PĚNDARIADI 18
18
Mawu Ruata e nẹ̌kedon sěngkatau anạ esẹ si Abraham
1 Mawu e nẹ̌těngkasilom batangenge si Abraham su rěduhu kalun jati su tampạ u pẹ̌kakal᷊iomanengang su Mamre. Su tempo ene tangu ěllo e tumanịu matětị, kutẹu i Abraham kai kụkaiang su tukadu tentane. 2#Ibr. 13:2 Sarạeng i sie něhengkẹ e těmbọ e, i sie nakasilọ e tau esẹ těllung katau rụdarisị su těngone. I Abraham měngkatewe lighạ timal᷊ang kụ naněnsomahẹ̌ si sire. Kapẹ̌tẹ̌tumpěkuhe, 3i sie nẹ̌bera u, ”Manga mawu e, abe pěmpẹ̌sahe su tentaku kereu tawe maotong kal᷊imona; apakawalako iạ deng mẹ̌tangkiang si kamene manga mawu. 4Balako iạ měngal᷊ạ akẹ ipanguhasẹ̌ laedʼi kamene manga mawu e; kụ pěmpangirul᷊eko su al᷊ungu kalu ěndaị e. 5Tangu iạ deng maměllọu simokol᷊ẹ̌ sěngkamohong, tadeạu i kamene reng makahombang kuatẹ̌ buhu, mase wuhụ e saụ dal᷊eng. I kamene manga mawu e seng limahunggeẹ̌ u ěllang i kamene e kụ deng notong su wal᷊eng ěllangu ini e.”
Angkuěng i sire, ”Tarimakasẹ bue waugu kapianu. I kami e motongke wue.”
6Ene i Abraham měngkatewe masahawụ-sahawụ simuẹ̌ su ral᷊ungu selo e kụ nẹ̌bera si Sara, ”Lighạko pěngal᷊ạ tapoěng kal᷊ěnggihange sěngkarong, kụ pẹ̌koạko borotẹ̌.” 7Mase i sie timal᷊ang sol᷊ong gapaěngu binatang, kụ namile anạ u sapi matawa sěmbaụ, gěsine masikome, kụ nionggọe su ěllange kụ lighạ pinakisadia. 8Bọu ene i Abraham něngal᷊ạ e susu kaesẹ̌, susu kompelẹ̌, dingangu gěsin sapi sasạ e kụ pinẹ̌sake si sire. Těntal᷊ang i sire kapẹ̌sẹ̌simokol᷊e, i Abraham sẹ̌sane tangu mětẹ̌tangkiang si sire su al᷊ungu kalu ene.
9Bọu ene i sire nakiwal᷊o, ”Kai suapa i Sara, kawingu?” ”Paị su ral᷊ungu tenta,” angkuěng i Abraham. 10#Rm. 9:9 Sěngkatau wọi sire e nẹ̌berạ e u, ”Sio wul᷊angko l᷊ai,#18:10: Sio wul᷊angko l᷊ai arau Taung damahi su tempo kere ini. Iạ e saụ mẹ̌bal᷊ị. Kụ su tempo ene tangu i Sara kawingu e sarung makahombang anạ esẹ.”
Su tempo ene i Sara e rụděndengelẹ̌ su tukadu tenta, sul᷊ikudʼi sire manga sake e. 11Ene i Abraham dẹ̌duan Sara e kai seng maghurang, kutẹu i Sara e kai seng tawe raral᷊engangu raha. 12#1Ptr. 3:6 Ual᷊ingu ene i Sara liměge su ral᷊ungu naunge kụ nẹ̌bera, ”Iạ ěndaung seng maghurang dingangu nalolang kere ini e, seng tawe masowa su sipirang kụ delaing děntaěngu kasika su kawingku e? – Kerene lai kawingku mal᷊aing seng maghurang.”
13Mase Mawu e nakiwal᷊o si Abraham, ”Unụe i Sara e liměge ringangu tawẹ kasahekange měnsang i sie wědang botonge mamantelu rariọ su tempong i sie maghurang tangu? 14#Luk. 1:37 Piạbe apa tamakoạ su Mawu? Kerẹewe seng nawera kanini u, sio wul᷊angko l᷊ai Iạ e saụ mẹ̌sul᷊e kapia sol᷊ong ini. Kụ su tempo ene i Sara e mamantelu rariọ esẹ.”
15Ual᷊ingu i Sara e natakụ, i sie nẹ̌sunial᷊ẹ̌, angkuěnge, ”Iạ e tawe liměge.”
Kaiso Mawu e simimbang, ”Mamben těngadẹ̌ kanini i kau e tawe liměge.”
I Abraham makịampung u Sodom
16Bọu ene i sire těllu esẹ e němpẹ̌buạ e wọu ene kụ nitondang Abraham. Mase nahumpạe i sire těllu e su tampạ sěmbaụ suapangkewe i sire makapěmanda Sodom. 17Mawu e měbẹ̌bera su ral᷊ungu naunge, ”Iạ e tawe mapulu měmuni si Abraham apạewen Takụ koatenge. 18Kai wal᷊inewe hitene tangu sarung makoạ umatẹ̌ masěllahẹ̌ dingangu kawasa? Kai wal᷊inewe ual᷊ingu i sie tangu patikụ umatẹ̌ su dunia e sarung Takụ al᷊amateng?#18:18: Patikụ umatẹ̌ … Takụ al᷊amateng arau Patikụ umatẹ̌ sarung kumahiorọ si Siạ tadeạu Iạ měngal᷊amatẹ̌ si sire kerẹewe sen Takụ nial᷊amateng i sie. 19I sie kai seng Takụ pinile tadeạu mangoro su manga anạe esẹ dingangu apang hitene mědeạu tumuhụ si Siạ kụ mẹ̌koạ apam mapia ringangu adilẹ̌. Kereu hal᷊ẹ̌ ene koatengben sire tangu, kal᷊awọu kědoku e si Abraham sarungbe Takụ iapakasěhụ.”
