MATIUS 21

Deside Isa temulieang léq Yerusalem

(Mrk. 11:1-11; Luk. 19:28-40; Yah. 12:12-19)

1Sewaktu sampun rapet Yerusalem, Deside Isa dait pengiring-pengiring-Ne rauh léq Betpage léq Bukit Zaitun. Léq derike Deside Isa ngemanikang due pengiring-Ne lampaq bejulu 2dait bepesen: “Silaq lumbar ojok kampung saq araq léq julunde nike. Léq derike side pade gen ndait bagal dait anakne kenyeke tegeteng. Lekaq deduaqne terus jauq ojok deriki. 3Lamun araq dengan saq beketuan léq side, badaqang, ‘Junjungan Saq Mulie merluang bagal niki’, make dengan nike pasti gen ngalurang bagal nike tejauq.”

4Siq care nike telaksane napi saq tesampéang siq nabi, maraq niki,

5 # Za. 9:9 “Sampéang léq putri Sion:

Sereminang, Rajende kenyeke rauh ojok side.

Ie lemah lembut dait nunggang sopoq bagal,

sopoq anak bagal saq masih odaq.”

6Beterus kedue pengiring-Ne nike lumbar dait ngelaksaneang napi saq temanikang siq Deside Isa tipaq ie pade. 7Ie pade jauq bagal nike lantong anakne, terus ie pade lamak bongkor bagal nike kadu jubahne. Beterus Deside Isa taék. 8Luwéq dengan léq derike kelat jubahne léq langan, dait dengan-dengan lain peleng pémpang-pémpang lolo terus jéjérne éndah léq tengaq langan. 9#Zbr. 118:26 Dengan luwéq saq lampaq léq julu dait léq mudi Deside Isa pade bekuih-kuih, “Hosana tipaq Keturunan Daud! Teberkahin Ie saq rauh dalem peséngan Tuhan! Hosana léq taoq saq maheagung!”

10Beterus, sewaktu Deside Isa tame ojok kote Yerusalem, selapuq kote nike jari biur lantur. “Sai dengan niki?” basen dengan-dengan léq kote nike beketuan.

11“Ie Nabi Isa léman Nazaret, kote léq Galilea,” jawab dengan-dengan luwéq saq ngiring Deside Isa.

Deside Isa tame ojok Gedéng Allah

(Mrk. 11:15-19; Luk. 19:45-48; Yah. 2:13-22)

12Beterus Deside Isa tame ojok Gedéng Allah, dait sediq selapuq dengan saq kenyeke bedagang dait belanje léq derike. Balik belah-Ne selapuq méje-méje saq tekadu jari nukahang képéng, dait bangku-bangku saq tekadu bedagang kedit dare. 13#Yes. 56:7; Yer. 7:11 Terus Deside Isa bemanik léq dengan-dengan nike, “Léq dalem Kitab Suci tetulis bahwe Allah bemanik, ‘Gedéng Tiang gen tesebut gedéng do'e.’ Laguq side pade jariang ie taoqne bekumpul dengan-dengan jahat!”

14Dengan-dengan bute dait dengan-dengan démpang parek tipaq Deside Isa léq Gedéng Allah, dait ie pade teselahang siq Deside Isa. 15Laguq sewaktu imam-imam kepale dait ahli-ahli Taurat serioq muqjizat-muqjizat saq tepiaq siq Deside Isa dait pirengang kanak-kanak saq bekuih-kuih léq dalem Gedéng Allah: “Hosana tipaq Keturunan Daud!” ie pade jari menggah gati.

16 # Zbr. 8:3 Ie pade matur léq Deside Isa, “Napi Pelungguh pireng saq ie pade ucapang nike?”

“Enggih, Tiang dengah,” jawab Deside Isa. “Napi side pade ndéqman bace ayat Kitab Suci niki: ‘Léman biwih kanak-kanak, malahan bebéaq-bebéaq saq kenyeke nyusu, Tuhan sampun nyedieang puji-pujian’?”

