PĚNDARIADI 19

Dosang Sodom

1Bọuten nakisake su anung Abraham, malaekatẹ̌ darua e nakoạ sol᷊ong Sodom kụ nahumpạ sene seng hěbi. I Lot mạiang su sasuěkang u soan Sodom e, kụ sarangke nakasilo si rẹ̌dua e, i sie rimarisị e kụ naněnsomahẹ̌ si rẹ̌dua, kụ nẹ̌těngkasumagẹ̌ su těngon dědua, 2kụ nẹ̌bera u, ”Manga mawu, otongko su wal᷊eng ěllang e, kụ pěmpanguhasẹ̌ko laedẹ̌ dingangu pěmpẹ̌hědang su wal᷊eku. Mạengbeng ute hědọen diěllo mal᷊uka-l᷊ukadẹ̌ pěmpẹ̌bangung mase pahundal᷊eng kapia.”

Kaiso i rẹ̌dua e kawe simimbahẹ̌ u, ”Walạ e i kandua e mẹ̌tikị e sini sutal᷊oaran soa.”

3I Lot mẹ̌dẹ̌dorong sěngapang botonge, kụ nạdehọ i rẹ̌dua e nahundangengke su ral᷊ungu wal᷊ene. I Lot e něnadiạeng simokol᷊e masasědapẹ̌ dingangu nẹ̌tongkạ e borotẹ̌ pinakatimu kụ bọu ene němpẹ̌simokol᷊e i rẹ̌dua e.

4Arawe i rẹ̌dua e reng tawe němpẹ̌sohọ němpěhedang e, tau Sodom manga esẹ e seng němpěliwungke wal᷊e ene. Kěbịewe apang manga esẹ u soa ene, baewe maghaghurang arau apạeweng mangangudạ e, kụ ene sene. 5#Měl. 19:22-24 I sire němpẹ̌kuị si Lot, dingangu nakiwal᷊o, ”Kai suapa i sire nahunděnta nẹ̌tikị su wal᷊enu e? Apasěbangko i rẹ̌dua e tadeạu i kami e makapẹ̌dal᷊ahapị i rẹ̌dua!”

6I Lot siměbang bọu wal᷊ene, kụ bọuten něhěping tukadẹ̌ e, 7i sie nẹ̌berako su tau Sodom e, ”Manga anạ u sěmbaụ, iạ mapulu reng mẹ̌gausẹ̌ sěngapam botonge, abe pěkoạbe hal᷊ẹ̌ dal᷊akisẹ̌ kerene! 8Kenang pěmpẹ̌daringihẹ̌, iạ e piạ anạku mahuala parawang duang katau. Balạe kere i rẹ̌dua e takụ isarakang si kamene kụ balạe i kamene měnsang mẹ̌koạ apa si rẹ̌dua e. Kai abe pẹ̌kapuraing kamene sakeku ini e; watụ u iạ kai harusẹ̌ mangěllung i rẹ̌dua e.”

9Kai angkuěng u tau Sodom e si Lot, ”Dakọe! I kau tau raghị měngatorẹ̌ si kami? Lighạ e pameho! Mạeng tawe lighạ mameho, i kau e reng koateng i kami e limembong kawěhạ e wọi rẹ̌dua ene.” Bọu ene i sire němpěnuhudẹ̌ si Lot dingangu nẹ̌tatal᷊iwungke němpaněnehẹ̌ tukadẹ̌. 10Arawe sake rarua ene němpanogore liman dẹ̌dua kụ namol᷊eng si Lot sol᷊ong dal᷊ungu wal᷊e, mase něhěping tukadẹ̌. 11#2Rat. 6:18 I rẹ̌dua e napakawutang matan sire kěbị apang sul᷊ikudu wal᷊e ene, hakịu i sire ene tawe nakareạ tukadẹ̌ e kapia.

I Lot naněntangu Sodom

12Sake rarua e nẹ̌bera si Lot, ”Kereu i kau piạ anạ u esẹ, anạ u wawine, anạ mirarating arau apạewen mạdarekeng ěgẹ u wal᷊ine kụ matanạ su soa ini e, paringangko apạsẹ̌bang bọu ini, 13u soa ini e kai winasaěng i kandua. Mawu e seng nakaringihẹ̌ pangaduhang masěgadẹ̌ baugu tumanạe sini, kụ i kandua e seng nirolohẹ̌ baugu ipaminasa soan Sodom.”

14Mase limintụ e i Lot nẹsombang u kaghiangu manga anạ e rarua e kụ nẹ̌bera, ”Pakal᷊ighạbe sěbang bọu ini e, batụu Mawu e sarung mapakawinasa.” Arawe i sire tangu mạngiral᷊ing u katihọ e i Lot kai kětạeng lụlambihẹ̌.

15Su tempong kalonge, malaekatẹ̌ darua e nangosạe si Lotẹ̌ pakal᷊ighạ mẹ̌buạ. ”Pakarol᷊ạko”, angkuěng i sire. ”Dakọe paringang kawingu ringangu anạu mahuala rarua e wọu ini, tadeạu i kamene tawe mate kereu soa ini e ipakawinasa.” 16#2Ptr. 2:7 I Lotẹ̌ e kai ghụgěnggang. Arawe Mawu e makạpěndang tụtal᷊ěntụ i sie; ual᷊ingu ene sake rarua ene něngahạ i Lot dingangu kawinge ringangu anạ e rarua sol᷊ong likudu soa. 17Bọu ene sěngkatau wọu malạekatẹ̌ ene nẹ̌bera, ”Tal᷊angke pěngambangke niawanu! Abe pěbihu sol᷊ong likudẹ̌ dingangu abe kaědung su wal᷊ane. Tal᷊angke sol᷊ong bawul᷊urang e, tadeạu i kamene kumbahang mate!”

