ZABUR 40
40
Do'e syukur dait petunasan
1Umaq pemimpin kor. Zabur Daud.
Do'e syukur
2Tiang sabar ngantos pertulungan ALLAH ;
terus Ie merhatiang tiang dait mirengang kuihan tiang.
3Ie antuq tiang léman loang saq bahaye,
léman reraok rawe-rawe.
Ie noloq tiang léq atas bukit batu,
sehingge langkah tiang pasti.
4Ie ngajah tiang nyanyiang lagu baru,
lagu pujian bagi Tuhante.
Luwéq dengan serioq ie dait jari takut,
terus percaye léq ALLAH.
5Bahagie dengan saq percaye léq ALLAH,
saq ndéq milu nyembah déwe-déwe,
atao nunas tulung léq dengan sombong.
6Ya ALLAH, luwéq gati karye Deside léq kaji pade.
Ya ALLAH, Tuhan kaji, Deside nénten araq bandinganne!
Luwéq rencane Deside saq ajaip léq kaji pade,
ndéqne mungkin teceriteang selapuqne.
7 #
Ibr. 10:5-7
Persembahan dait kurban sesajén nénten Deside suke,
kurban tunuqan dait kurban pengapus dose nénten Deside tuntut.
Laguq Deside sampun ngicanin kaji kentok
saq bau dengah manik Deside.
8Beterus tiang matur, “Niki kaji,
léq dalem gulungan kitab araq tetulis mengenai kaji.
9Kaji seneng ngelaksaneang pekayunan Deside, ya Allah,
préntah Deside kaji toloq léq dalem atén kaji.”
10Kaji nyampéang keselametan
léman ALLAH léq dalem jemaah saq beléq.
Nénten araq tutuqne kaji nyampéang hal nike,
Deside wikan selapuq nike, ya ALLAH.
11Keadilan nénten kaji seboq léq dalem atén kaji,
pertulungan dait kesetiean Deside tetep kaji beriteang.
Léq julu jemaah saq beléq kaji nénten tedoq doang,
laguq kaji nyampéang kasih dait kesetiean Deside.
12Ya ALLAH sampunang engkah periak léq kaji;
tetep lindungin kaji siq kasih dait kesetiean Deside.
Do'e petunasan
(Zbr. 70:2-6)
13Kaji tekepung siq luwéq bahle,
nénten bau terékéng luwéqne.
Kaji tepaléq siq dose-dose kaji
jangke kaji nénten tao nyerioq.
Jumlahne luwéqan léman bulu léq ulu kaji,
miaq kaji putus ase.
14Ya ALLAH, selametang kaji;
gelis tulung kaji, ya ALLAH!
15Menengang dengan saq melét nyematéq kaji
tekalahang dait pelai kebingungan.
Menengang dengan saq nyurakin kesedihan kaji
tempuk mundur dait tehine.
16Menengang dengan saq ngeréréqang kaji
jari tinjot dait ilaq.
17Semoge selapuq dengan saq nyembah Deside
besukecite dait cemoh,
dait selapuq saq demen léq keselametan léman Deside
tetep bebase, “Tetu-tetu ALLAH nike agung!”
18Kaji niki miskin dait lemah,
laguq Junjungan Saq Mulie merhatiang kaji.
Deside penulung dait penyelamet kaji,
sampunang telat, ya Allah kaji!
Currently Selected:
ZABUR 40: LAISAS
Highlight
Share
Copy
Want to have your highlights saved across all your devices? Sign up or sign in