17Sesampun nike Deside Isa bilin dengan-dengan nike, beterus margi ojok kote Betania dait mererepan léq derike.

Deside Isa ngutuk lolo are

(Mrk. 11:12-14, 20-24)

18Léq jemaq kelémaqne, léq dalem pemargian-Ne tulak ojok kote, Deside Isa beridap seduk. 19Ie cingakin sopoq lolo are léq sedin rurung, terus laiq-Ne lolo are nike, laguq ndéq araq buaqne, kecuali daun-daunne doang. Terus Deside Isa bemanik léq lolo are nike, “Ndaq bebuaq malik jangke selaéq-laéqne!” Langsung lolo are nike gero.

20Sewaktu pengiring-pengiring Deside Isa serioq peristiwe nike, selapuqne bengaq gati. Ie pade metakén, “Kembéq lolo are nike selung-selung gero?”

21 # Mat. 17:20; 1Kor. 13:2 Manik Deside Isa, “Tiang badaq side, setetune lamun side pade percaye dait ndéq bimbang, side pade bau laksaneang napi saq sampun Tiang laksaneang léq lolo are niki. Dait ndéqne nike doang, malahan lamun side pade bebase tipaq gunung niki, ‘Kerungkahan dait ngalih ojok segare!’ Make hal nike gen telaksane. 22Dait napi juaq saq side pade tunas dalem do'e, side pade gen nerimaq ie asal side pade percaye.”

Persoalan mengenai kuase Deside Isa

(Mrk. 11:27-33; Luk. 20:1-8)

23Beterus Deside Isa tulak ojok Gedéng Allah, terus tame dait ngajahang léq derike. Sewaktu Ie kenyeke ngajahang, imam-imam kepale dait pemimpin-pemimpin Yahudi parek dait metakén léq Ie, “Atas dasar napi Pelungguh ngelaksaneang selapuqne nike? Sai saq aturin Pelungguh kuase nike?”

24Jawab Deside Isa, “Tiang éndah mélé beketuan léq side pade, dait lamun side pade bejawab, Tiang éndah gen badaq side siq kuase sai Tiang ngelaksaneang hal-hal nike. 25Siq kuase sai Yahya baptis dengan? Kuase Allah atao manusie?”

Beterus imam-imam kepale dait pemimpin-pemimpin Yahudi nike mulai berunding léq antare ie pade. Ie pade bebase, “Lamun ite jawab, ‘Siq kuase Allah,’ Ie gen bemanik, ‘Lamun maraq nike kembéq side pade ndéq percaye léq Yahya?’ 26Laguq lamun ite bejawab, ‘Siq kuase manusie,’ ite takut léq dengan luwéq, séngaq selapuq dengan anggep Yahya nike nabi.” 27Jari, jawab ie pade, “Mindah tiang.”

Beterus Deside Isa bemanik léq ie pade, “Lamun maraq nike, Tiang éndah ndéq gen badaq side siq kuase sai Tiang ngelaksaneang selapuqne niki.”

Perumpamean mengenai due kanak

28“Mangkin berembé pendapet side mengenai hal niki?” manik Deside Isa selanjutne. “Araq sopoq bapaq bedowé due bije mame. Ie lumbar ojok bijene saq sengake dait bebase, ‘Nune, lalo begawéan ojok kebon anggur jelo niki.’ 29‘Tiang ndéq mélé,’ jawab kanak nike. Laguq ndéq ngonéq ie berobah pikiran, terus ie lalo ojok kebon nike. 30Beterus bapaqne nike lumbar ojok bije saq kedue, dait bebase hal saq pade éndah. ‘Enggih, Bapaq,’ jawab bije saq kedue nike. Laguq ie ndéq lumbar. 31Nah, léq antare kedue bije nike, saq mbé ngelaksaneang keméléq bapaqne?”

