PĚNDARIADI 24
24
Pẹ̌kakawingʼi Ishak
1I Abraham tangu sem maghurang-gurang, dingangu i sie lẹ̌al᷊amateng u Mawu e su patikụ sabarang. 2Piạ su sahěllo i Abraham e něbera su ěllange kaghurangenge, sadahang kal᷊awọu rarotonge, ”Limanu e pěllọko su wěllạ u pungu palangku.#24:2: Limanu e pěllọko su wěllạ u pungu palangku: Ini e tundune su tempo ene taumata e mẹ̌salu kụ sasalu ene e sen tawe lai ikawal᷊ui. 3Pẹ̌saluko waugʼu Mawu e, Ruata kụ měngẹ̌ngawasa langị dingangu runia, batụu i kau sarung tawe mědeạ kawingu anạku i Ishak bọu tal᷊oaran sire tau Kanaan ini e. 4I kau e hinon mẹ̌sul᷊e su wanua pinamitingang puidẹ̌ku waugu pědeạ kawingu anạku i Ishak bọu tal᷊oarang manga anạ u sěmbaụku.”
5Tangu ěllange nakiwal᷊ọe si sie angkuěng, ”Kiwuạ u wawine ene tawe mapulu tumol᷊e si siạ sol᷊om banua ini tangu kereapa wue? Kụ iạ harusẹ̌ měmaringangu ahusʼi Tuange sol᷊om banuang Tuang tutune?”
6Kai i Abraham simimbangu, ”Ene ěng! Kumbahang-bahang i kau e měmaringang anạku e sol᷊om paị sene! 7Mawu, Ruata kawasan langị e seng němaringang u iạ bọu wal᷊eng amangku e ringangu wọu wanuang anạ u sěmbaụku e, kụ i Sie seng nẹ̌salu su těngoku u i Sie sarung mangonggọu wanua ini e su kal᷊awọu hiteku. I Sie lai sarung měndolohu malaekatʼE waugu mẹ̌tul᷊ung i kau e makareạbe sěngkatau wawine makoạ kawingu anạku e su tampạ ene. 8Kai kamagengu tau wawine e kawe tawe mapulu tumol᷊e si kau, tangu i kau e mal᷊iwirẹ̌ bọu pẹ̌sasalu ini. U maningbe kereapa kai kumbahang i kau mamaringang u anạku e sol᷊ong tampạ ene.” 9Bọu e ěllang ene naměllọeng l᷊imane su wěllạu pungu palangu mawune i Abraham, kụ nẹ̌salu sarungbe měndal᷊engu apang gẹ̌gausang i Abraham ene.
10Ěllang ene e něngal᷊ạ e ontang mawune mapul᷊o ringangu haghin darotongu mawune kụ nẹ̌buạ e sol᷊ong soa kẹ̌katanakeng i Nahor nạung biahẹ̌; su wahageang sawěnahẹ̌ bọu ěntanang Mesopotamia. 11Sarạeng i sie nahumpạ sene tangu, niědungke manga onta ene tadeạu pạngirul᷊e su rěduhu pahighi sěmbaụ su likudʼu soa. Ěllo e seng bawěllo, kụ seng tempone waugu wawine mahunděnta su pahighi e měmpanuhụ akẹ. 12Mase ěllang ene nẹ̌kal᷊iomaneng, ”Mawu, Ruataʼm mawuku i Abraham, tul᷊ungko, tadeạu munaraku sěhello ini e piạbe ual᷊ine; pẹ̌koạko mapia su mawuku i Abraham. 13Kakělla e, iạ e rụdarisị su rěduhu pahighi ini. Měntěhang seng mahunděnta manga wawine wọu soa e měmpěnuhụ akẹ. 14Iạ e reng mẹ̌bera su sěngkatau wọu i sire, ’Tul᷊ungko ul᷊uhẹ̌ běnsadʼu kụ gěllirengkong akẹ iạ e.’ Kereu i sie sumimbang u, ’Pěnginungke, dingangu kal᷊awọu ontan Tuange relain takụ iapěnginung!’ ute seng i sie ene pinilen Mawu waugu ěllangu i Ishak. Kereu hal᷊ẹ̌ ene e nariadi, ute iạ nasingkạ e u Mawu e seng kimanoạu naungʼE mapia su mawuku i Abraham.”
