊ẹ̌ singongone.

Currently Selected:

PĚNDARIADI 49: SXN

Highlight

Copy