“Saq sengake,” jawab ie pade.

Terus Deside Isa bemanik malik léq ie pade, “Tiang badaq side, setetune penagih-penagih pajek dait dengan-dengan nine pelacur gen juluan tame Kerajaan Allah ketimbang side pade. 32#Luk. 3:12, 7:29-30 Séngaq Yahya nike rauh, jari nyatayang léq side pade care idup saq tekayunang siq Allah, dait side pade ndéq percaye léq pengajahanne; laguq penagih-penagih pajek dait dengan-dengan nine pelacur nike percaye léq Yahya. Laguq timaq side pade sampun serioq selapuqne nike, side pade ndéq mélé ngerobah pikirande dait ndéq percaye léq ie.”

Perumpamean penyakap-penyakap kebon anggur

(Mrk. 12:1-12; Luk. 20:9-19)

33 # Yes. 5:1-2 “Pade dengahang malik perumpamean saq sopoq niki,” manik Deside Isa. “Araq sopoq majikan bedowé kebon dait talet anggur léq kebon nike. Ie miaq lambah léq sekelining kebon nike, dait kaliq longkak jari taoqne peres anggur, terus ie penganjeng menare taoq dengan bejage. Sesampun nike séweangne kebon nike léq penyakap-penyakap, beterus ie berangkat ojok negeri lain. 34Waktu dateng musim padas buaq anggur, majikan nike ngutus pelayan-pelayanne tipaq penyakap-penyakap nike jari nerimaq bagianne. 35Laguq penyakap-penyakap kebon nike bau pelayan-pelayan saq teutus siq majikan nike: Saq sopoq tepadek, saq lain tematéq dait saq lain malik tepeléwas siq batu. 36Majikan kebon anggur nike ngutus malik pelayan-pelayan saq lain, luwéqan léman saq penembéq. Laguq ie pade éndah teperlakuang pade maraq saq juluan. 37Ahirne majikan kebon anggur nike ngutus bijene mésaq tipaq ie pade, pikirne, ‘Pasti anak tiang gen tehormatin.’ 38Laguq sewaktu penyakap-penyakap nike serioq bije majikanne nike, ie pade bebase sopoq kance saq lain, ‘Niki ie ahli warisne, silaq ite matéq ie, adéq ite saq mauq warisanne!’ 39Make bije majikanne nike tebau, dait sautne ojok luah, terus tematéq.”

40Deside Isa beketuan, “Lamun épén dowé kebon anggur nike tulak, gen ie kumbéqang penyakap-penyakapne nike?”

41Jawab ie pade, “Pasti ie gen matéq dengan-dengan jahat nike, terus séweangne kebon anggur nike tipaq dengan lain saq gen ngebéng ie hasil léq musim padas anggur.”

42 # Zbr. 118:22-23 Deside Isa bemanik léq ie pade, “Napi side pade ndéq uwah bace saq tetulis léq dalem Kitab Suci?

‘Batu saq tetetéh siq tukang bangunan

sampun jari batu saq paling utame.

Niki karye Tuhan;

sopoq karye saq ajaip léq julunte!’ ”

43“Keranaq nike Tiang badaq side, bahwe Kerajaan Allah gen tebait léman side, dait gen teicanin tipaq sopoq bangse saq gen ngasilang buaq Kerajaan nike. [44Sai-sai saq geriq léq batu nike gen ancur; dait sai-sai saq tendet siq batu nike, ie gen remuk.]”

45Sewaktu imam-imam kepale dait dengan-dengan Parisi nike pirengang perumpamean Deside Isa nike, ie pade ngerti bahwe Deside Isa bebaos mengenai ie pade. 46Jari, ie pade berusahe bau Deside Isa. Laguq ie pade takut léq dengan luwéq, séngaq dengan-dengan nike anggep Deside Isa nabi.

Currently Selected:

MATIUS 21: LAISAS

Highlight

Copy