15-16Ene, piạ e i sie reng kapẹ̌kẹ̌kal᷊iomanenge, i Ribka, sěngkatau tau wawine mal᷊ěnggihẹ̌ e kụ delain bědang parawang, narěntạ e su pahighi ene kapěmẹ̌masaěnge wěnsadẹ̌ su wěmbange. I sie anạ i Betuel, dingangu ghaghurang i Betuel ute kai i Nahor dẹ̌duang Milka; i Nahor e kai tuhang i Abraham. I Ribka ramahi mětẹ̌timona pahighi e kụ něloho e wěnsade kụ bọu e rimal᷊eng kapia. 17Ene, ěllang i Abraham timal᷊angke kụ himaung si sie apidu nẹ̌bera, ”Tul᷊ungko inang, gělirengkong akẹ bọu wěnsadu e, iạ deng manginung.”
18Mahuala ene simimbangke, ”Pěnginungke Tuang,” ene měngkatewe lighạ něngilasu wěnsade wọu wěmbang e, apidu nihěgone wěnsadẹ̌, niapěnginung e ěllang ene. 19Ene ěllange nasuẹeng inunge nẹ̌berạ e mahuala ene, ”U Iạ e reng měnimbạ akẹ baugu ontan Tuang e lai, tadeạu kěbị binatang ene e reng makapěnginung sarangkewe roun sire rembeng maundang-undang.” 20Bọu ene i sie měngkatewe lighạ naměmbingu akẹ su wěnsadẹ̌ e su ral᷊ungu kal᷊ombạ panganginungangu onta, bọu e nẹ̌saụ nakoạ sol᷊om pahighi e waugu měnimbạ akẹ něngalembong kal᷊awọe lai sarangkewe kakěpal᷊u binatang e něngkaundang doun sire. 21Ene ěllang i Abraham měngkatewe tạ kakěndị e kụkakělla si sie. I sie mědẹ̌deạ sahẹ u měnsang Mawu e napakasěhụ hal᷊ẹ̌ u munarane arau tala.
22Sarangke kal᷊awọu onta e nasuẹeng inunge, ěllang i Abraham něngal᷊ạ e ral᷊ěgahẹ̌ bọu wul᷊aeng maral᷊ěgadẹ̌ e kụ nịpapakẹ̌ e su irungu mahuala ene. Su takiahe niluheěngu ghal᷊ang bul᷊aeng. 23Mase ěllang ene e nẹ̌berạ, ”Kěnangko paul᷊ị kai i sai i amangu. Piạ tampạ kụ deng kapẹ̌tikilangku e ringangu taumataku e su wal᷊eng amangu ngae?”
24”I Amangku e i Betuel, anạ i Nahor dẹ̌duang Milka,” angkuěngu mahuala ene. 25”Su wal᷊eng kami e piạ tampạ u pẹ̌tatikilang baugʼi Tuang dingangu lawọ lai manga kalung ěmme ringangu kaěngu binatang.”
26Tangu ěllang ene měngkatewe nẹ̌tumpěkuhẹ̌ dingangu nẹ̌suba Mawu, 27angkuěnge, ”Pẹ̌daloko Mawu, Ruatang mawuku i Abraham. Mawu e mahunẹu mambeng satia ringangu mẹ̌tẹ̌těngkapian naunge su mawuku i Abraham. I sie něngahạ u iạ sěngkakahumpạ e seng su anung manga anạ u sěmbaụ e.”
28Bọu e mahuala ene měngkatewe timal᷊ang sol᷊ong anung ninange kụ nẹ̌běkeng kal᷊awọu apan nariadị e. 29-30I Ribka e kai piạ mahuanene arenge i Laban. I sie nakaringihẹ̌ běken tuarine ene e mạanung apa ipẹ̌paul᷊ị u ěllang e. I sie nakasilo lai ral᷊ěgahẹ̌ su irung dingangu ghal᷊ang su takiahu wawine ene. Tangu timal᷊angke i Laban sol᷊ong likudʼu wal᷊e e kụ himaung su ěllang i Abraham kụ bědang dụdarisị dingangu manga ontane su rěduhu pahighi. 31Mase angkuěng i Laban, ”Tuang kai taumata nial᷊amateng u Mawu! Abe katanạ su l᷊ikude ini. Taraịko rumangeng su wal᷊eng kami. I kami e seng něndiahing kamarẹ̌ baugʼi Tuang, dingangu l᷊ai tampạu manga ontang Tuang.”
32Mase tangu timol᷊e e ěllang ene e kụ dimangeng su ral᷊ungu wal᷊e. I Laban nangilasu wawawaěng u manga onta e, ringangu nangonggọu kalung ěmme ringangu kaěnge su manga binatang ene. Bọu ene i sie nẹ̌bawa akẹ pinanguhasẹ̌ laedu ěllang i Abraham dingangu taumatane. 33Sarangke kaěng seng kạpapěllọ, ěllang ene e nẹ̌bera u, ”Iạ e reng tawe kumaěng těntal᷊ang deng tawe naul᷊ị u tatanata.”
