PĚNDARIADI 22

Mawu Ruata e nangoro si Abraham tadeạu apạněmbang anạ e i Ishak

1 # Ibr. 11:17-19 Apam pira ěllo tuhụ e tangu Mawu Ruata namanikạ kasasatiang Abraham, Ruata e nẹ̌kui, ”Abraham!” Mase i Abraham simimbang, ”O Mawu.”

2 # 2Kar. 3:1 Angkuěng u Ruata, ”Dakọe kakoạ sol᷊ong ěntanang Moria dingang i Ishak, anạu man sěmbaụ, anạu ikẹ̌kěndagu. Paị sene, su wul᷊ude sěmbua kụ sarung Takụ i těbọ si kau e tangú, gěllịko anạ u koạko kere sasěmba tẹ̌tutungang baugu Iạ.”

3Sěngkariọěllone mal᷊uka-l᷊ukadẹ̌, i Abraham němengesẹ̌ manga kalun sasěmba, mase kal᷊awọu kalu ene nịlaikị e su wowong kalidene. I sie nẹ̌buạ dingangu anạ e i Ishak dingangu ěllange ruang katau sol᷊ong tampạ kụ nipaul᷊ị u Ruata e si sie. 4Su ěllo katěllune tangu kinasilọeng Abraham tampạ sěmpalang ene wọu maraune. 5Mase i sie nẹ̌bera su ěllange rarua u, ”Katanạko i rua sini ringangu kalide ini. Iạ dingangu anạku e reng tamai maněmba Mawu e, kụ hědon saụ mẹ̌sul᷊e su anun dua.”

6Ene i Abraham nělěngkangkeng kalu waugu sasěmba tutungange su wěmbang i Ishak, arawe i sie ute nẹ̌bawa putung dingangu pisọ. Ene i rẹ̌dua e kạpahundal᷊enge, 7i Ishak nakiwal᷊o, ”Amang!”

I Abraham simimbang, ”Kai piạ apa amang?”

Ishak nakiwal᷊o, ”I kadua e kai seng nẹ̌bawa putung dingangu kalu, kụ kai suapa tangu anạ u domba waugu sasěmba tutungang e?”

8I Abraham simimbang, ”Duata e sẹ̌sane sarung manadia anạ u domba ene.” Mase i rẹ̌dua e měngkate rimal᷊eng.

9 # Yak. 2:21 Ene piạ i rẹ̌dua nahumpạ e su tampạ sěmpalang kụ nihabarʼu Ruata si Abraham, kụ i sie něndarisị u pananěmbaěng sěmbaụ kụ něhunsudẹ̌ kalu ipěndikọ e su wowone. Mase nihapuse anạ e kụ niparal᷊oka su pananěmbaěng su wowong kalu lahunụ e. 10Bọu ene i sie něngal᷊ạ e pisọ e kụ měmatẹewe anạ e. 11Kai malaekatʼu Mawu e kimui si sie wọu l᷊angị e, ”Abraham, Abraham!”

Sasimbang i Abraham, ”O Mawu!”

12”Abe pěnunsara rariọ ene arau abe pẹ̌kapurai i sie,” angkuěngu Mawu Ruata e wọu tingihu malaekatẹ̌ ene. ”Kụ ini iạ masingkạ e u i kau mạngadatẹ̌ dingangu matuhụ si Siạ e, ual᷊ingu i kau tawẹ kụdirine waugu měnarakangu anạ u mang sěmbaụ ene si Siạ.”

13Mase i Abraham němanda kaihi ringangu koaneng kụ nakasilọ e domba esẹ sěmbaụ nakaị u sungene su ghahundunge. Tangú i Abraham měngkatewe tamai něngal᷊ạ domba ene kụ siněmbane su Mawu kinoạ e sasěmba tutungang piněngal᷊uang anạ e. 14I Abraham nẹ̌sẹ̌bạu sěmpalang ene, ”Mawu e něndiahing#22:14: Něndiahi arau nakasilo. apang gẹ̌gausang.”#22:14: Mawu něndiahing apang gẹ̌gausang arau Mawu e kinasilo. Kụ sarạeweng orasẹ̌ ini e lai taumata e nẹ̌bera u, ”Su wul᷊udʼu Mawu něndiahing apang gẹ̌gausang.”

15Sěnsul᷊ekol᷊ai wọu l᷊angị malaekatʼu Mawu e kimui si Abraham, 16#Ibr. 6:13-14 ”Mawu něhengetang: Iạ e mẹ̌salu ringangu areng-Ku sẹ̌saku u i kau nẹ̌koạ kerene ringangu tawẹ kụdirine měnarakangu anạ u mang sěmbaụ ene si Siạ, 17#Ibr. 11:12 kụ Iạ sarung měngal᷊amatẹ̌ si kau iapẹ̌dal᷊embo ringangu mapakakěpal᷊u hitenu kere wituing su l᷊angị dingangu kere kal᷊awọu ěnne su wiwihu apeng. Kụ manga hitenu e sarung mamatạ kal᷊awọu rokạ i sire. 18#MMR. 3:25 Patikụewe umatẹ̌ su dunia sarung gumahiorọ su těngo-Ku mědeạu Iạ měngal᷊amatẹ̌ si sire kerẹewe hitenu e seng Takụ nial᷊amateng – batụu i kau seng timuhụ laoro-Ku.” 19Bọu ene nẹ̌bal᷊ị e i Abraham sol᷊ong anung manga ěllange rarua, kụ bọu e i sire natamai sěngkatamai sol᷊ong Bersyeba, kụ i Abraham nẹ̌tanạ sene.

Hiten Nahor

20I Abraham piạ tuhange isẹ̌sẹ̌bạ si Nahor. Samuring piạ apa nariadi su Wul᷊udu Moria, i Abraham nakaringihẹ̌, u i Milka, kawing i Nahor seng piạ anạ e esẹ ual᷊ung katau, kụ kai; 21i Us, anạ e i akang; i Bus, tuarine; i Kemuel, nạung samurine nakoạ i amang i Aram; 22i Kesed, i Hazo, i Pildas, i Yidlaf, dingangʼi Betuel, 23kụ bọu ene nakoạ i amang i Ribka. Kụ ene ute i sire ual᷊u anạ piněhanạ i Milka si Nahor tuhang i Abraham. 24I Nahor piạ kapapuěnge i Reuma ringangu kapapuěnge ene i sie něhanạ i Tebah, i Geham, i Tahas dingangu i Maakha.

Currently Selected:

PĚNDARIADI 22: SXN

Highlight

Copy