PĚNDARIADI 23
23
I Sara e nairị dingangu i Abraham e namělli ěntanang pěngangubul᷊ang
1Bọuten i Sara nakaratingu umbure 127 su taunge, 2i sie napul᷊ẹ asal᷊e su Hebron su ěntanang Kanaan. I Abraham nasusa naunge kụ lụlungkang u papateng kawinge ene.
3Bọu ene i Abraham naněntang u maietu kawinge kụ nakoạ sol᷊ong anun tau Het, kụ měmpẹ̌tětanạ su soa ene. I sie nẹ̌bera, 4#MMR. 7:16; Ibr. 11:9, 13 ”Iạ ini e tau raghị kụ mạtanạ sutal᷊oarang manga anạ u sěmbaụ; tangu iạ e onggotengkong kamene ěntana manga sěngkempang takụ baehang baugu pělẹ̌bingangu kawingku.”
5I sire simimbahẹ̌, 6”I kami e lụl᷊ahunggeẹ̌ i Tuang kawe sěngkatau těmbonange matoghasẹ̌ sutal᷊oarang kami, kụ lẹ̌bingke kawing i Tuang su lěbing kapiaěnge tataghuaneng i kami e. I kami e kěbị e mal᷊uasẹ̌ bue měndiahing pěndal᷊ebingang baugu kawing i Tuang.”
7Bọu ene nẹ̌subạ e i Abraham su těngon sire, 8ringangu nẹ̌bera, ”Kereu manga anạ u sěmbaụ e mapakawalang iạ e mělěbingu kawingku e sini, ute tul᷊ungko roronge si Efron, anạ i Zohar esẹ e, 9tadeạu i sie reng makapẹ̌bal᷊u u liang u Makhpela su wiwihu rahamine. Mapiawe i sie pẹ̌bal᷊ụ u ěntana sini, kụ sahidiangbeng kamene manga anạ u sěmbaụ e. Kerẹewe niarěgạ e ute takụbe waehang pakasue, tadeạu ěntana ene e makoạbe tataghuanengku.”
10Su tempo ene i Efron sẹ̌sane mạiang sěngkakaiang dingangu tau Het su tampạ u pẹ̌kakomol᷊ang su tukadʼu sasuẹ̌kang u soa. Kụ sẹ̌sahiriangkeng kal᷊awọu taumata apan sene e, i sie simimbahẹ̌ u, 11”Kawanuaku sẹ̌saku e nakoạ sahidi u pal᷊ahinsinuangeng ene ringangu liange takụ ighěllị tadeạu i Tuang e makapělěbingbe kawing i Tuang.”
12Tangu i Abraham nẹ̌tumpěkuhẹ̌ su těngon tau Het ene, 13kụ kinaringihu kal᷊awọu taumata e, tangu i sie nẹ̌bera si Efron, ”Tul᷊ungko raringihe iạ. Iạ e mapulu mamělli kạguwạu rahami ene. Daekẹ e roite, tadeạu iạ makapělebingu kawingku e sene.”
14-15I Efron simimbahẹ̌, ”Entana sěmpalang kụ arěgane kětạeng ěpạ u hasụ su kal᷊ěpane roitẹ̌ sal᷊aka e – apạ e mangal᷊ene ene si kandua? Lěbingke kawing i Tuang e sene.” 16I Abraham e mal᷊uasẹ̌ bue su arěga ěndaị e. I sie něndekeng doitẹ̌ sal᷊aka e kal᷊awọewen nisěbạ i Efron, kụ ěpạ u hasụ su kal᷊ěpane roitẹ̌ sal᷊aka, timuhụewe timbangeng nipakẹ u taharagang. Bọu e i sie němaehẹ̌ si Efron, nisahidiangu kal᷊awọu tau Het ene.
17Kerene ěntana pal᷊ahěnsinuangeng i Efron su Makhpela su sěmbekan daki wọu Mamre e nakoạ tataghuaneng i Abraham. Ěntana ene ute kai pal᷊ahěnsinuangeng dingangu liange ringangu kal᷊awọu kakaluange nasowal᷊ai kakaluang kụ ene su manga pẹ̌saraěnge. 18Ěntana ene niaku kere tataghuaneng i Abraham kahiang kěbị tau Het apang němpẹ̌songo su ral᷊ungu pẹ̌sasombang su tukadʼu sasuěkangu soa e.
19Bọu ene i Abraham nělẹ̌bingken Sara kawinge su ral᷊ungu liang u Makhpela su ěntanang Kanaan. 20Kerene pal᷊ahěnsinuangeng dingangu liange nạung tẹ̌taghuaneng u tau Het ene e, nakoạ tataghuaneng i Abraham baugu pěndal᷊ebingang.
Currently Selected:
PĚNDARIADI 23: SXN
Highlight
Share
Copy
Want to have your highlights saved across all your devices? Sign up or sign in