I Laban tangú nẹ̌berạ e, ”Paul᷊ị e.”
34Mase nanětạ e ěllang i Abraham nẹ̌berạ e, angkuěng, ”Iạ ini e kai rarolohang i Abraham. 35Mawu e kai napẹ̌dal᷊embong al᷊amate su mawuku e tawẹ sihinge ringangu napakariadin sie taumata su wowong asěki. Mawu e seng nangonggọu ghapaěngu domba, kambing, sapi, onta, kalide ringangu lai sal᷊aka, wul᷊aeng, ringangu lai manga ěllang e esẹ dingangu wawine. 36Ene umure seng marangẹ, i Sara kawingu mawuku ene němantelẹ̌ dariọ esẹ, kụ mawuku e seng nangěking u kal᷊awọu rarotong e su anạ e ene. 37I sie nangoro si siạ pẹ̌kẹ̌kědo ringangu piạ salune tadeạu apẹ̌dẹ̌daringihẹ̌ parentane. Angkuěnge, ’Kumbahang i kau mapẹ̌kawing u anạku ringangu mahuala wọu tal᷊oarang anạu tau Kanaan ini e, 38kaiso kawe wọu tal᷊oarang manga anạ u sěmbaụ balagʼi amangku. Kụ tamaị e pakal᷊ighạ.’ 39Mase iạ nakiwal᷊o si sie, ’Kụ kereapa wue kamagengu mahuala ene e kawe mạdiri tumol᷊e si siạ?’ 40Kutẹu i sie kawe simimbang si siạ, ’Mawu e sěntiniạ takụ tẹ̌tol᷊eěng, sarung měndolohu malaekatʼE apẹ̌tul᷊ung tadeạu munaranu e piạbe ual᷊ine. I kau e sarung makahombang kawingu anạku e wọu tal᷊oarang balagẹ̌ku hala, kụ kai bọu manga anạ u sěmbaụ i amangku. 41Kětạengbeng kereu i sire tawẹ dal᷊uase si kau, buhụewe i kau mal᷊iwirẹ̌ bọu pẹ̌sasalu pinẹ̌salunu.’
42Kụ piạ narěnta su pahighi kanini e, iạ e měkẹ̌kal᷊iomaneng su naungku e, ’Mawu, Ruatan mawuku i Abraham, mal᷊owọko Mawu e reng mapakaual᷊ing munaraku. 43Iạ e mang těbe rụdarisị su rěduhu pahighi ini. Mạengu sěngkatau mahuala e ruměnta manuhụ akẹ kụ den takụ pẹ̌dorongang tadeạu i sie reng mangonggọu inumang si siạ. 44Mạeng i sie mẹ̌gěllị, dingangu lai mělawị mapěnginungu manga ontaku, tangu mal᷊owọko relaing i sie pileěngu Mawu e makoạ kawingu ahusu mawuku ene.’ 45Delaing tawe nạsueng berane raroa ene su ral᷊ungu naung, narěntạ e i Ribka, mạmasaěng běnsadẹ̌ su wěmbange bọu ene něngal᷊ạ akẹ bọu pahighi. Mase iạ nẹ̌bera si sie, ’Iạ mẹ̌dorongko manginung.’ 46Dingangu masahawụ i sie něndělusu wěnsadẹ̌ ene wọu wěmbange ringangu nẹ̌bera, ’Panginungke, dingangu manga ontan Tuange mal᷊aing takụ ipanginung.’ Mase iạ nanginungke kụ bọu ene mangạewe ontaku ene e mal᷊aing niapěnginunge. 47Bọu ene iạ nakiwal᷊o, ’Kai i sai i amangu?’ Kụ bọu ene i sie simimbang, ’I amangku e i Betuel, anạ i Nahor dẹ̌duang Milka.’ Mase iạ e nanangẹen dal᷊ěgahẹ̌ bul᷊aeng su irunge ringangu něluhẹem bukal᷊ạ sěmparẹ̌ su pul᷊aenge. 48Iạ e nẹ̌tumpěkuhẹ̌ nẹ̌suba Mawu, Ruatan mawuku i Abraham. I sie seng něngahạ u iạ natěpasu ini e su anum manga anạ u sěmbaụ u mawuku, hakịu iạ e nakapẹ̌sombangu mahuala ini e waugu anạ e. 49Kụ ini e tangú, kamagengu i kamene sadia miěbạ mawuku e mapia ringangu manodě u satiang kamene si sie kere anạ u sěmbaụ, ute paul᷊ị e si siạ, kai kamagengu tala ute ul᷊ị e lai, tadeạu iạ masingkạ kụ měnsang kai mẹ̌koạ apa.”
