AMOS 7
7
PAPASILO MẠANUNG HUKUMANG BỌU MAWU
Kal᷊imbotong
1Iạ nakahombang papasilo sěmbaụ bọu Mawu Kasěllahenge. Iạ nakasilo i Sie napakariadiʼm buntuangu kal᷊imbotong mal᷊awọ-l᷊awọ su tempong taumata nasuem běbase rěmpugẹ̌ baugu ratu, kụ děmpugẹ̌ buhu e saụewe timuwo kapia. 2Kal᷊awọu sasuang su ěntana e maraning masueng kinạ e su kal᷊imbotong ene. Bọu ene iạ nẹ̌bera, ”Mawu Kasěllahenge, ampungeko umatʼU! I sire kai tumanị u rarodọ dingangu lome, kụ kereapa wue i sire makararagẹ̌?”
3 Mawu e němal᷊ui karaki-Ne kụ nẹ̌bera, ”I kau nakasilo ene tawe sarung mariadi.”
Putung
4Iạ nakasilo sěmbaụ papasilo kapia wọu Mawu Kasěllahenge. Iạ nakasilo si Sie mẹ̌dẹ̌dariahi měhukung umatʼE ringangu putung. Putung ene nělanụ laudẹ̌ mal᷊oang bawa su al᷊ungu runia#7:4: Laudẹ̌ mal᷊oang bawa su al᷊ungu runia: Taumatang nạung kal᷊imona su Timuhẹ̌ Tal᷊oara měngẹ̌ngěnna u su al᷊ungu runia kai piạ laudẹ̌ mal᷊oang kụ nakoạ simbul᷊u kal᷊awọu sal᷊ụ dingangu matang akẹ. sarang nal᷊ěsa ringangu nanětạ e něhěngisẹ̌ dahami. 5Iạ e něbera, ”O Mawu Kasěllahenge, karimạko reng pakapurạ u putung ene! UmatʼU e tumanịu kadodọ dingangu lome, kai makararagẹ̌be kereapa i sire ngae?”
6 Mawu e němal᷊eohẹ̌ karaki-Ne lai ringangu nẹ̌bera, ”Ini e mal᷊aing sarung tawe mariadi.”
Tal᷊i kakěting tụtatei
7Iạ e nakahombang papasilo l᷊ai sěmbaụ bọu Mawu. Su siloku e i Sie rụdarisị su sěndihangu meselẹ̌ sěmbaụ kụ nipětị nẹ̌pakẹ u tal᷊i kakětinge pinakatei. Su l᷊ima-Ne i Sie mạngumpaedẹ̌ tal᷊i kakětinge ene pěmandaěng měnsang meselẹ̌ ene matei arau tala. 8I Sie nakiwal᷊o si siạ, ”Kai a kinasilonu e Amos?”
Iạ simimbang, ”Tal᷊i kakěting nạung matei wue Mawu!”
Bọu e Mawu něhengetang, ”Iạ e nẹ̌pakẹ u tal᷊i kakěting ini waugu pělahekangu umatẹ̌-Ku e mẹ̌sul᷊ungkewelai meselẹ̌ e tawe natul᷊idẹ̌. Iạ semben tawe lai měmal᷊ui karaki-Ku nal᷊ahẹu Iạ mamben sarung měhukung i sire. 9Apan tampạ kụ nipakẹ i sire hěnton Ishak baugu mẹ̌kal᷊iomaneng e sarung ipakaghoghahẹ̌. Apan tampạ u tau Israel susi e sarung ipakahaka. Iạ e sarung mapakaupung hěnton Datu i Yerobeam.”
I Amos dẹ̌duang Amazia
10I Amazia, imang su Betel, něndingọ u laporang ini si Yerobeam datung Israel, ”I Amosẹ̌ e kai nẹ̌gihingang dingangu kawanua rimokạ datu. Manga wawerane kụ pěnẹ̌nahowong kawanua e sarung makạkariadi wanua ene magholọ. 11I sie nẹ̌bera u Ratu e sarung mairị su ral᷊ungu pẹ̌seketang, dingangu tau Israelẹ̌ e nal᷊ahẹ u sarung hengketang sol᷊ong piněmembangeng, kụ magholang bọu wanuane hala.”
12Bọu ene i Amazia nẹ̌bera si Amos, ”Ei nabi, kapul᷊ẹ e sarang Yehuda! Pěnasẹ̌ko paị sene. Walạekere i sire kụ něngonggọu laidopẹ̌ si kamene! 13Manịen tawe měnasẹ̌ su Betel. Soa ene kai nitani waugu ratu, ringangu makoạ tampạ u pẹ̌kakal᷊iomanengangu sěmbihingang.”
14I Amos simimbang, ”Iạ e wal᷊inewe nabi ual᷊ingu diabatang. Tuhụ hinone iạ e mělahiking binatang dingangu měnanipo wuang ara. 15Kai Mawu e něngal᷊ạ siạ bọu karadiahangku e, kụ něndolohu iạ ipěngẹ̌ngekeng hengetangʼE su tau Israel. 16Ual᷊ingu ene tangú pẹ̌daringihẹ̌ko apang niweram Mawu e si kamene. Ual᷊ingu i kau nẹ̌sědingu iạ měnasẹ̌ pẹ̌děndokạ tau Israel. 17Mawu e nẹ̌bera u kawingu sarung makoạ tahapẹ̌sundal᷊ẹ̌ su apan dal᷊eng u soa, dingangu manga anạ i kamene sarung pateěng su ral᷊ungu pẹ̌seketang. Ěntananu sarung ipẹ̌papahiạ su taumata wal᷊ine, ringangu i kau sẹ̌sanu e sarung mate su wanuan taumata kụ běgawe mẹ̌kiral᷊a Mawu. Tumanạu Israel nal᷊ahẹu sarung hengketang sol᷊ong piněmembangeng, marau wọu wanuane hala.”
Currently Selected:
AMOS 7: SXN
Highlight
Share
Copy
Want to have your highlights saved across all your devices? Sign up or sign in
