ZABUR 31
31
Beharep tipaq ALLAH
1Umaq pemimpin kor. Zabur Daud.
2Kaji berlindung léq Deside ya ALLAH,
sampunang menengang kaji tekecéweang.
Selametang kaji demi keadilan Deside
3pirengang kaji dait gelis bébasang kaji.
Deside maraq gunung batu kaji
taoq kaji berlindung,
maraq bénténg saq kuat,
léq derike kaji selamet.
4Deside maraq gunung batu kaji
dait bénténg kaji saq kuat!
Bimbing kaji sesuai kance janji Deside.
5Lepasang kaji léman set saq tepasang jari bau kaji,
séngaq Deside taoq kaji berlindung.
6 #
Luk. 23:46
Léq dalem gading Deside kaji serahang nyawen kaji;
Deside bébasang kaji,
ya ALLAH, Tuhan saq setie.
7Deside meriq léq dengan saq nyembah berhale;
laguq kaji percaye léq ALLAH.
8Kaji gen seneng dait besukecite
séngaq Deside tetep ngasihin kaji.
Deside cingakin penderitean kaji
dait merhatiang kesusahan kaji.
9Deside nénten menengang kaji tetahen siq musuh,
laguq miaq kaji bau lampaq bébas.
10Periakang kaji, ya ALLAH,
séngaq kaji dalem kesusahan;
maten kaji peréq lantaran nangis,
jiwe dait awak kaji sengsare.
11Idup kaji bis dalem penderitean,
taun-taun kaji, kaji alamin léq dalem keluh kesah.
Kekuatan kaji sayan kurang lantaran kejahatan kaji,
malahan tolang-tolang kaji jari lumah.
12Kaji jari keréréqan musuh-musuh kaji,
malahan pare tetangge kaji.
Selapuq kenalan kaji tinjot lamun serioq kaji,
ie pade pelai lamun bedait kance kaji léq langan.
13Kaji telupaqang maraq dengan maté,
dait jari maraq barang saq tetetéh.
14Léq mbé-mbé araq ketakutan saq beléq;
kaji dengah musuh kaji bepéséq-péséq.
Ie pade besekongkol ngelawan kaji,
dait miaq rencane jari nyematéq kaji.
15Laguq kaji beharep léq Deside, ya ALLAH,
séngaq Deside Allah kaji.
16Deside tetep meliharaq kaji;
selametang kaji léman musuh-musuh kaji,
dait léman dengan-dengan saq maléq kaji.
17Semoge Deside suke léq hambe Deside;
selametang kaji lantaran kasih Deside.
18Sampunang menengang kaji mauq ilaq, ya ALLAH,
séngaq kaji bekuih tipaq Deside.
Menengang dengan jahat teperilaq,
dait tedoq-tedoq turun ojok dunie dengan maté.
19Sumpel biwih pare penduste
saq siq sombongne ngoloq dengan jujur.
20Berembé limpahne kesolahan Deside
saq Deside sedieang umaq dengan saq takut léq Deside!
Sebilang dengan serioq kesolahan saq Deside piaq,
bagi ie pade saq berlindung léq Deside.
21Deside seboq ie pade léq dalem perlindungan Deside
léman siasat dengan jahat;
Deside jagaq ie pade léq dalem perlindungan Deside
léman tuduhan musuh.
22Pade puji ALLAH!
Ajaip gati kasih-Ne léq tiang,
waktu tiang tekepung dait teserang.
23Léq waktu tiang bingung,
tiang paran ALLAH sampun netéh tiang léman hadirat-Ne.
Laguq Ie sampun mirengang petunasan tiang
waktu tiang bekuih tipaq Ie.
24Pade kasihin ALLAH, hai selapuq umat-Ne,
ALLAH ngelindungin dengan saq setie.
Laguq nénten tanggung-tanggung
Ie ngukum dengan saq sombong.
25Kuatang dait teguqang aténde,
side selapuq saq beharep léq ALLAH!
Currently Selected:
ZABUR 31: LAISAS
Highlight
Share
Copy
Want to have your highlights saved across all your devices? Sign up or sign in
