AMOS 2
2
Moab
1 #
Yes. 15:1–16:14, 25:10-12; Yer. 48:1-47; Yeh. 25:8-11; Zep. 2:8-11 Mawu e něhengetang, ”Tumanạu Moab seng masau su sul᷊ene němpẹ̌dosa, ual᷊ingu ene nal᷊ahẹu Iạ e sarung měhukung i sire. I sire mělẹ̌hodatẹ̌ datung Edom kụ seng nate ene, kụ měmpěmungke lěbinge ringangu měngẹ̌ngal᷊ạ manga ruhine kụ tutungang pakakoạ awu. 2Ual᷊ingu ene, Iạ sarung maparěntaʼm putung su wanuang Moab, kụ pěnutung kal᷊awọu těndạ u Keriot sarang pakasue. Tau Moab sarung mate sutal᷊oarang pẹ̌sasekẹ, těntal᷊ang kạtiụ e slompretẹ̌, dingangu komandon sekẹ e wẹ̌bansageng. 3Makakawasa su Moab dingangu kěbị sawohị u mẹ̌paparenta u sarung Takụ pateěng.”
Yehuda
4 Mawu e něhengetang, ”Tau Yehuda e seng masau su sul᷊ene němpẹ̌dosa, ual᷊ingu nal᷊ahẹ u Iạ e sarung měhukung i sire. I sire limawang kal᷊awọu parenta-Ku ringangu tawe mẹ̌papadul᷊i kal᷊awọu těntiro-Ku. I sire nipakapal᷊idẹ̌ kahiang manga ruata wal᷊ine kụ sẹ̌sěmbaěng i upung i sire. 5Ual᷊ingu ene, Iạ e sarung mapakarěntaʼm putung su Yehuda kụ měnutung kal᷊awọu těndạ u Yerusalem sarang pakasue.”
Hukumang u Ruata waugu Israel
6 Mawu e něhengetang, ”Tau Israel seng masau su sul᷊ene němpẹ̌dosa, ual᷊ingu ene nal᷊ahẹu Iạ sarung měhukung i sire. Taumata matul᷊idẹ̌ kụ tawẹ makasul᷊e ědange, seng niwal᷊ụ i sire nakoạ ěllang. Kerene lai pẹ̌kakoạ i sire su taumata kasiang kụ tawe makawaehẹ̌ utange, manilaing utang ene kětạeng kere arěgang sapatu. 7I sire nanědạ taumata lome kụ tawe makakoạ manga apa, ringangu mẹ̌gěnggaẹ̌ taumata kasiang. I amang dingangu anạ mělẹ̌himaugẹ̌ ěllang bawine mẹ̌sul᷊ung, hakịu makạsamedẹ̌ areng-Ku kụ susi e. 8Suapan tampạ u pẹ̌kakal᷊iomanengang, taumata e mẹ̌tẹ̌tikị dingangu pakeang kụ nial᷊ạ i sire kere wawaehẹ̌ utang bọu taumata kasiang. Su wal᷊eng Duatan sire, i sire mạnginung anggorẹ̌ nạung lẹ̌al᷊akeng i sire wọu taumata apang piạ utange si sire.
9 #
Pang. 3:8-11
Manilaing kerene, ei umatẹ̌-Ku, kai waugʼi kamene hakịu Iạ napakawihuan tau Amori mararangẹ kere kalun cěmara ringangu matatoghasẹ̌ kere kalun terpentin. 10I kamene seng Takụ nipasěbang bọu Misirẹ̌, dingangu Takụ niahạ limiung ngara l᷊inggi ěpạ u pul᷊o su taunge karěngụ e. Ěntanan tau Amori sen Takụ nionggọ si kamene nakoạ banuang kamene hala. 11#Pẹ̌t. 6:1-8 Iạ seng němile pirang katau wọu manga anạu mědeạu makoạ nabi, ringangu pira-pirang katau mangangudạ baugu makoạ sěngkatau Nazir.#2:11: Nazir: Tau Israel mẹ̌tẹ̌ngkiang Mawu ringangu nẹ̌diandi tawe měnginung anggorẹ̌ arau inumang makakětị; tawe měmoto utạ e ringangu tawe měnenggehẹ̌ maietẹ̌ (kakělla Pẹ̌t. 6:1-8). Ei tau Israel, kai wal᷊inewe kahěngang tangu ene? Iạ e kai Mawu, kụ seng něhengetang.
12Arawe i kamene napěnginungu anggorẹ̌ suapan nakoạ Nazir hakịu i sire němpělandang kire. Dingangu i kamene němpẹ̌sěding manga nabi měhabaru tita-Ku. 13Orasẹ̌ ini e i kamene sarung Takụ sẹ̌dakeng sol᷊ong ěntana, sarang i kamene měmpẹ̌sal᷊indoro kere kareta napenẹ u lurange gandung. 14Tumal᷊ang masahawụ e mal᷊ain tawe makapěllọ; taumata matoghasẹ̌ e sarung kailangengu katoghase, dingangu taumata mal᷊ahasa e sarung tawe makaambang batangenge hala. 15Měmamitị tawe makatahang, tumatal᷊ang masahawụ e tawe makatal᷊angu watangenge ringangu sumasake kawal᷊o e tawe mal᷊iwirẹ̌. 16Su ěllo ene sordado kawahaniange mal᷊ain sarung maněntangu aghide, bọu e tumal᷊ang. Iạ e Mawu kụ seng něhengetang.”
Currently Selected:
AMOS 2: SXN
Highlight
Share
Copy
Want to have your highlights saved across all your devices? Sign up or sign in