50I Laban dẹ̌duang Betuel simimbang, ”Ual᷊ingu hal᷊ẹ̌ nariadi ini e kawe wọu anum Mawu e asal᷊e, ute i kami e tawe makawerang apa. 51Ene ěndaị i Ribka e; balạe kere i sie apatol᷊e si Tuang kụ apakakoạ kawingʼu ahusu mawun Tuang, kerẹewe nititan Mawu e.” 52Piạ e ěllang i Abraham ene e nakaringihẹ̌ baweran dẹ̌dua e, i sie měngkatewe tanaẹ nẹ̌tumpěkuhẹ̌ nẹ̌suba Mawu. 53Mase i sie nangukahẹ̌ pakeang, manga ral᷊ěgahẹ̌ sal᷊aka ringangu wul᷊aeng kụ kěbị ene nionggọ e si Ribka. Kụ mahuanene ringangu i ninange mal᷊aing nionggotangu laonggọ mal᷊aarěga.
54Bọu ene ěllang i Abraham dingangu manga esẹewe apan dingange nahungkaěng dingangu němpanginung bọu e němpẹ̌tikị sene. Ene i sire nẹ̌bangungke sěngkamal᷊ukade, ěllang ene e nẹ̌berạ e, ”Apẹ̌sul᷊e e sol᷊ong anum mawuku e iạ.”
55Arawe angkuěngkewen mahuanene rẹ̌duan ninange, ”Balako i Ribka e katanạ e ringang i kami manga sěngkamisa arau sarang manga mapul᷊o ěllo lai, kụ buhụ e i sie rolohẹ̌.”
56Kai ěllang ene e nẹ̌bera, ”Abe pěmaedẹ̌ si siạ. Mawu e něngal᷊amatẹ̌ daral᷊engku; balako iạ e mapul᷊ẹ sol᷊ong anung mawuku.”
57Angkuěng i sire, ”Ěndaịko i kitẹ mẹ̌kui si Ribka kụ deng makiwal᷊ong ěbạ e.” 58Mase i rẹ̌dua e kimuị e si Ribka kụ nakiwal᷊o, ”Mapulu i kau tumol᷊e tau ěndaị e?”
Angkuěng u mahuala ene, ”Ore, iạ mapulu.”
59-60Tangu i sire e napakawalang Ribka rěduang ěllange wawine nạung nẹ̌tahanạ si sie napul᷊ẹ dingangu ěllang i Abraham dingangkewelain taumatane. Bọu ene i sire něngal᷊amate si Ribka ringangu wawerane kere ini,
”Mal᷊owọko i kau Ribka makoạ i ninangu taumata jutane kal᷊awọe!
Mal᷊owọko hitenu e měmpanaghuang tukadu soang kal᷊awọu apam měmpẹ̌bẹ̌binsị e!”
61Bọu ene nẹ̌dariahị e i Ribka ringangu manga mal᷊ahuala apan nakoạ ěllange, kụ němpẹ̌sake onta kụ nẹ̌buạ e timol᷊e su ěllang i Abraham ene.
62Ene natarangke i Ishak nasongo wọu#24:62: Nasongo wọu: Tungkangu nạung pira-pira e: nasongo sarang. wanua l᷊inggi e, simahe wọu pahighi kụ isẹ̌sẹ̌bạ ”I Sie Kụ Nạung Nẹ̌kakělla Siạ” dingangu natanạ su sěmbekan timuhẹ̌ bọu Kanaan. 63Piạ sěngkawawěllo i sie siměbang bọu tentane mapulu reng mědẹ̌daral᷊eng su rahami, kutẹu i sie nakasilo onta mal᷊awọ kạpahunděntane. 64Ene i Ribka e nakasilọ e si Ishak, i sie riměllusẹ̌ wọu ontane, 65kụ nakiwal᷊o su ěllang i Abraham ene, ”Kai i sai tau esẹ su rahami e ramahi mẹ̌tẹ̌timona si kitẹ e tangu?”
”I sie e kai mawuku,” angkuěng u ěllang ene, bọu ene i Ribka něngal᷊a e tatimbuhunge kụ něhěmbung gatine.
66Bọu ene ěllang ene nẹ̌běke si Ishak kal᷊awọu apang kụ seng bọu nikoạ e. 67Bọu ene i Ishak nẹ̌bawa si Ribka sol᷊ong dal᷊ungu tentan Sara i ninange, kụ kinoạ e kawinge. I Ishakẹ̌ kụkěndagʼi Ribka; tangu naung i Ishakẹ̌ e měngkai mal᷊uasẹ̌ manimbe wọu kinailangeng i ninange.
Currently Selected:
PĚNDARIADI 24: SXN
Highlight
Share
Copy
Want to have your highlights saved across all your devices? Sign up or sign in