18Arawe i Lot simimbang, ”Kasiang! Mawu, kumbahangbe i kami irolohẹ̌ sol᷊ong bawulurange. 19Mamben těngadẹ̌, u mawu e seng limembom makatul᷊ungu iạ dingangu makaambang niawaku. Kaiso wawul᷊urange ene e kai apạe marau; kụ kibasịu iạ e kai karahiuangu kawawinasa e kụ mate reng tawẹ nahumpạ sene. 20Kakělla su těngone pai, piạ soa kadodọ kụ tawe tumanịu marau. Kụ iạ e apatal᷊angko sol᷊ong pai ene tadeạu maambang.”

21Malaekatẹ̌ e simimbang, ”Kerenẹ e, soa kadodọ ene e tawe takụ bal᷊intuikang. 22Lighạ e tal᷊ang! U iạ e ren tawe makakoạ apa-apa těntal᷊ang i kau e ren tawe nahumpạ paị sene.”

Ual᷊ingu i Lot kawe nẹ̌sẹ̌bạu soa ene kadodọ, ute soa ene nisěbạe Zoar.#19:22: Zoar: Areng ini raringihang kere werang Ibrani kụ mangal᷊ene ”kadodo”.

Kaghagholọu Sodom dingangu Gomora

23Matangěllo e kai kạsěpụ e piạ i Lot nahumpạ su Zoar. 24#Mat. 10:15, 11:23-24; Luk. 10:12, 17:29; 2Ptr. 2:6; Yud. 7 Sěngkianu Mawu e naparasehu tahiti malelang dụděllị su wowong soan Sodom ringangu Gomora. 25Soa rarua ene nikal᷊iune ringangkewen kạguwạu wal᷊ane ringangu patikụ kakaluang dingangkewelaim patikụ měmamanuane sene. 26#Luk. 17:32 Arawe kawing i Lot nẹ̌bihuko l᷊ikudẹ̌, kụ bọu ene i sie nẹ̌bal᷊ui nakoạ tuidẹ̌ asing.

27Sěngkariọěllone mal᷊uka-l᷊ukadẹ̌, i Abraham masahawụ-sahawụ nakoạ sol᷊ong sěmpalang nạung dẹ̌darisikange su těngon Mawu e sahěllo kal᷊imona wọu ene. 28I sie němanda sol᷊ong Sodom dingangu Gomora dingangu kasariạewen bal᷊ane kụ i sie nakasilọe tipu tụtiwuạ bọu wanua ene, al᷊ingkai tipun dapuhang gagherẹ. 29Kerene nạung piạ Duata naminasa kal᷊awọu soa su wal᷊ane su katatanakeng i Lot, Mawu e nakatahěndung si Abraham dingangu nẹ̌tul᷊ung i Lot niapatal᷊ang u watangenge.

Bẹ̌keng karariadin tau Moab dingangu tau Amon

30Ual᷊ingu i Lot matakụ mangindunụ su Zoar, tangu i sie nakoạ e sol᷊ong bawulurange dingangu anạ e rarua wawine, mase nẹ̌tanạ su ral᷊ungu liang sěmbaụ. 31Anạ e wawine i akang nẹ̌berạ su tuarine, ”I amang i kadua e kai seng maghurang, dingangu su kaguwạu wanua#19:31: Su kaguwạu wanua arau su kěbị banua. ini e tawẹ apa manga esẹ kụ makapẹ̌kawing i kadua kụ makareạ hite. 32Ěndaị e i kadua mapěnginungkeng amang i kadua e, kụ bọu ene i kadua e mẹ̌tikị dingange tadeạu makareạ pal᷊ahite.” 33Tangu hěbịewe ene i rẹ̌dua napěnginung i amang i rẹ̌dua e anggorẹ̌, mase anạ e i akang e nẹ̌tikị dingang i amange; arawe i amange e mang běga maěllị měnsang apa nariadi e kahiam bukange.

34Sěngkariọěllone i akang e nẹ̌berạe su tuarine, ”Ene mẹ̌kělaeng ini e iạ nẹ̌tikị su rěduhi amangku e! Kụ měntehang hěbi e i kadua saụko mapěnginung i amang i kadua e lai. Mase pẹ̌tikịe i kau su rěduhe. Kụ mědeạu i kadua e lawọ makaěbạ pělahite wọu i amang i kadua.” 35Tangu hěbịewe lai ene i rẹ̌dua e napakawukang i Lot, kụ anạ e karuane e nẹ̌tikị su rěduhe. Kụ i Lot měngkate apa wukang matědụ hakịewem běga maěllị měnsang apạe nariadi. 36Ene anạ i Lot darua e nẹ̌pohiamạ e kěbị bọu i amang i rẹ̌dua e. 37Anạ e i akang němantelu anạ esẹ siněbạ e si Moab.#19:37: Moab: Areng ini daringihang kere werang Ibrani kụ mangal᷊ene ”wọu anung amangku”. I sie nakoạ i upungu tau Moab orasẹ̌ ini. 38Tuari e mal᷊ain namantelu anạ esẹ, siněbạ e si Ben-Ami.#19:38: Ben-Ami: Areng ini su werang Ibrani mangal᷊ene: ”Anạ bọu anạ u tuariku”, kụ tingihe kere werang Ibrani waugu ”tau Amon”. I sie nakoạ i upung u tau Amon sarạeweng ini e.

Currently Selected:

PĚNDARIADI 19: SXN

Highlight

Copy