20Tangú tuhụ e Mawu něhengetangke si Abraham, ”Piạ tatoke ghẹ̌guwạ mihino su Sodom dingangu Gomora, dingangu mamben masaria rosan sire. 21Ual᷊ingu ene hakịu Iạ e ren tanạe duměsung mẹ̌kakělla měnsang kahěngang bue kal᷊awọu laěnsilẹ̌ ene arau kawe tala wue.”
22Mase ruang katau wọu tal᷊oarang kal᷊awọu sake ene e nẹ̌buạ nakoạ sol᷊ong Sodom, arawe Mawu e mang bědang kạtatanạ dingang i Abraham. 23I Abraham e rimanị e Mawu kụ nakiwal᷊o, ”Kahěngang ngae Mawu e měhukung u taumata tạ sal᷊ane e sěngkakahukung dingangu taumata nẹ̌sal᷊a? 24Mangạewe piạ 50 su kataune kụ tawẹ sal᷊ane e su ral᷊ungu soa ene, kụ lẹ̌ěnang tangu měnsang kasěllahu soa ene sarung apakawinasan Mawu? Tawe ěndọu Mawu e mangampung si sire tadeạu i sire limam pul᷊o su kataune e reng maambang? 25Kumbahang bue i sire apan tawẹ sal᷊ane e ihukung sěngkakahukung dingang i sire piạ sal᷊ane. Karimạko Mawu e marau wọu pẹ̌kakoạ kerene! U kamageng u Mawu e mang mẹ̌koạ ene, nal᷊ahẹu taumata tawẹ sal᷊ane sarung ihukung sěngkakahukung dingang i saing nẹ̌sal᷊a. U tawe masowa su sipirang kụ mělahukungu sěntendengu dunia e kụ kawe mẹ̌koạ hal᷊ẹ̌ tawe su kạadile!”
26 Mawu e něhengetang, ”Kereu manga Iạ makahombang limam pul᷊o su kataune kụ tawẹ sal᷊ane su Sodom, Takụ sarung ampungang kasěllahu soa ene waugʼi sire.”
27I Abraham saụ kapia nẹ̌bera u, ”Ampunge wue iạ batụu timawahasẹ̌ naněmpụ pal᷊ahumbisara ini e, Mawu. Iạ ini e kětạemben taumata, kụ tawẹ kawasa waugu makapẹ̌berang apa. 28Kai aramanung kětạembeng ěpạ u pul᷊o l᷊ima su kataune tawẹ sal᷊ane bal᷊inewe limam pul᷊o. Kụ lẹ̌enaěng Mawu e sarung mapakawinasang kasěllahu soa ene kereu tumbạeng kinaghaingangu limang katau tangu?”
Mawu e něhengetang, ”Soa ene tawe Takụ ipakawinasa kereu sene Takụ kaẹ̌bakeng ěpạ u pul᷊o l᷊ima su kataune tawẹ sal᷊ane.”
29Kutẹu i Abraham saụewe nẹ̌bera, ”Kereapa wue kamageng u kětạeng ěpạ u pul᷊o su kataune?”
Mawu e simimbang, ”Baugʼi sire ěpạ u pul᷊o ene e Iạ reng měngědal᷊u karaki-Ku.”
30I Abraham nẹ̌bera, ”Kumbahangbe lumangehẹ̌ i Kau Mawu, kereu iạ saụ mẹ̌bisara kapia. Kereapa wue manga kětạeng těllum pul᷊o su kataune?”
Mawu e něhengetang, ”Kereu Takụ kaẹ̌bakeng těllum pul᷊o su kataune, ute karaki-Ku e reng Takụ iědal᷊ẹ̌.”
31I Abraham nẹ̌bera, ”Ampunge wue iạ e ual᷊ingu tumanịu nawahani naněpasu wisara ini, Mawu. Kereu manga tumbạeng piạu ruam pul᷊o su kataune ute kereapa wue?”
Angkuěngu Mawu, ”Kereu Takụ kaẹ̌bakeng duam pul᷊o su kataune, soa ene tawe sarung Takụ ipakawinasa.”
32Kasueěnge i Abraham nẹ̌bera, ”Mal᷊owọko Mawu e tawe lumangehẹ̌. Mawu, iạ kětạeng saụ l᷊ai mẹ̌bera sěnsul᷊e. Kereapa kamagengu kaẹ̌bakeng kětạembeng mapul᷊ong katau tudẹ e?”
Mawu e něhengetang, ”Kereu piạ mapul᷊ong katau tawẹ sal᷊ane, Iạ e sarung tawe mapakawinasang soa ene.” 33Sarangke nasuẹeng bisarane ringang i Abraham, Mawu e rimal᷊eng, dingangu i Abraham napul᷊ẹ sol᷊ong bal᷊ene.
Currently Selected:
PĚNDARIADI 18: SXN
Highlight
Share
Copy
Want to have your highlights saved across all your devices? Sign up or sign in
